‘Năr 6/9, tơ̆ plt Huế, Hnam hŏk Drŏ kăn Việt Nam pơgơ̆r Hop akŏm Khoa hŏk teh đak tơ̆ tơring Tŏk bŏk - Tây Nguyên bơ̆ jang kiơ̆ trong pơm hơtŏ băl kơplăh drŏ kăn hăm drŏ nglo tơ̆ tơring kon kông păng groi kông; pơlung, tơlĕch trong krao hơvơn, tơgŭm ăn drŏ kăn kon kông tơ̆ hơnăp dơ̆ng. Hop akŏm iŏk đei 70 ƀai chih đơ̆ng dôm bơngai tang măt păng chă rơih 39 ƀai chih vă hơmet ming, đăng lơ̆m hla ar chih kăl kơ hop akŏm.

Hơdai hăm tơdrong năng hơlen rim tơdrong kăl hăm đe drŏ kăn păng đe hơioh bơngai kon kông, tơring groi kông, hop akŏm oei chih iŏk dôm tơdrong vă tơlĕch jang, vang tang găn đei yoa ‘lơ̆ng kiơ̆ đơ̆ng Tơdrong jang 8 tơ̆ hơnăp kơnh. Tơdrong jang 8 jĭ 1 lơ̆m 10 tơdrong jang găh Tơdrong jang tơm kơ teh đak yoa Khul drŏ kăn Việt Nam pơgơ̆r, vei lăng păng bơ̆ jang. Dôm tơdrong jang akŏm găh roi tơbăt, krao hơvơn pơm tơplih đon jăm joă găh drŏ kăn drŏ nglo, pơjing păng pơih xă dôm tơdrong gơ̆h jang găh mŭk drăm ăn drŏ kăn... Đơ̆ng noh vang tơgop pơm hơtŏk hlŏh dơ̆ng tơdrong hơtŏ băl kơplăh drŏ kăn hăm drŏ nglo tơ̆ tơring.