VOV4.Bahnar - Pơ gê ‘năr 27/9, Anih chĕp kơ̆l Kuôk hô̆i pơ gơ̆r Hop akŏm tơ lĕch Tơ drong jang dăr hơ len đơ̆ng Kuôk hô̆i sơ năm 2023. Hop akŏm hơ len lăng, lơ̆m khei ‘năr âu ki, tơ drong jang dăr hơ len đơ̆ng Kuôk hô̆i hlôi đei hơ tŏk loi dơ̆ng păng tơ drong tơ plih, roi ‘năr roi hơ tŏk ‘lơ̆ng đei yua, iŏk đei jơ nei gĭt kăl. Tơ drong dăr hơ len đei Kuôk hô̆i rơ̆ih iŏk tơ jê̆ hăm tơ drong yan âu hơ tŏk tơ iung kơ teh đak, akŏm lơ̆m dôm tơ drong tih, gĭt kăl dăh mă ưh kơ hiôk đơ̆ng tơ drong arih sa.

Kơ dră Kuôk hô̆i Vương Đình Huệ pơ ma pơ tôch hop akŏm

Pơ tôch hop akŏm, Kơ dră Kuôk hô̆i Quốc hội Vương Đình Huệ athei, dôm anih jang kơ Kuôk hô̆i, anih jang kơ pal băt hơ dăh tơ drong hơ tŏk iŏk yua tơ drong jang dăr hơ len ‘noh jĭ 1 tơ drong tơm gĭt kăl, tơ drong kăl lơ̆m kơ plăh tơ plih ‘nao bơ̆ jang đơ̆ng Kuôk hô̆i kiơ̆ trong jang đơ̆ng Đảng găh pơ jing teh đak chĕp kơ̆l pơ gơ̆r kiơ̆ Xã hội chủ nghĩa kơ kon pơ lei, yua đơ̆ng kon pơ lei, yua kơ kon pơ lei.

VOV - Thuem: Tơ blơ̆