Đơ̆ng sơnăm 2009 truh dang ei, Teh đak hlôi pơgơ̆r 9 ‘măng asong bơngai pơnă brŏk hrôih ƀlep ƀơ̆t năr gĭt kăl, năr lêh tih kơ teh đak, asong brŏk hrôih ăn kơ hloh 92 rơbâu ‘nu bơngai pơnă đei hơmet ming, bơ̆jang, hŏk pơhrăm ‘lơ̆ng vih hơlơ̆k hăm kon pơlei, tơpôl. Sơnăm ‘nâu, kiơ̆ athei đơ̆ng Khŭl kơdră teh đak, Kơdră teh đak Tô Lâm hlôi kĭ Tơchơ̆t asong brŏk hrôih ăn bơngai pơnă sơnăm 2024 ƀlep ƀơ̆t tơbăt 79 sơnăm Quốc khánh păng 70 sơnăm Năr Rơngei Anih tơm.

Bơngai đei ăn brŏk hrôih ‘noh: bơngai tŏk bŏk pơm kiơ̆ trong phak oei lơ̆m hnam pơnă đei khei ‘năr pơkăp, bơngai đei sek tơlang phak oei lơ̆m hnam pơnă truh đĭ chăl hơrih hlôi đei tơ jur phak đei khei ‘năr pơkăp, bơngai tŏk bŏk đei athei pơm kiơ̆ phak kron lơ̆m hnam pơnă. Tơdrong tơchơ̆t âu kŭm tơroi rơđăh dôm tơdrong kăl vă đei asong brŏk hrôih ăn kơ rim grŭp bơngai.