Tơ̆ xăh Ia Krêl – tơring đei bơngai iŏk unh om hrôih lơ tơ̆ apŭng Đức Cơ, sơnăm 2022 đei 8 klo kăn oei băl hrôih. Lơ oh hŏk tro hŭt hŏk vă iŏk unh om, hăm lơ tơdrong ưh sơđơ̆ng tơ̆ hơnăp ning mônh.

Adrin găn dôm bơngai ‘mĕh iŏk unh om hrôih tơ̆ tơring, đơ̆ng blŭng sơnăm 2023 xăh Ia Krêl pơjing Khul pơgơ̆r jang, hăm tơdrong vang jang đơ̆ng anih jang chinh trĭ, hơtŏk tơdrong roi tơbăt vă kon pơlei hlôh vao tơdrong ưh kơ ‘lơ̆ng đơ̆ng iŏk unh om hrôih, oei băl ƀât mă tam mă tôm sơnăm ‘nŏh glăi khôi luơ̆t. Kiơ̆ đơ̆ng hơlen tơ̆ pơlei pơla, đơ̆ng blŭng sơnăm truh dang ei, xăh pơlung đei 7 ‘nu bơngai hŭt lê̆ đon tơchĕng ‘mĕh chă klo kăn hrôih, ƀât mă tam mă tôm sơnăm.

Bơ̆n vang mơ̆ng nơ̆r pơma đơ̆ng oh Rơ Chăm H’Thao – Xăh Ia Krêl, apŭng Đức Cơ đơ̆ng rŏng kơ oh hŭt lê̆ đon tơchĕng đơ̆ng kơdih, ‘mĕh chă klo hrôih, ƀât ŏh oei năm hŏk: “Kơtơ̆ng mih Chắt tơroi, Anih vei lăng kon pơlei năm tơƀâp đe bôl boăl chă unh om hrôih, măr nhi ƀă inh năm tơ̆ noh, ƀôh đe ma apinh yoa kiơ mă hăt chă klo hrôih. Mơ̆ng đang đe ma akhan, lê̆ hăt chă klo hrôih, iĕm oei ‘lơ̆p đĕch văi. Anih vei lăng kon pơlei roi tơƀôh thoi noh, inh mơ̆ng kiơ̆ nơ̆r đe sư kơna inh tơplih đon ưh đei chă klo hrôih, gô truh tôm sơnăm ‘mơ̆i na chă klo.”

Kiơ̆ ƀok Rơmah Chắt – Phŏ Kơdră vei lăng kon pơlei xăh Ia Krêl (apŭng Đức Cơ), tơdrong găn đei đe iŏk unh om hrôih dăh mă ưh ‘noh, ‘ngoăih kơ roi tơbăt hơnơ̆ng vă pơm tơplih đon kon pơlei ‘nŏh, tơdrong kăl dơ̆ng jĭ athei chă răp mơ̆ng, chih iŏk nơ̆r roi tơbăt mă tơtom đơ̆ng tơring hai. Kơlih thoi noh mă khul kăn ƀô̆ xăh Ia Krêl pơjao tơdrong jang tôch hơdăh ăn rim ƀok Pơgơ̆r pơlei, bơngai đei kon pơlei lui yom vă hơnơ̆ng hơlen năng, pơma nuh hăm dôm unh hnam đei kon hơ ‘lơ̆p păh iung, ƀônh kơ iŏk unh om hrôih.

Ƀok Rơmah Chắt, Phŏ Kơdră vei lăng kon pơlei xăh Ia Krêl ăn tơbăt: “Hơtŏk hơnăp jang đơ̆ng bơngai đei bưng ai, đei grih, đơ̆ng đe ƀok pơgơ̆r pơlei, bí thư đoàn, khul drŏ kăn tơ̆ pơlei, mưh iŏk đei nơ̆r tơroi đơ̆ng dôm khul âu, nhôn pơgơ̆r jur tơƀâp unh hnam, kŭm hăm dôm khul jang nai vang roi tơƀôh, pơlung đe sư vă đe sư băt tơdrong krê đơ̆ng iŏk unh om hrôih. Nhôn năm roi tơbăt tơƀâp lơ tơdrong pơmat tat, athei adrin mă đơ̆ng đe ưh chu pơma nuh, Khul pơgơ̆r jang oei tŏk tơ̆ hnam vă roi tơbăt, ‘măng mă 1, ‘măng mă 2 tam mă mơ̆ng ‘nŏh năm dơ̆ng ‘măng mă 3, roi tơbăt hơnơ̆ng klĕp truh lai yơ đe chu mơ̆ng.”

Drŏ kăn, hơiŏh drŏ kăn jĭ dôm bơngai pŭ răm dêh hlŏh đơ̆ng tơdrong iŏk unh om hrôih, yoa thoi nŏh pơm hơtŏk hơnăp jang, ƀơ̆r pơma đơ̆ng đe drŏ kăn kon kông vă pơm tơplih tơdrong arih xa ăn đe sư đei rim Khul drŏ kăn tôch tơrek.

Tơ̆ xăh Dun, apŭng Chư Sê, Grŭp “Drŏ kăn pơma ưh hăm tơdrong iŏk unh om hrôih” đei pơjing tơ̆ plei Greo Pết lơ̆m khei 4/2023 sơng đei hlŏh 30 ‘nu drŏ kăn vang akŏm. Grŭp đei hơnăp jang akŏm đe mŏ oh drŏ kăn vang pơm kiơ̆ nơ̆r tơbăt “Ưh đei iŏk unh om hrôih, ưh đei oei băl hơgăm”. Đơ̆ng grŭp ‘nâu, lơ bơngai ‘mĕh iŏk unh om hrôih đei roi tơƀôh, tơplih ming đon.

Mă loi jĭ tơdrong Grŭp “Đe hơdruh” plei Greo Pết, xăh Dun hlôi tơgŭm ăn lơ hơdruh Jrai truh jang lơ̆m Khul vă gơ̆h hlôh vao dôm tơdrong kăl găh iŏk unh om păng hnam tơnŏ, đơ̆ng noh tưk tơiung đei hơnăp jang đơ̆ng đe hơdruh kon kông lơ̆m tơdrong sut pơđĭ dôm tơdrong juăt ưh kơ ‘lơ̆ng, khŏm pơma ưh hăm tơdrong iŏk unh om hrôih vă gơ̆h đei tơdrong arih xa ‘lơ̆ng ƀiơ̆.

Oh Rah Lan H’Thu – Bơngai jang lơ̆m Grŭp “Đe hơdruh” xăh Dun, apŭng Chư Sê tơroi: “Oh ưh đei vă iŏk unh om hrôih ôh yoa sư glăi luơ̆t. Mưh Grŭp pơgơ̆r bơ̆ jang ‘nŏh oh adrin vang jang vă chă tơgŭm ăn bôl boăl pơmat tat.”

Tơroi truh tơdrong jang tơm đơ̆ng Grŭp “Đe hơdruh” xăh Dun, mŏ Rah Lan H’Nhum – Kơdră vei lăng Khul drŏ kăn xăh Dun, apŭng Chư Sê pơma: “Dôm bơngai tam mă tôm sơnăm iŏk unh om brei drâu, nhôn găn đei 4 ‘nu bơngai ‘mĕh oei băl hrôih, nhôn plăh găn, roi tơbăt, pơlung unh hnam lê̆ ăn kon hơ ‘lơ̆p iŏk unh om hrôih, mưh ăn kon mon chă klo hrôih sư ƀơm ưh ‘lơ̆ng truh jơhngâm pran kon hơ ‘lơ̆p păng pơm glăi khôi luơ̆t dơ̆ng.”

Găn đei 1 ‘nu bơngai vă chă klo kăn hrôih nhen lê̆ gô đei dơ̆ng 1 unh hnam huei huŏng lơ̆m tơdrong jĭ jăn, tơnuh hin hot, pơngot rơvĕt. ‘Nâu jĭ tơdrong adrin dar deh đơ̆ng dôm anih jang kơpal, khul grŭp tơpôl, tơring tơrang lơ̆m tơdrong roi tơbăt vă tơdrong iŏk unh om, huei jing tơdrong krê pơngơ̆t, mă jing tơdrong hiôk chơt, phĭ tơtŏ dơnŏ ‘lơ̆ng mưh brŏk oei hơdai 1 pôm hnam./.