VOV4.Bahnar - Năr ‘nâu, tơ̆ Hà Nội pơ gơ̆r hop akŏm tih mă 3 Kuô̆k hô̆i jăl XV. Tơ chĕng hơ drol năr vă bơ̆ jang đơ̆ng Kuô̆k hô̆i lơ̆m ‘măng hop akŏm âu ‘nŏh 20 năr, vă pơ tôch lơ̆m năr 5, ‘năr 17/6/2022. Hop akŏm hlôi đei hơ met ‘lơ̆ng tôm tơ drong, ‘moi kiơ̆ dôm tơ drong hlôi tơ plih ‘nao đei yoa ‘lơ̆ng đơ̆ng dôm ‘măng hop akŏm adrol ki, akŏm pơ ma nuh, hơ len năng dôm tơ drong gĭt kăl kơ tĕh đak. Adrol kơ pơ gơ̆r hop akŏm, tơ̆ dôm tơ ring hlôi pơ gơ̆r tơ ƀâp bơ ngai tăh hla vă bơ ngai tang măt Kuô̆k hô̆i gơ̆h băt hơ dăh tơ drong hơ pơi ‘mĕh đơ̆ng kon pơ lei.

Tơ̆ hop akŏm mă 10, hăm tơ drong pơ gơ̆r đơ̆ng Kơ dră Kuô̆k hô̆i Vương Đình Huệ, Anih chĕp kơ̆l pơ gơ̆r Kuô̆k hô̆i tơ gop nơ̆r tôch hơ len vă hơ met ăn hop akŏm mă 3, Kuô̆k hô̆i jăl XV, đei trong pơ gơ̆r hop akŏm, dôm tơ drong vă pơ ma nuh, jơ pơ gơ̆r pơih blŭng, jơ pơ tôch, tơ drong hơ met, vei sơ đơ̆ng tang găn ‘lơ̆ng jĭ hơ buh, tơ roi tơ băt ăn hop akŏm. Kiơ̆ tơ drong jang, lơ̆m hop akŏm mă 3, Kuô̆k hô̆i vă hơ len năng, pơ drơ̆ng nơ̆r ăn 5 kơ luơ̆t, 4 tơ drong tơ chơ̆t đei: Luơ̆t kanh sat cơ động; Luơ̆t pơm sinrơma (oei chih hơ met); Luơ̆t tĕch mơ dro ƀao hiêm (oei chih hơ met); Luơ̆t Pơ jei, pôk hơ păh (oei chih hơ met); Luơ̆t hơ met ming, chih tơ mât dơ̆ng 1,2 tơ drong lơ̆m Luơ̆t vei lăng đon pơ chĕh rơ gei; Tơ drong tơ chơ̆t găh jang pơ long năng trong pơ gơ̆r bơ̆ jang, iung jang xa, pơ tho tơ drong jang ăn bơ ngai pơm yoch tơ̆ ‘ngoăih hnam phak; Tơ drong tơ chơ̆t găh Tơ drong jang chih pơ jing luơ̆t, tơ drong hơ găt sơ năm 2023, hơ met ming tơ drong chih pơ jing luơ̆t, tơ drong hơ găt sơ năm 2022; Tơ drong tơ chơ̆t chih tơ lĕch hla ar Hơ găt kơ Hop akŏm Kuô̆k hô̆i (đei chih hơ met); Tơ drong tơ chơ̆t găh jang pơ long năng 1,2 trong jang, tơ drong tơ gŭm hơ drô̆, atŏk tơ iung dêh char Khánh Hòa.

Ƀok Phan Đình Trạc tơ ƀâp bơ ngai tăh hla tơ̆ Đơn Dương-Lâm Đồng

Kuô̆k hô̆i vă tơ gop nơ̆r ăn 6 kơ luơ̆t đei: Luơ̆t jang đak dâu (oei chih hơ met); Luơ̆t tang găn tĕh dong lơ̆m unh hnam (oei chih hơ met); Luơ̆t Dăr hơ len (oei chih hơ met); Luơ̆t Bơ̆ jang kiơ̆ trong kon pơ lei pơm tơm tơ̆ tơ ring; Luơ̆t hơ met ming, chih tơ mât dơ̆ng 1,2 tơ drong lơ̆m Luơ̆t Tần số vô tuyến điện; Luơ̆t Khăm hơ met jĭ (oei chih hơ met). Găh dôm tơ drong ƀơm truh mŭk drăm, tơ pôl, jên mong kơ tĕh đak, dăr lăng păng dôm tơ drong gĭt kăl nai, Kuô̆k hô̆i vă hơ len năng hla ar chih dôm tơ drong ‘nao iŏk đei dơ̆ng mưh bơ̆ jang atŏk tơ iung mŭk drăm, tơ pôl păng thu mong jên tĕh đak sơ năm 2021; tơ drong jang atŏk tơ iung mŭk drăm, tơ pôl păng thu mong jên tĕh đak dôm khei blŭng sơ năm 2022. Kĭ pơ kăp jên jang kơ tĕh đak sơ năm 2020. Hơ len năng hla ar chih tơ roi găh tơ drong ‘mơ ‘met, tang găn pơ huach kư̆ kă sơ năm 2021 păng 1,2 tơ drong kăl nai hai.

Adrol kơ hop akŏm, tơ̆ dôm dêh char Tây Nguyên kŭm nhen lơ̆m tĕh đak, pơ gơ̆r lơ ‘măng tơ ƀâp bơ ngai tăh hla. Anih Trung ương Mặt trận Tổ quốc Việt Nam roi tơ băt tơ drong chih akŏm nơ̆r pơ ma, apinh đơ̆ng bơ ngai tăh hla păng kon pơ lei gơih ăn hop akŏm mă 3, Kuô̆k hô̆i jăl XV. Anih chĕp kơ̆l pơ gơ̆r Kuô̆k hô̆i roi tơ băt trong hơ len năng tơ drong sek tơ lang dôm nơ̆r pơ ma apinh đơ̆ng bơ ngai tăh hla gơih ăn hop akŏm mă 2, Kuô̆k hô̆i jăl XV.

Bơ ngai tăh hla Tây Nguyên athei, tơ lĕch nơ̆r apinh hăm dôm bơ ngai tang măt Kuô̆k hô̆i găh lơ tơ drong mơ mat tat, ưh kơ lăp kăl đei dêh char, apŭng păng Trung ương tơ rĕk, sek tơ lang ăn. ‘Nŏh jĭ tơ drong tơ proh trong jang, man anih jang, pơm trong vă atŏk tơ iung tơ ring kơ drâm ‘nao oei bơ̆ jang tôch hiơ̆; tơ drong pơm hla ar oei tơ hlăk tăk, hiơ̆ hyĭn, mă loi jĭ dôm hla ar ƀơm truh tơ drong ƀơk hơ lơ̆k, tơ plih ming, pơm ‘nao hla ar tĕh; tơ drong hrŭ ‘mong mưh chưk pơ ‘ngoăih tĕh ăn dôm tơ drong jang lơ̆m tơ pôl, kŭm hăm lơ tơ drong ưh kơ lăp nai hai; tơ drong kŏh phă bri, tơ gar iŏk tĕh, sir iŏk tơ mam lơ̆m tĕh; tơ drong tang găn xa pơ jĭp ƀât lăp oei lăng pơ hơi "pơ ma re, jang ưh kơ hret"; tơ drong tĕh dong lơ̆m unh hnam, tĕh dong băl tơ̆ hnam hŏk roi tŏk... Mĭnh tơ drong đei kon pơ lei tôch tơ rĕk ‘nŏh jĭ kơ jă tơ mam tŏk. Lơ̆m nŏh kơ jă tơ mam pơ yoa ăn tơ drong choh jang xa tŏk tôch dêh, oei tơ drong tĕch tơ mam ‘nŏh ưh jăh hlot, kơ jă jur tŏk ưh sơ đơ̆ng, pơm ăn tơ drong jang xa tơ̆ dôm tơ ring pơ tăm ‘nhot tơm tơ ƀâp lơ mơ mat tat.

Bơ ngai tăh hla Phan Tùng Châu, tơ̆ plei Nghĩa Hiệp 2, xăh Ka Đô, đei nơ̆r pơ ma: “Hrei ‘nâu kơ jă tơ mam vă choh jang xa đe tĕch tôch măk, pơ tih gia 1 ƀao phŏng tĕch 1.350.000, adrol kơ ‘nŏh lăp 950.000 mĭnh ƀao đĕch, oei dôm kơ loăi ‘nhot oei tĕch lei lăi, tơ drong tĕch mơ dro ưh đei ƀônh hlot. Apinh anih jang kơ pal pơm thoi yơ vă vei sơ đơ̆ng kơ jă tơ mam, vă kon pơ lei nhôn gơ̆h đei xa yoa ƀiơ̆.”

Dak Lak tơ ƀâp bơ ngai tăh hla adrol kơ Hop akŏm mă 3 Kuô̆k hô̆i jăl XV

Tơ̆ Dak Lak, lơ̆m jơ bơ̆ jang đơ̆ng Khul tang măt Kuô̆k hô̆i dêh char Dak Lak hăm Dơ nŏ anih vei lăng kon pơ lei dêh char păng dôm anih jang kơ pal vă hơ met rim tơ drong vă pơ ma nuh lơ̆m hop akŏm mă 3, Kuô̆k hô̆i jăl 15, lơ nơ̆r pơ ma ƀơm truh trong tơ gŭm lơ̆m tơ drong jang atŏk tơ iung mŭk drăm, tơ pôl tơ̆ tơ ring hlôi đei chih tơ mât lơ̆m hla ar vă tơ roi ăn Kuô̆k hô̆i. Nhen tơ drong jang atŏk tơ iung unh hơ yuh rơ gŏh, Dak Lak đei lơ tơ drong ‘lơ̆ng găh unh điên kial, unh điên măt ‘năr, kơ na lơ̆m trong jang atŏk tơ iung unh hơ yuh rơ gŏh truh sơ năm 2045, Khul kơ dră tĕh đak, Anih tơm vei lăng tĕch mơ dro athei hơ len năng hơ tŏk ming kơ sư̆k vă atŏk tơ iung unh hơ yuh rơ gŏh tơ̆ Dak Lak.

Ƀok Vũ Đình Trưng, Phŏ Kơ dră Anih vei lăng jang kơ măy, tĕch mơ dro dêh char Dak Lak đei nơ̆r pơ ma: “Truh sơ năm 2045 kơ sư̆k unh điên măt ‘năr iŏk đei dang 41%. Thoi nŏh Dak Lak apinh jang đơ̆ng 10.000 truh 15.000 MW ‘nŏh huei. Vă atŏk tơ iung unh hơ yuh rơ gŏh ‘nŏh đei lơ tơ drong ‘lơ̆ng găh tĕh, tơ lei unh điên, đei lơ tơ lei unh điên 500 KV păng kơ măy 500 KV tơ̆ âu. Yoa thoi nŏh tơ drong kơ chĭl kơ sư̆k jang tơ̆ âu ưh kơ hli”.

1 tơ drong đei dôm bơ ngai tang măt tơ lĕch nơ̆r apinh Kuô̆k hô̆i set hơ len, pơ drơ̆ng nơ̆r lơ̆m hop akŏm âu ‘nŏh jĭ Luơ̆t Ƀao hiêm tơ pôl đei chih hơ met. Lơ̆m nŏh đei trong hơ găt ƀơm truh trong tơ gŭm đơ̆ng pơ̆k rơ ka mư̆h oei bơ̆ jang, yoa tơ drong jang păng ƀao hiêm hiong tơ drong jang. Ƀok Nguyễn Khắc Tuấn, Kơ dră chĕp kơ̆l Ƀao hiêm tơ pôl dêh char Dak Lak akhan, mưh bơ̆ jang dôm tơ drong tơ gŭm ƀơm truh tơ drong ‘nâu oei tam mă kơ jăp, tam mă drơ̆ng 1 nơ̆r: “Hrei ‘nâu sek tơ lang kla jên ăn ƀao hiêm hiong tơ drong jang ‘nŏh găh anih vei lăng bơ ngai jang pơm. Găh ƀao hiêm tơ pôl lăp thu păng tơ lĕch jên đĕch. Pơ̆k rơ ka mưh oei bơ̆ jang ‘nŏh ƀao hiêm bơ̆ jang kŭm sek tơ lang ăn, mă lei chih hơ găt tơ̆ Luơ̆t Tơ drong jang kơ na kŭm tôch tơ hlăk. Kơ lih thoi nŏh hơ pơi ‘mĕh dôm bơ ngai tang măt lăng tôm tơ drong lơ̆m Luơ̆t Ƀao hiêm oei chih hơ met, pơm thoi yơ pơ jing tơ drong hiôk hian hlŏh ăn bơ ngai jang păng kon pơ lei mưh pơm kiơ̆ tơ drong tơ gŭm đơ̆ng ƀao hiêm tơ pôl”.

Dơ̆ng: Tơ blơ̆