Lui păng hơ mĕng ‘nŏh jĭ tơ drong đei lơ̆m jơ hngâm đon lơ bơ ngai tang măt Kuô̆k hô̆i păng bơ ngai tăh hla hăm hop akŏm mă 4, Kuô̆k hô̆i jăl 15. Hop akŏm đei pơ gơ̆r đơ̆ng rŏng kơ Hop akŏm Trung ương 6 ‘nao tôch, chă pơ ma nuh găh lơ tơ drong gĭt kăl hăm tơ drong jang atŏk tơ iung mŭk drăm tơ pôl kơ tĕh đak; tơ drong tơ plih ‘nao trong chĕp kơ̆l pơ gơ̆r đơ̆ng Đảng... Kăl loi, Hop akŏm Trung ương 6 hlôi ki luơ̆t păng asong pơ dơ̆h jang lơ̆m Trung ương hăm 1,2 ‘nu Kơ dră jang lơ̆m Trung ương Đảng. ‘Nâu jĭ tơ drong kăl vă pơih trong ăn tơ drong “chu pơ dơ̆h jang”, vă dôm bơ ngai jang lơ̆m Trung ương nai hơ len năng kơ dih kâu păng tơ ƀôh ăn dôm kơ chư̆k jang nai lơ̆m rim anih jang chinh trĭ.

Bơ ngai tang măt Lê Thanh Vân, khul Cà Mau akhan: “Inh hơ mĕng, truh mĭnh năr yơ kơnh, mưh Đảng năm hơ drol bơih ‘nŏh lơ̆m khul kơ dră pơ gơ̆r tĕh đak kŭm đei trong yak lăp ‘lơ̆ng, vă dôm kơ chư̆k chĕp vei tơ drong chĕp kơ̆l tĕh đak ƀôh kơ dih jang ưh gơ̆h, ưh kĕ jang, chu “ăn bơ ngai nai iŏk jang”, vă dôm bơ ngai rơ gei, đei jơ hngâm đon tơ păt ‘lơ̆ng - tŏk jang tơ păt ‘lơ̆ng, ưh kơ sĭ athei chă kơ dâu tơ̆ âu tơ̆ to, ưh đei kŭp kơ̆l apinh kơ chư̆k”.

Jơ hop akŏm ‘măng mă 4 Kuôk hô̆i jăl 15

Minh tơ drong ƀơm truh tơ drong arih xa kơ kon pơ lei "tôch tơ tŏ", đei bơ ngai tăh hla tôch tơ rĕk ‘nŏh jĭ kơ jă đak xăng, đak dâu. Tơ drong kơ jă đak xăng, đak dâu tŏk khei ‘năr âu ki yoa tơ drong tôch gĭt kăl ‘nŏh ưh kơ măh đak xăng đak dâu vă tĕch mơ dro lơ̆m tĕh đak, kơ jă răt ưh kơ lăp, kơ jă răt măk hlŏh kơ jă tĕch pơm ăn lơ anih tĕch mơ dro đak xăng, đak dâu pŭ lôh. Tơ drong ‘nâu jing pơm ăn lơ anih tĕch mơ dro tang ‘măng mă ưh ‘nŏh tĕch lăp ai ăn tơ moi truh răt. Bơ ngai tăh hla athei Khul kơ dră tĕh đak chih iŏk ƀai hŏk kăl păng đei trong tơ jră tơ tom mưh kơ jă lơ̆m apŭng jur tŏk ưh kơ ‘lơ̆ng tơ̆ hơ năp ning mônh. Hơ dai hăm ‘nŏh pơm hơ dăh dôm tơ drong ưh kơ lăp lơ̆m tơ drong vei lăng kơ jă dôm tơ mam yoa kăl. Yoa mưh kơ jă đak xăng, đak dâu jur, lơ tơ mam oei vei kơ jăp kơ jă măk; mă loi hăm dôm tơ mam pơ yoa ăn choh jang xa, phe ƀa tơmam xa… pơm ưh ‘lơ̆ng truh tơ drong arih xa kơ kon pơ lei, anih jang: “Rim tơ drong jang kiơ kŭm đei ƀơm truh tơ̆ đak xăng, đak dâu ngăl. Ƀơm dêh hlŏh ‘nŏh găh tơ drong pơm tơ lĕch, tĕch mơ dro, jô̆ hloi bơ ngai công nhân năm jang, kŭm nhen tơ drong chơ chuĕn tơ mam. Đơ̆ng anih choh jang xa truh anih ming man, jô̆ hloi anih tĕch mơ dro tơ tă ƀơm truh tơ̆ đak xăng, đak dâu ngăl.”

Đơ̆ng rŏng lơ ‘măng pơ dơh lê̆, ‘măng âu Kuôk hô̆i tơ chơ̆t hơ met ming Luơ̆t teh. ‘Nâu jĭ luơ̆t đei lơ bơ ngai tăh hla, kon pơ lei bơ ngơ̆t truh păng athei tang găn tơ drong kơ nê̆, pơ gơ̆m iŏk yua lơ̆m kơ lăh pơ jing luơ̆t. Luơ̆t teh (hơ met ming) kăl kơ pơm rơ đăh tơ drong iŏk pơ dreo teh, mă loi ‘noh hăm tơ drong jang pơm anih kơ drơ̆m, anih hnam oei tơ̆ mơ dro sa. Tơ drong hrŭ ‘mong, tơ gŭm, ăn oei tơ̆ plei hle mưh teh đak iŏk pơ dreo teh athei vei sơ đơ̆ng iŏk yua păng tơ drong hiôk arih dang ăi dăh mă ‘lơ̆ng kơ hơ nih oei so. Kăl kơ lăng truh, băt rơ đăh trong jang tơ gŭm jên hu găh teh...

Bơ ngai tang măt Kuôk hô̆i vang truh hop akŏm mă 4 tơ̆ Anih hop akŏm Diên Hồng - Hnam Kuôk hô̆i

Jĭ anih jang pơm kiơ̆ tơ drong jang vei lăng teh đak găh tơ drong jang teh, Kơ dră Anih tơm vei lăng găh tơ mam drăm păng cham char Trần Hồng Hà tơ băt: Luơ̆t teh (hơ met ming) yak truh hơ găt vei sơ đơ̆ng băt hơ dăh kơ jă teh rơ đăh, tơ păt păng lăp hăm kơ jă anih tĕch mơ dro vă kon pơ lei păng anih jang mơ dro sa đei iŏk yua ngăl: “Mưh pơm đei pơ jă teh vei sơ đơ̆ng băt hơ dăh 1 trong rơ đăh, tơ păt păng lăp hăm kơ jă anih tĕch mơ dro ‘noh kon pơ lei păng anih jang mơ dro sa đei iŏk yua ngăl. Tơ drong ‘noh tơ gop băt hơ dăh đei dôm tơ drong ‘meh vă chă trong pơ gơ̆m vă pơ yua ăn kơ dih. Kon pơ lei mưh đei teh đei iŏk pơ dreo ‘noh kơ jă teh tơ̆ khei ‘năr iŏk pơ dreo ‘noh gô đei hrŭ mong lăp hăm kơ jă teh. Găh tơ drong teh đak kŭm đei iŏk yua yua kơ mưh iŏk đơ̆ng bơ ngai iŏk yua teh kŭm gô iŏk đei ƀlep kơ jă”.

Đơ̆ng rŏng Hop akŏm Trung ương 6 ăn tơ gop nơ̆r găh trong jang hơ met ming jên khei, jên khei pơ dơh hưu, tơ gŭm ƀao hiêm tơ pôl păng tơ gŭm bơ ngai đei kŏng lơ̆m sơ năm 2023, truh dang ei, Khŭl kơ dră teh đak tŏk bŏk pơ truh ăn Kuôk hô̆i tơ chĕng hơ drol hơ met ming jên khei đơ̆ng ‘năr 1/7/2023 hăm jên tŏk đơ̆ng 1 triệu 490 rơ bâu hlak tŏk 1 triệu 800 rơ bâu hlak. Bơ ngai tăh hla hơ mĕng trong tơ lĕch âu đei Kuôk hô̆i pơ drơ̆ng kiơ̆ vă hơ met pơ ‘lơ̆ng iŏk yua, vă kơ đe sơ đơ̆ng jơ hngơ̆m bơ̆ jang, jang đang ‘lơ̆ng hơ năp jang đei pơ jao: “Tơ dăh pơm kiơ̆ hơ tŏk jên khei ‘măng âu gô pơm trong jang sơ đơ̆ng tơ drong arih sa kơ kang ƀô̆, bơ ngai jang teh đak păng bơ ngai pơ dơh hưu, tơ ƀôh tơ drong hơ tŏk tơ iung teh đak. Mă lei, tơ drong găh mŭk drăm vă pơm kiơ̆ hơ tŏk jên khei hăm sơ đơ̆ng ưh? ‘meh vă hơ tŏk jên khei ‘noh ‘meh vă trŏ ƀlep đơ̆ng kon pơ lei”.

Bơ ngai tăh hla apĭnh Khŭl kơ dră teh đak tơ chĕng hơ len vă đei trong jang hơ drô̆ hăm tơ drong sek phak dôm tơ drong pơm glăi mưh pơm kiơ̆ dôm trong jang  kăl lơ̆m tang găn jĭ tơ Covid-19. Hơ dai hăm ‘noh jĭ hơ nơ̆ng hơ tŏk loi dơ̆ng tơ drong jang dăr hơ len păng sek phak pơm glăi. Yua kơ tơ drong pơm glăi, pơm yoch khôi luơ̆t lơ̆m tơ drong jang tang găn jĭ hơ buh oei đei ƀôh mơ mat tat; pơ ‘nhŏ jên, tơ mam ăn anih jang pơ gang; mă loi ‘noh kăl kơ đei trong jang tơ gŭm gĭt kăl, mă lăp, sơng iŏk, hơ tŏk tơ iung bơ ngai jang kang ƀô̆, bơ ngai jang kơ anih jang pơ gang; jăh sơ đơ̆ng jơ hngơ̆m đon kang ƀô̆ jang pơ gang lơ̆m khei ‘năr đei lơ bơ ngai đei sek phak ki luơ̆t, sek phak kron.