VOV4.Bahnar - Năr 4/4, tơ̆ pơlei tơm Cần Thơ, Dơnŏ anĭh bơ̆ jang kơdră tang măt hlôi pơgơ̆r hop akŏm “Trong jang dăr lăng ‘măn ăn bơngai tang măt kon pơlei” ăn rim Kơdră tang măt Kuôk hô̆i jăl XV, tang măt ăn Khŭl kơdră Jơnum vei lăng kon pơlei, rim bơngai jang chĭh tơbăt, bơngai jang tơgŭm, kang ƀô̆ mĭnh ƀar Hơnĭh jang Khŭl Kơdră tang măt Kuô̆k hô̆i păng Jơnŭm vei lăng kon pơlei rim dêh char, pơlei tơm găh Pơbăh. Ƀok Trần Thanh Mẫn, Kơ iĕng Kơdră Dơnŏ anih chĕp pơgơ̆r Kuô̆k hô̆i vang năm hop akom păng pơrô̆ hop akŏm. Hop akŏm vă tơbăt ăn kơdră tang măt trong jang dăr lăng, rim tơdrong kăl hlŏh ăn bơ̆ jang dăr lăng nhen: Tơdrong hơlen hơdăh kơtơ̆ng ang, trong apĭnh, trong jang lăng hơlen, trong jang tơgŭm ăn bơ̆ jang dăr lăng ‘măn ăn khŭl jang tơgŭm lơ̆m hơnĭh bơ̆ jang tang măt kon pơlei. Hop akŏm ‘măng mă au đei tơklăh 2 lăm, mă mĭnh ‘măn ăn rim kơdră tang măt Kuô̆k hô̆i păng kơdră tang măt Khŭl kơdră chĕp pơgơ̆r Jơnŭm vei lăng kon pơlei. Trŭh dang ei, Dơnŏ anĭh bơ̆ jang kơdră tang măt hlôi pơgơ̆r 4 ‘măng hop akŏm pơtho tơbăt ăn kơdră tang măt ăn Kuô̆k hô̆i păng kơdră tang măt Jơnŭm vei lăng kon pơlei tơ̆ rim dêh char, pơlei tơm Hà Nội, Huế păng Tuyên Quang.

Tơblơ̆ nơ̆r: Amazưt