Oei tơ til trong sơlam Việt nam- Campuchia, 2 xăh Mỹ Quý Đông păng Mỹ Quý Tây đei lăng jĭ hơnih tơ tŏ găh tơdrong pơm văn ƀai, ƀĕng ƀŏng, tơtông klĕ, ba bơngai klĕch tơring sơlam pơm bơ̆n văn ƀai, ƀĕng ƀŏng. Tơ̆ hơ năp tơdrong ‘noh, sơnăm 2012, Kơđông lĭnh vei lăng ‘măng jang sơlam Mỹ Quý Tây hlôi jang hơdai hăm Anih pơgơ̆r khŭl linh, kŏng an apŭng Đức Huệ păng khŭl kơdră chĕp kơ̆l 2 xăh tơlĕch jang tơdrong jang “ Jơva teng teng tơring sơlam”, tơdrong jang đei pơjing hlôi đei tơpôl kon pơlei đĭ jơhngơ̆m jang kiơ̆ păng ling lang pơgơ̆r roi tơbăt ăn khŭl linh vei lăng tơring sơlam mưh đei tơdrong đei ƀôh. Trung tá Cao Xuân Hiền  Chính trị viên, Kơ đông linh vei lăng ‘măng jang sơlam Mỹ Quý Tây, Ƀô̆ đô̆i vei lăng tơring sơlam dêh char  Long An tơbăt:

Kiơ̆ đơ̆ng tơdrong jang tơroi tơbăt krao hơvơn ‘noh kon pơlei hlôh băt jrŭ ‘lơ̆ng đơ̆ng tơdrong jang “Jơva teng neng tơring sơlam”. Đơ̆ng hlôh băt ‘noh kon pơlei hlôi hơdrin jang kiơ̆ hơdai hăm ƀô̆ đô̆i vei lăng tơring sơlam păng dôm khŭl linh nai vang jang tôch kơ đei yua tơdrong jang “Jơva teng neng tơring sơlam”. Jô̆ đơ̆ng tơlĕch jang truh dang ei tơdrong sơđơ̆ng lơ̆m tơring đei vei kơjăp, dôm tơdrong et tơdrô hơlăk, pơm bơ̆n văn ƀai, ƀĕng ƀŏng, tơteh băl tơjur hloi.

Ƀơ̆t pơtơm tơlĕch jang tơdrong jang, kang ƀô̆ kơđông lĭnh vei lăng tơring sơlam hlôi pơtho ăn kon pơlei trong teh teng neng kiơ̆ tơdrong pơkăp hơdrô̆, pơgơ̆r pơtâp dôm tơdrong đei ƀôh vă kon pơlei păng dôm khŭl linh kơpal jang kiơ̆ ƀlep trong jang tơlĕch ăn. Kiơ̆ đơ̆ng pơtâp kon pơlei băt đei jơva teng neng re lơ liơ ‘noh tơroi ŭnh sa, đôh, teng neng re lơ liơ ‘noh pơm ưh kơ sơđơ̆ng dăh mă tơtông klĕ vă hơnhăk ba tơmam kăl mưh vang hơmet pơ ‘lơ̆ng. Ƀok Võ Văn Bình oei tơ̆ ấp 3,  xăh Mỹ Quý Đông, apŭng Đức Huệ, dêh char Long An tơbăt:

Đĭ đăng dôm tơdrong đei ƀôh lơ̆m tơring ‘noh đei kon pơlei tơgŭm. Mă hơdăh ‘noh jĭ mưh đei tơdrong đei ƀôh tơ̆ ŭnh hnam âu to ‘noh teng neng ‘noh teh re vă kon pơlei akŏm hơdai vă tơgŭm ŭnh hnam. Đang kơ ‘noh tơdrong jang hơdai đơ̆ng kon pơlei hăm khŭl kơdră tơring hăm kơđông lĭnh vei lăng sơlam tôch kơjăp.

Oei tơ̆ tơring 2 xăh oei lơ mơmat tat, lơ kon pơlei ƀônh kơ đei bơngai kơnê̆ pơhlŭ tơgŭm ăn khŭl pơm glăi, yua thoi noh Kơđông linh vei lăng tơring sơlam Mỹ Quý Tây hơnơ̆ng jang hơdai hăm khŭl linh kŏng an, khŭl linh tơring pơgơ̆r tơroi tơbăt krao hơvơn kon pơlei vang jang vei lăng trong sơlam, jrăng sơlam păng vei lăng sơđơ̆ng kueng ƀôt, vei lăng sơ đơ̆ng teh đak. Trŭh dang ei vă đĭ đăng dôm ŭnh hnam đei teh choh jang sa hơdral hăm teh đak buăl Campuchia tă kơ pơm hla ar vei lăng hơ nih jrăng sơlam hơdral hăm teh chŭn mir hnam kơ dih, đơ̆ng noh tơdrong sơđơ̆ng tơring sơlam ƀrư̆ ƀrư̆ đei sơđơ̆ng, pơm glăi khôi luơ̆t hlôi tơjur rơ đăh hloi.

Hăm kon pơlei tơ̆ âu, kang ƀô̆, khul linh Kơ đông vei sơ lam Mỹ Quý Tây dang ei hlôi jing dôm bơngai joăt kơ ŭnh hnam. Kŭm yua thoi noh, ƀơ̆t trong jang ƀlep đơ̆ng ƀô̆ đô̆i vei lăng sơlam đei pơjing đei kon pơlei lăp đon jang kiơ̆ păng đĭ jơhngơ̆m kŭm hăm rim khŭl linh vei lăng tơring sơlam, vei kơjăp sơ đơ̆ng tơdrong pơm tơm teh đak. Pơjing trong sơlam Việt nam- Campuchia rơngei, hơtŏk tơiung.