Lui păng hơmĕng ‘nŏh jĭ jơhngâm đon atŭm đơ̆ng lơ bơngai tăh hla mưh răp mơ̆ng, lăng ‘măng hop akŏm mă 5, Kuô̆k hô̆i jăl 15 hăm tơdrong Kuô̆k hô̆i pơma nuh găh lơ tơdrong gĭt kăl nhen: pơdrơ̆ng nơ̆r ăn 08 kơ luơ̆t, 03 tơdrong tơchơ̆t păng tơgop nơ̆r ăn 09 kơ luơ̆t. Lơ̆m nŏh Luơ̆t Tĕh (oei chih hơmet) hơnơ̆ng đei Kuô̆k hô̆i tơgop nơ̆r ‘măng mă 2. Truh dang ei, đơ̆ng rŏng chă iŏk nơ̆r tơgop đơ̆ng kon pơlei, Luơ̆t ‘nâu oei đei lơ nơ̆r pơma pha ra băl găh jên hu ƀơm truh tơ̆ tĕh păng tơdrong iŏk pơdreu tĕh.

Nơ̆r pơma đơ̆ng bơngai tăh hla hơmĕng: “Luơ̆t tĕh ƀơm truh tơdrong iŏk pơdreu tĕh păng kơjă tĕh. Tơdrong iŏk pơdreu tĕh mă ưh đei chih hơdăh kơjă tĕh kư̆ iŏk pơdreu tĕh hloi đĕch. Chĕng hơmet tĕh athei bơ̆ jang mă tơpăt ‘lơ̆ng. Tơdăh glăi ‘nŏh athei sek ki luơ̆t mă trăp, yoa găh rŏng sư pơm pơrăm ăn tĕh đak tôch dêh”.

‘Măng hop akŏm mă 5 đei pơgơ̆r ƀât mă tơdrong jang mŭk drăm lơ̆m tĕh đak oei dơ̆ng tơ̆ hơnăp lơ tơdrong nol, mưh tơdrong jang tŏk mŭk drăm lơ̆m jăl khei mă 1 lăp đei 3,32%, dôm anih jang kơmăy păng tĕch mơdro tơ̆ tĕh đak đe tơm lơ̆m tĕh đak bơ̆n jang xa jur lơ, ƀât lăp ưh kơ kĕ tŏk, ăn ƀôh tơdrong vă jang tŏk đei nhen nơ̆r hơgăt lơ̆m sơnăm ‘nŏh tôch pơmat tat. Bơngai tăh hla păng kon pơlei hơmĕng dôm bơngai tang măt Kuô̆k hô̆i hơtŏk jơhngâm jang tơnăp, đon rơgei, vang pơma nuh, tơƀôh trong jang vă chă đei trong sek tơlang ‘lơ̆ng hlŏh, hơmet pơ ‘lơ̆ng tơdrong pơma tat ăn tơdrong jang mŭk drăm, khŏm jang đei tơdrong hơgăt jang tŏk 6,5% lơ̆m sơnăm.

Phŏ Kơdră Kuô̆k hô̆i Trần Quang Phương akhan: “Ưh kơ sĭ truh jăl khei mă 1 sơnăm ‘nâu GDP jur ưh ê đơ̆ng 8,2% jur 3,3% mă hơtuch jăl khei mă 3, ƀât blŭng jăl khei mă 4 sơnăm sơ̆ đĭ ƀôh vă jur bơih. Tơdrong ‘nâu hlôi đei lăng ƀôh, vă chih tơbăt trŏ tơdrong jur dêh đơ̆ng 8,2 jur pă 3,3. Yoa thoi nŏh, athei tơblang hơdăh dôm tơdrong ưh tam mă pran ‘lơ̆ng mă lăp, kơjăp ‘lơ̆ng păng tôm tĕch ƀiơ̆".

Mĭnh tơdrong kŭm đei tơrĕk tôch dêh lơ̆m hop akŏm âu, ‘nŏh jĭ Kuô̆k hô̆i dăr lăng tơdrong krao hơvơn, mong akŏm, vei lăng păng iŏk yoa jên, tơmam pơyoa ăn tơdrong jang tang găn jĭ Covid-19. Lơ̆m hla ar chih tơroi đơ̆ng khul dăr lăng ăn ƀôh, tơdrong hơgăt chih nơ̆r pơtho răt tơmam pơgang oei ưh jăh hơmet ming, jing đei đon krê hơmơt, ưh pơ̆n jang hli glăi đơ̆ng rŏng đei lơ tơdrong glăi mưh bơ̆ jang.

Kiơ̆ bơngai tang măt Phạm Khánh Phong Lan, khul plt Hồ Chí Minh: tơdrong jĭ nhen thoi tơdrong pơ long năng hăm anih jang pơgang păng kon pơlei ‘nŏh jĭ bơngai pŭ răm dêh hlŏh: “Inh lăp hăm tơdrong glăi ‘nŏh bơ̆n athei tơjră, mă lei kŭm nhen thoi hơmet ăn bơngai jĭ, athei pơm ‘lơ̆ng hơnơ̆ng kơplăh vei lăng hơkâu jăn, ‘me ăn đe sŏng xa, vă đe kĕ chĭu hăm dôm trong hơmet. Kơdih kâu inh lơ̆m lơ̆m anih, nhôn băt hơdăh tơdrong 'nâu. Inh drơ̆ng hăm tơdrong mưh glăi 'nŏh athei sek tơlang, mă lei kŭm athei set hơlen lăng kiơ̆ rim tơdrong thoi yơ păng athei lăng hăm jơhngâm đon 'lơ̆ng ƀiơ̆”.

Hop akŏm mă 5, Kuô̆k hô̆i jăl 15 đei đơ̆ng rŏng kơ Hop akŏm tŏk bŏk jăl jang đơ̆ng Khul kơdră chĕp kơ̆l Trung ương ‘nao tôch. Trung ương athei hơnơ̆ng hơtŏk ming, bơ̆ jang mă ‘lơ̆ng hlŏh dơ̆ng tơdrong pơjing, hơmet ming Đảng păng rim anih jang chinh trĭ mă rơgŏh, pran kơjăp, mă loi jĭ hăm anih jang kiơ̆ luơ̆t, anih tơkêng sek tơlang.

Bơngai tăh hla Nguyễn Thị Báo, tơ̆ kuơ̆n Cầu Giấy, Hà Nội athei jang ‘lơ̆ng tơdrong tơjră hŭt pơđĭ đon tơchĕng ưh lăp, ‘mĕh kơdŭn tơ̆ rŏng, tơtŭn ăn bơngai nai jang hăm mĭnh kơsô̆ kăn ƀô̆: “Bơ̆n “tang găn” dôm đon tơchĕng ‘mĕh kơdŭn tơ̆ rŏng, jang ưh ‘lơ ‘lŏ, hli pŭ hơnăp jang mưh pơm glăi, ưh pơ̆n jang, ưh pơ̆n tơjră hăm hơnăp jang. 1 ‘nu kăn ƀô̆ chĕp kơ̆l vei lăng, 1 ‘nu đảng viên tơpăt ‘lơ̆ng ưh đei lai yơ kơdŭn hăm rim tơdrong pơmat tat, athei đei đon adrin vă năm truh tôch trong kiơ̆ hơnăp jang, jô̆ hloi athei hŭt lê̆ tơdrong đei yoa ăn kơdih”.

Pơgơ̆r ƀât mă tơdrong jang mŭk drăm tĕh đak bơ̆n oei dơ̆ng tơ̆ hơnăp lơ tơdrong nol, bơngai tăh hla păng kon pơlei hơmĕng dôm bơngai tang măt Kuô̆k hô̆i tơiung hơnăp jang, đon rơgei, vang pơma nuh, adrin tơlĕch đei trong jang ‘lơ̆ng hlŏh vă hơmet tơdrong pơmat tat ăn tơdrong jang mŭk drăm, bơ̆ jang đei dôm tơdrong jang mŭk drăm, tơpôl đei Kuô̆k hô̆i tơlĕch ăn sơnăm 2023, pơjing hơyak tŏk pran kơjăp vă jang kĕh dôm tơdrong jang đei tơlĕch đơ̆ng sơ 2021 - 2025.