Tơ̆ Sơn La, dêh char đei hloh 1 triu 300.000 ‘nu kon pơlei, lơ̆m au kon kông tơmơ̆t 83%, hơnăp jang kơ khul kang ƀô̆ drŏ kăn bơngai kon kông hlôi yak hơdoi, vang iung jang kơtang hăm kơdră tơring đei ƀôh tôch hơdăh. Mă kăl hloh tơ̆ Sơn La ‘noh akŏm ăn hơtŏk tơ iung choh jang sa jang kiơ̆ kmăi kmŏk hơgei, choh jang sa rơgoh, choh jang sa tŭh mơ̆r. Bơngai drŏ kăn đei hơnăp jang kơtang lơ̆m rim tơdrong jang mă Sơn La tŏk bŏk tơlĕch jang. Ƀok Lưu Minh Quân, Kơdră chĕp pơgơ̆r Hơnih jang Pơrô̆ pơrôp kơ Đảng dêh char Sơn La tơbăt, dêh char hơnơ̆ng lăng ba kơjăp vei lăng năng tông ăn tơdrong bơ̆ jang kang ƀô̆, mă kăl kang ƀô̆ bơngai dro kăn.

Măt bơngai kang ƀô̆ drŏ kăn pơm kơdră tang măt Kuô̆k hô̆i, drŏ kăn tang măt Jơnŭm vei lăng kon pơlei, măt bơngai drŏ kăn iŏk jang kơdră chĕp pơgơ̆r đảng, măt bơngai drŏ kăn đei pôk tơmơ̆t jang đảng viên ... jei lơ hloh pơtêng hăm jăl hơdrol. Hơdrô̆ măt bơngai drŏ kăn đei tơmơ̆t pơm đảng viên lơ̆m blŭng jăl jang truh dang ei tơmơ̆t hloh 42% akŏp măt bơngai đảng viên ‘nao đei pôk tơmơ̆t. Tơbăt găh tơdrong bơ̆ jang hơtŏ hơnơ̆ng drŏ nglo drŏ kăn păng hơtŏk hơnih dơ̆ng kơ drŏ kăn tơ̆ tơring, ƀok Lưu Minh Quân tơbăt:“Tơdrong kăl hloh tơ̆ Sơn La ‘noh tơdrong chĕp pơgơ̆r, pơrô̆ jang vă atŏk kơtang bơ̆ jang tơgŭm djru drŏ kăn tơjur dơnuh kơjăp ‘lơ̆ng ‘moi kiơ̆ trong choh jang sa tơring. Sơn La ‘noh 1 lơ̆m 14 dêh char lơ̆m teh đak kĭ pơkăp hăm  Trung ương khul drŏ kăn jang kiơ̆ kmăi kmŏk lơ̆m vei lăng khul mong jên ăn tŏk iŏk vă atŏk kơtang jang ‘lơ̆ng lơ̆m dôm tơdrong jang hle. Sơn La jei hlôi tơlĕch jang kiơ̆ Tơdrong vă jang Tơgŭm djru drŏ kăn hŏk tơdrong jang, pơjing tơdrong jang ăn hloh 9.700 ‘nu pơmai oh. Hơtok kơtang rim tơdrong jang pơting dih băl tơ iung pơjing bơngai drŏ kăn Việt Nam lơ̆m chăl hle, vei kơjăp 651 trong jang, 2.818 ‘nu drŏ kăn ‘lơ̆ng hơ iă hloh hăm 1.292 ‘nu drŏ kăn iŏk đei hơnăn bơngai drŏ kăn Việt Nam lơ̆m chăl hle”.

Tơ̆ Lai Châu, kiơ̆ đơ̆ng ƀok Vũ Mạnh Hà, Kơdră jang lơ̆m Trung ương Đảng, Kơ iĕng Kơdră chĕp pơgơ̆r Đảng dêh char Lai Châu, dêh char Lai Châu hlôi lăng kơjăp truh hơnăp jang, hơnih dơ̆ng kơ bơngai drŏ kăn, bơ̆ jang vei lăng drŏ kăn păng tơdrong hơtŏ hơnơ̆ng drŏ nglo drŏ kăn. Lơ̆m au đei tơdrong Tơchơ̆t, dôm tơdrong tơchơ̆t găh atŏk tơ iung mŭk drăm tơring kon kông đei ƀơm kơtă tơ̆ đe drŏ kăn, hơ ioh tơring kon kông. Mă hơdăh, Hơnih Đảng dêh char Lai Châu hlôi pơjing Tơdrong tơchơ̆t 06 năr 15 khei 3 sơnăm 2021 găh atŏk kơtang bơ̆ jang ‘lơ̆ng khul kang ƀô̆ chĕp pơgơ̆r, vei lăng bơngai kon kông păng kang ƀô̆ tơm dơnơm rim tơring jăl jang 2021-2025, lăng truh sơnăm 2030; Nơ̆r athei jang kiơ̆ kơsô̆ 9/2021 kơ Khul kơdră chĕp pơgơ̆r Đảng dêh char găh atŏk kơtang chĕp pơgơ̆r đơ̆ng khul kơdră Đảng hăm tơdrong pơm dă ƀiơ̆ đei iŏk ŭnh om hrôih păng iŏk hơgăm; tơdrong vă jang tơgum djru drŏ kăn pơjing tơdrong jang; pơjing trong jang tơgum djru hăm bơngai drŏ kăn, tơdrong jang tơgŭm djru găh drŏ kăn hơnăp hơnhơl, vei lăng năng tông jơhngơ̆m jăn, ƀao hiêm jang pơgang, tang găn tơpŭ hơ ‘lơ̆p lơ, vei lăng tơdrong đei iŏk yua ‘lơ̆ng hơ iă kơ drŏ kăn tơ̆ hơnăp Khôi luơ̆t...“Trong jang Pơprŏ jang pơtho pơhrăm păng pơtho ming ăn kang ƀô̆ drŏ kăn hloh 5 sơnăm ‘nŏh hlôi đei jơnei mĭnh ƀar tơdrong: Mă blŭng, hơnăp jang păng tơdrong iung jang đơ̆ng Khul kơdră chĕp pơgơ̆r Đảng, kơdră chĕp pơgơ̆r tơring kơ pơđĭ tơpôl, lơ̆m au kơdih đe drŏ kăn găh hơnăp jang, hơnih dơ̆ng kơ đe drŏ kăn păng bơ̆ jang vei lăng drŏ kăn lơ̆m chăl hle đei lơ tơdrong tơplih hơ iă. Mă ƀar, găh tơdrong hơtŏ hơnơ̆ng drŏ nglo drŏ kăn lơ̆m tơdrong jang chinh trĭ, mŭk drăm, jŏh ayŏ oei sa tơpôl iŏk đei jơnei ‘lơ̆ng liĕm. Khul kang ƀô̆ drŏ kăn chĕp pơgơ̆r rim hơnih bơ̆ jang hlôi đei lơ, bơ̆ jang ‘lơ̆ng”.

Yă Tôn Thị Ngọc Hạnh, Kơ iĕng Kơdră chĕp pơgơ̆r Jơnŭm Khul drŏ kăn Việt Nam tơbăt, tơdrong iŏk đei jơnei lơ̆m bơ̆ jang vei lăng dro kăn, hlôi iŏk đei lơ tơdrong păng tơplih ƀôh hơdăh lơ̆m jơhngơ̆m đon tơchĕng. Hơnăp jang kơ rim hơnih jang, tơring lơ̆m khei năr au ki hlôi atŏk kơtang. Păng, đei lăng ba kơjăp, drŏ kăn roi năr roi bơ̆ jang ‘lơ̆ng hloh dơ̆ng lơ̆m rim tơdrong oei sa tơpôl, sơkơ̆t hơdăh tơdrong hơnăp jang, hơnih dơ̆ng păng jơhngơ̆m đon tơchăr, tơgop lơ̆m tơdrong iŏk đei jơnei kơ tơring adoi nhen lơ̆m teh đak. Mă lei, tơdrong chă lăng tim mă gan lăp dih băl lơ̆m drŏ nglo drŏ kăn dôm tơdrong tim mă hơtŏ dih băl lơ̆m oei sa, trong bơ̆ jang, oei đei pơm kơnê̆ truh tơdrong atŏk tơ iung kơ drŏ kăn. Hơnơ̆ng lăng ba kơjăp truh bơ̆ jang vei lăng năng tông drŏ kăn păng tơdrong jang kiơ̆ trong jang lơ̆m khul drŏ kăn lơ̆m jăl hrei au gô jing hơyak kăl pơm hơtŏ hơnih dơ̆ng kơ drŏ kăn adoi nhen jang kiơ̆ bơ̆ jang hơtŏ hơnơ̆ng drŏ nglo drŏ kăn lơ̆m rim tơdrong jang chinh trĭ, mŭk drăm jŏh ayŏ tơpôl. Yă Tôn Thị Ngọc Hạnh tơbăt:“Hăm tơdrong jang kiơ̆ trong bơ̆ jang vei lăng năng tông khul drŏ kăn kăl, mă blŭng hrei au rim trong jang khôi luơ̆t vă sơđơ̆ng ăn tơdrong pơm tơm kơdih kơ drŏ kăn roi năr roi dang, trong jang tơgŭm djru găh jang sa hơrih sa tơpôl hlôi đei tơlĕch jang tôm tong. Tơgŭm djru rim khul bơngai nhen drŏ kăn kon kông, drŏ kăn jo jăn, drŏ kăn đơ̆ng tơring nai mơ̆t oei, drŏ kăn ‘lŏ kră ... tơdrong yan au jang kiơ̆ păng pơtôch jang kiơ̆ trong jang tơgŭm djru oei đei lơ tơdrong kăl chă pơma dơnuh dih băl ‘mơ̆i”.

Pơtôch tơdrong jang vei lăng drŏ kăn lơ̆m khei năr au ki hlôi tơgŭm ăn sơkơ̆t hơdăh hơnăp jang gĭt kăl hlŏh kơ khul kang ƀô̆ drŏ kăn. Tơdrong jang kiơ̆ trong jang tơgŭm djru hăm rim khul drŏ kăn tơring găh tu khei năr au ki mĭnh ‘măng dơ̆ng sơkơ̆t hơdăh tơdrong lăng ba, pơrô̆ tơlĕch jang kơtang đơ̆ng kơdră đảng, tơdrong vang iung jang hrơ̆p mĭnh ‘măng đơ̆ng rim hơnih jang hăm bơ̆ jang vei lăng drŏ kăn; mă kăl ‘nŏh găh tơdrong iung jang, tơchăr hơ iă păng iung jang kiơ̆ tơtom hăm dôm tơdrong ‘meh vă yan au kơ rim tơdrong jang kơ Khul lơ̆m khei năr au kơnh.