Giàng Pằng jĭ pơlei tôch pơmat tat, hơtăih kơ xăh Sùng Đô, apŭng Văn Chấn dang 30 km. Oei kơpal kông, ưh đei unh điên, ưh đei hơyuh điên thoăi, trong yak tôch mơmat, kơna kon pơlei tơ̆ âu ưh iŏk đei lơ nơ̆r roi tơbăt, mă loi jĭ dôm tơdrong ƀơm truh trong jang, tơdrong tơgŭm păng khôi luơ̆t tĕh đak. Kơlih thoi nŏh, kăn ƀô̆ xăh athei hơnơ̆ng tŏk tơ̆ pơlei, năm truh rim unh hnam vă roi tơbăt trong jang đơ̆ng Đảng, khôi luơ̆t tĕh đak, atŭm hăm ‘nŏh hơlen năng tơdrong ‘mĕh vă tơ̆ yăn âu đơ̆ng kon pơlei, vă đei nơ̆r pơma, apinh tơtom hăm anih jang kơpal vă gơ̆h tơlĕch đei dôm trong jang lăp ‘lơ̆ng, tơgŭm ăn kon pơlei pơm hơtŏk tơdrong arih xa.

Truh đĭ sơnăm 2022 âu ki, kiơ̆ tơdrong tơgŭm đơ̆ng Tơdrong jang tơm kơ tĕh đak atŏk tơiung mŭk drăm, tơpôl tơ̆ tơring kon kông păng groi kông, mih ma duch nă tơ̆ plei Giàng Pằng đei tơgŭm ăn kơthŭng mong đak, kơmăy pơyoa ăn choh jang xa. ‘Nhŏng Giàng A Trư, tơ̆ plei Giàng Pằng, xăh Sùng Đô chơt hơiă tơroi: “Dang ei đei kơthŭng mong đak măh ăn unh hnam yoa, ưh pă đei ưh kơmăh đak nhen adrol sơ̆ bơih. Adrol sơ̆, tam mă đei kơthŭng mong đak ‘nŏh hơnơ̆ng ưh kơmăh đak lơ̆m pơyan phang, đak yoa lơ̆m unh hnam tơtă năm sŏ đơ̆ng hơla thong đak ngăl.”

Ƀok Giàng A Lứ, Phŏ Kơdră vei lăng kon pơlei xăh Sùng Đô, apŭng Văn Chấn tơroi dơ̆ng: “Dôm tơdrong jang tơm kơ tĕh đak tôch đei yoa, ‘ngoăih kơ thŭng mong đak oei tơgŭm hloi kơmăy pơyoa ăn choh jang xa, tơgŭm ăn dôm unh hnam tơnuh pơmat tat, mưh choh jang xa sư kŭm roi hiôk hian ƀiơ̆.”

Tơroi tơbăt, krao hơvơn kon pơlei tơ̆ tơring groi kông lê̆ kơ iŏk unh om hrôih păng oei băl hơgăm ‘nŏh jĭ 1 lơ̆m dôm tơdrong jang đei Khul kơdră pơgơ̆r dôm tơring groi kông tơ̆ Yên Bái tôch tơrĕk. Yă Sùng Thị Xía, Phŏ Kơdră vei lăng kon pơlei xăh Suối Bu, apŭng Văn Chấn, dêh char Yên Bái tơroi, ‘nâu jĭ tơdrong jang ưh kơ đei ƀônh kiơ yoa đon hlôh vao đơ̆ng kon pơlei găh khôi luơ̆t tam mă tôm: “Tơdăh lăp tơroi hăm panô, áp phích chô̆ hơtol tơ̆ ‘ngoăih ‘nŏh dai tôch pơmat tat, kơna mưh hơmet ăn tơdrong tơroi tơbăt, nhôn athei tơlĕch lơ trong jang. Mưh roi tơbăt tơdăh yoa nơ̆r yoăn ‘nŏh kon pơlei ưh kơ hlôh ‘năi kơna athei roi tơƀôh hăm nơ̆r kon kông dơ̆ng.”

Mŏ Lầu Thị Mỷ, tơ̆ plei Bu Cao, xăh Suối Bu tơroi, ŏh drŏ kăn inh sơnăm ‘nâu ‘nao 14 sơnăm. Tơdrong arih xa lơ̆m unh hnam tôch pơmat tat, ƀă lôch hơchăng, mĕ ‘nŏh jĭ jăn, păn hnong, nhen đe ŏh drŏ kăn bơngai Mông nai mơ̆n, sư ‘mĕh chă klo hrôih ‘năi. Băt tơdrong arih xa pơma tat lơ̆m unh hnam, lơ bơngai jang roi tơbăt đơ̆ng xăh Suối Bu năm tơ̆ hnam tơblang tơƀôh: “Đơ̆ng rŏng kơ mơ̆ng kăn ƀô̆ năm tơ̆ hnam roi tơbăt tơdrong ưh ‘lơ̆ng đơ̆ng iŏk unh om hrôih, ƀât lăp tơhli vă phak jên, ‘nŏh unh hnam nhôn pơlung ŏh năm hŏk dơ̆ng, pơkăp ưh ăn ŏh chă klo hơdrol kơ 18 sơnăm.”

Bơ̆ jang tơdrong jang tơm kơ tĕh đak atŏk tơiung mŭk drăm, tơpôl tơ̆ tơring kon kông păng groi kông đơ̆ng 2021-2025, dêh char Yên Bái dang ei đei 10 tơdrong jang tih, 14 tơdrong jang iĕ păng 36 tơdrong jang nai oei tơlĕch jang hăm kơsô̆ jên vă jê̆ truh 1.200 ti. ‘Ngoăih kơ tơlĕch jên man anih jang, pơm trong, dôm tơdrong jang oei tơgŭm kơmăy choh jang, tơđăh ‘long, kon yŏng, pơtho tơdrong jang, chă tơdrong jang, tơgop ăn tơdrong jang atŏk tơiung mŭk drăm, tơpôl, tơjur tơnuh hin hrĕnh, kơjăp ‘lơ̆ng ăn tơring kon kông. 

Mŏ Mùa Thị Máy tơ̆ plei Háng Sung, xăh Mồ Dề, apŭng Mù Cang Chải tơroi: "Dôm tơdrong jang ưh lăp pơm tơplih găh trong jang xa, atŏk tơiung mŭk drăm lơ̆m hnam đĕch mă oei pơm tơplih đon tơchĕng ăn kon pơlei tơ̆ tơring groi kông hai: “Kon pơlei nhôn, mă loi jĭ đe mŏ ŏh lơ̆m pơlei rong kon tơrong, hơnhăk iŏk yoa kơjăp ăn unh hnam, vang tơgop sut pơđĭ pơngot, tơjur tơnuh hin.”

Ƀok Đỗ Quang Vịnh, Phŏ Kơdră Anih vei lăng hơdrĕch kon kông dêh char Yên Bái tơroi: Khei ‘năr âu ki, Anih jang hơdoi hăm dôm apŭng, thĭ xăh lơ̆m dêh char pơgơ̆r pơih lơ lăm pơtâp pơhrăm “Hơtŏk đon hlôh vao tơpôl păng kăn ƀô̆ bơ̆ jang tơ̆ jơ̆p tơring găh tơdrong jang tơm kơ tĕh đak atŏk tơiung mŭk drăm tơpôl tơ̆ tơring kon kông păng groi kông” ăn đe Bí thư pơlei, đe ƀok pơgơ̆r pơlei, bơngai vei lăng khul grŭp păng tơpôl, vă kăn ƀô̆ tơ̆ tơring păng kon pơlei hlôh vao, bơ̆ jang, iŏk yoa xa hơpăh trŏ hăm tơdrong tơgŭm.

Ƀok Đỗ Quang Vịnh pơma: “Anih nhôn vang jang hơdoi hăm dôm anih jang kơpal, krao akŏm khul grŭp, tơlĕch jang hơdai dôm tơdrong jang tơm pơm thoi yơ vă huei hơdrom băl mưh pơgơ̆r bơ̆ jang. Hăm tơring, mă loi jĭ dôm tơring đei xa yoa đơ̆ng dôm tơdrong tơgŭm ‘nŏh mưh bơ̆ jang athei bơ̆ jang mă tơpăt ‘lơ̆ng, rơđăh rơđong, trŏ bơngai, trŏ tơring vă tơdrong tơgŭm gơ̆h truh hăm kon pơlei.

Hơnhăk tơdrong tơgŭm mât lơ̆m tơdrong arih xa, pơm hơtŏk đon hlôh vao ăn kon pơlei, vă gơ̆h drơ̆ng 1 nơ̆r lơ̆m tơpôl, mă loi jĭ tơ̆ dôm tơring kon kông oei xa, dêh char Yên Bái oei adrin jang kĕh tơdrong jang tơm atŏk tơiung pran kơjăp, "rơgŏh 'lơ̆ng, đei yoa păng arih xa hiôk chơt”.