Tân Hòa jĭ xăh jang chŭn mir ngăl, đei trong tơlĕch jang hơtŏk tơiung mŭk drăm tơm ‘noh jĭ pơtăm ‘long kăp gĭt, ƀa hơƀo hơdai hăm pơtăm hơ lam ‘long sa plei. Truh dang ei, trong tơlĕch jang âu hlôi đei jang ‘lơ̆ng hăm dôm  pơgar pơtăm kam, kuich, krô̆i, pơ ŏ kiơ̆ trong VietGAP, gơh tĕch tơ̆ teh đak đe; hơdai hăm tŭn pran iŏk yua khoa hŏk ki thuơ̆t lơ̆m choh pơtăm. Dôm sơnăm hơdrol, tơdrong ‘lơ̆ng pơtăm ‘long sa plei tơ̆ xăh đei pơgăn yua ưh kơ măh đak lơ̆m pơyan tŏ, mă lei tơdrong ‘nâu hlôi đei hơmet pơ ‘lơ̆ng. Ƀok Ngô Xuân Nam, phŏ Kơdră Anih vei lăng kon pơlei xăh Tân Hoà, apŭng Buôn Đôn tơbăt: “ Pơm tơlĕch choh jang sa đei tơdrong tơmơ̆t jên jang bơngơ̆t truh đơ̆ng rim kơdră lơ̆m khei ‘năr âu ki vei sơđơ̆ng đak tơ ruih kơna iŏk yua, hơgăt teh hăm dôm kơ loăi ‘long pơtăm kŭm iŏk đei lơ.”

Kŭm kiơ̆ kơ dră chĕp kơ̆l xăh Tân Hoà, gơnang đơ̆ng tơplih ‘long pơtăm yak blŭng ăn iŏk yua ‘lơ̆ng kơna iŏk yua jô̆ păh lăp kơ̆l bơngai kơ xăh tŏk hrĕnh, đei 36 triệu hlak jên sơnăm 2022 yak hloh trong tơlĕch jang tơlĕch ăn 11%, tŏk 13,8% pơtêng hăm sơnăm 2021. ‘Nâu kŭm jing tơdrong vă Đảng bộ, khŭl kơdră, kon pơlei xăh Tân Hoà tŭn pran hơtŏk tơiung mŭk drăm tơ̆ hơnăp kơnh.

Kŭm hăm xăh Tân Hoà, dôm sơnăm tơ jê̆ âu um rup mŭk drăm tơ̆ xăh Ea Wer, apŭng Buôn Đôn kŭm roi ‘năr roi tơplih ‘lơ̆ng. Vă tơdrong arih sa kơ kon pơlei lơ̆m tơring hơtŏk tơiung, đảng bộ khŭl kơdră xăh hlôi bơngơ̆t truh tơgŭm ăn kon pơlei găh lơ ‘noh jĭ ŭnh hnam dơnuh hin, ŭnh hnam vă jê̆ dơnuh hin, ŭnh hnam đei tơdrong arih sa mơmat tat gơh tŏk iŏk jên đơ̆ng anih mong jên tơgŭm tơpôl păng dôm jên tơgep đơ̆ng dôm tơdrong jang tơm kơ teh đak. Lơ̆m noh đei jên đơ̆ng tơdrong jang tơ jur dơnuh hin kơjăp vă tơmơ̆t jên jang tơplih trong jang pơm tơlĕch, hơtŏk tơiung dôm kơ loăi ‘long pơtăm kon tơrong hơtŏk iŏk yua, ƀrư̆ ƀrư̆ klăih đơ̆ng dơnuh hin. Mŏ H’in Dy Niê, xăh Ea Wer, apŭng Buôn Đôn tơbăt: “Ĭnh iŏk đơ̆ng tŏk iŏk jên ŭnh hnam dơnuh hin ‘noh ĭnh yua kơ sô̆ jên ‘noh lơ̆m pơtăm cheh phe, răt phŏng, răt rơmo vă vei rong dang ei tơdrong arih sa dă ƀiơ̆ kơ gleh hrat păng sơđơ̆ng ƀiơ̆ bơih.”

Kiơ̆ kơ ƀok Y A Toan Ênuôl, Bí thư anih jang Đảng apŭng Buôn Đôn, vă pơtrŭt mŭk drăm tơpôl lơ̆m tơring hơtŏk tơiung, hơtŏk ‘lơ̆ng tơdrong arih sa ăn kon pơlei. Đảng bộ, khŭl kơdră apŭng oei lăng kăl hơvơn dôm jên tơmơ̆t jang vă hơtŏk tơiung trong nơnăm, dơnâu đak, ŭnh điên, hnam trưng hŏk. Hrei ‘nâu trong nơnăm tơ̆ apŭng Buôn Đôn pơm lăp đei nhen ‘meh vă năm vih vơ̆t, jang sa păng mơdro sa. Tơdrong ‘nâu tơgop lơ̆m hơtŏk tơiung atŭm kơ tơring. Sơnăm 2022, mŭk drăm tŏk kơ apŭng đei 8%, thu mong jên teh đak iŏk đei păng yak hloh tơdrong hơgăt tơlĕch ăn. Tơdrong jang pơjing tơring tơrang ‘nao đei bơngơ̆t truh pơgơ̆r, lơ̆m apŭng hlôi iŏk đei 90 tơdrong hơgăt, kơ sô̆ ŭnh hnam dơnuh hin jur pă 34%. Tơ̆ hơnăp kơnh, Đảng bộ, khŭl kơdră apŭng tơring sơlam Buôn Đôn hơnơ̆ng hơtŏk hơnăp jang chĕp kơ̆l, pơgơ̆r lơ̆m pơjing dôm tơdrong jang hơtŏk tơiung mŭk drăm lăp, iŏk jang tơmam drăm ‘lơ̆ng, tơdrong pran kơ tă anih vă pơ jing tơring sơlam pran kơjăp. Ƀok Y A Toan Ênuôl tơbăt: “Krao hơvơn kon pơlei bơ̆jang kiơ̆ dôm trong jang đơ̆ng đảng, tơdrong jang tơgŭm khôi luơ̆t đơ̆ng Teh đak. Vang hơdai hăm dôm anih jang kŭm nhen mặt trận khŭl tơpôl vă tŭn hrĕnh hơtŏk tơiung mŭk drăm tơpôl, vei sơđơ̆ng lơ̆m tơring kơ apŭng kŭm nhen kơ tơring sơlam.”

Gơh ƀôh gơnang đơ̆ng hơtŏk ‘lơ̆ng hơnăp jang chĕp kơ̆l đơ̆ng đảng păng hơvơn đei dôm jên tơmơ̆t jên jang, hơtŏk jơhngơ̆m pran tơgoăt 1 ƀơ̆r đon hơdrĕch hơdrŭng, kơdră đảng, kơdră tơring păng kon pơlei dôm hơdrĕch hơdrŭng apŭng sơlam Buôn Đôn tŏk bŏk 1 jơhngơ̆m đon yak hloh rim tơdrong mơmat tat, long nol, hơdrin pơjing tơring sơlam Dak Lak roi ‘năr roi pơdrŏng ‘lơ̆ng rŏ.