Jơnŭm chĕp pơgơ̆r Tây Nguyên ‘nŏh Hơnih jang đei lơ hơnih bơ̆ jang vang jang kơ yuơ Thủ tướng Teh đak kĭ tơchơ̆t pơjing, bơ̆ jang chă tơchĕng hơlen, pơrô̆ jang, pơchoh trong, xek tơlang dôm tơdrong kăl kơ tơring, rim hơnih jang găh tơgoăt tơring, atok tơ iung kơjăp ‘lơ̆ng tơring Tây Nguyên.

Hop akŏm ‘măn lơ jơ ‘năr pơma dơnuh, hơlen rim trong tơlĕch jang atŏk tơ iung mŭk drăm-tơpôl tơring Tây Nguyên păng tơlĕch mĭnh ƀar trong bơ̆ jang kăl ăn tơring.

Hla bơar chih tơbăt tơdrong bơ̆ jang đơ̆ng Hơnih tơm Pơprŏ tơdrong jang păng Tơmơ̆t jên jang sơkơ̆t hơdăh: Tây Nguyên ‘nŏh tơring kăl hloh găh chinh trĭ, mŭk drăm, oei sa joh ayŏ, tơpôl, vei lăng sơđơ̆ng dơ̆ng kơjăp tơring, teh đak kơ pơ đĭ lơ̆m teh đak, tơring đei vă jê̆ 6 triu ‘nu bơngai găh 54 lơ̆m 54 hơdrĕch hơdrung hơrih sa. Tây Nguyên hlôi iŏk đei jơnei gĭt kăl nhen: GRDP jô̆ hơtŏ măt bơngai lơ̆m sơnăm 2022 lơ hlŏh 11 ‘măng pơtêng hăm sơnăm 2002,atŏk tơmam drăm lơ̆m tơring jô̆ hơtŏ jăl sơnăm 2002 - 2020 iŏk đei vă jê̆ 8% lơ̆m 1 sơnăm păng lơ hloh pơttêng hăm rim tơring ...; Mă lei, tơdrong jang mŭk drăm tơring Tây Nguyên oei tim mă pran kơtang, atŏk tơ iung tim mă tơgăl hăm dôm tơdrong đei, tơdrong rơvơn, nhen: GRDP jô̆ hơtŏ măt bơngai oei tŏ sĕt hloh lơ̆m 6 tơring jang mŭk drăm-tơpôl, tim mă đei dêh char ayơ pơjing kơ dih kon jên bơ̆ jang, hơvơn teh đak đe tơmơ̆t jên tim mă lơ, tơjur dơnuh tim mă kơjăp ‘lơ̆ng, ŭnh hnam dơnuh, vă jê̆ dơnuh oei lơ, hơmơt vih hơlơ̆k dơnuh dơ̆ng oei kơtang; tơdrong pơdrŏng dơnuh kơ hơdrĕch hơdrung au hơdrung to oei kơtang.

Tơdrong kon pơlei chă jăk mơ̆t oei tơ̆ Tây Nguyên roi năr roi kơtang; teh choh jang sa, teh oei kơ kon kông xek tơlang ăn hiơ hiơ̆. ‘Long hơyơ̆l teh tơjur kơtang păng jang ưh kơ keh đang trong tơlĕch jang; bri ‘long roi năr roi hiong răm lơ, tơdrong phang pơđang đei ƀôh ưh kơ tom băt. Lơ tơdrong oei sa joăt joe ‘lơ̆ng rŏ sơ̆ ki kơ hơdrĕch hơdrung tŏk bŏk dơ̆ng tơ̆ hơnăp tơdrong vă hiong hiơt, tim mă xek tơlang ‘lơ̆ng ƀar păh tơdrong vei răk tơƀăk mong păng atŏk tơ iung. Tơgoăt jang hơdoi lơ̆m tơring tim mă kơjăp, oei pơm pơ gia, tim mă trŏ lăp hăm tơdrong pơkoel ăn atŏk tơ iung…

Mĭnh tơdrong tŏk bok pơm ăn Lâm Đồng pơma hơdrô̆, rim dêh char Tây Nguyên pơma atŭm tôch kơ jĭ kơ̆l, ‘nŏh tơdrong vei lăng, iŏk yua teh đơ̆ng groi teh kơ mir đak lar tơƀơ̆p tơnap tap, pơm brăh brư cham char. Tơdrong mă au kăl đei tơdrong tơchơ̆t trŏ lăp hloh vă sek tơlang. Ƀok Trần Văn Hiệp, Kơdră chĕp pơgơ̆r Hơnih bơ̆ jang vei lăng kon pơlei dêh char Lâm Đồng tơbăt:“Teh đei tơngla đơ̆ng rim mir đak lar tơbăt ‘nŏh tŏk bŏk mơsuơ̆l mơsoăl lơ̆m tơdrong xek tơlang. Dang ei kon pơlei bơbĭt iŏk, pơm hnam oei, ăn mơng ưh kơ ƀlep tơdrong tơchơ̆t păng prăh prang. Tơdrong mă au kăl đei iung jang kơtang, xek tơlang lơ liơ mă ‘lơ̆ng păng hrơ̆p dih băl ƀar păh rim tơring 'nŏh kăl đei nơ̆r chă pơtho ăn đơ̆ng Hơnih tơm vei lăng Mŭk drăm bri brăh păng Cham char pơchoh trong ăn Khul kơdră chĕp pơgơ̆r teh đak, đơ̆ng noh Hơnih tơm Pơprŏ tơdrong jang păng Tơmơ̆t jên jang chă tơchĕng hơlen vang iung jang hloi vă nhôn xek tơlang keh đang tơdrong au, mă kăl ‘noh hăm dôm ŭnh hnam hlôi iŏk jang đơ̆ng sơ̆ truh dang ei”.

Jơnŭm chĕp pơgơ̆r tơring Tây Nguyên đei pơjing vă tơplih ‘nao trong jang chĕp pơgơ̆r tơring, pơtrŭt mŭk drăm-tơpôl kơ tơring atŏk tơ iung tĕnh koăng, kơjăp ‘lơ̆ng, vei lăng năng tông cham char păng vei lăng sơđơ̆ng dơ̆ng kơjăp teh đak-sơđơ̆ng tơring; Jĭ khul jang đei lơ hơnih bơ̆ jang vang iung jang vă iung jang dôm tơdrong bơ̆ jang tơgŭm Thủ tướng Teh đak chă tơchĕng hơlen, pơrô̆ jang, iung jang hơdoi, atŏk tơ iung kơjăp ‘lơ̆ng tơring Tây Nguyên. Tơdrong tơchơ̆t 23/NQ-TW năr 6/10/2022 kơ Hơnih tơm Chinh trĭ hlôi sơkơ̆t hơdăh, atŏk tơ iung tơring Tây Nguyên kăl kiơ̆ trong tơgoăt jang gơdoi lơ̆m tơring, kơdih tơring, kơ yuơ lơ loh ‘ngoăih tơ iung pơjing keh đang trong nơnăm, choh jang sa, tơmang pơhiơ̆, jŏh ayŏ-tơpôl ... Rim dêh char lơ̆m tơring jei kăl akŏm bơ̆ jang pơprŏ vă jang mă ‘lơ̆ng, sơđơ̆ng ăn bơ̆ jang ‘lơ̆ng, atŏk kơtang iung jang dôm tơdrong đei, rơvơn kơ tơring kơdih.

Pơma pơtôch hop akŏm, Kơ iĕng Thủ tướng Teh đak Trần Lưu Quang, Kơdră chĕp pơgơ̆r Jơnŭm chĕp pơgơ̆r tơring Tây Nguyên akhan, ‘măng hop akŏm au đei lăng jing trong blŭng a vă pơma dơnuh trong iung jang ‘nao, tơ iung pơjing trong pơprŏ jang, trong jang trŏ lăp hloh, mă đơ̆ng hiơ hiơ̆ mă lei kơjăp. Lơ̆m au, mă kăl hrôih pơjing đei trong jang kăl ăn pơđĭ lơ̆m tơring vă đơ̆ng noh hơmet pơ ‘lơ̆ng tơnap tap, pơjing đei hơyak pran ăn pơtrŭt tơring Tây Nguyên atŏk tơ iung.“Atŭm hăm bơn tơ iung pơjing mĭnh trong jang kăl pơ-‘nhŏ ăn tơring au vă đei sơđơ̆ng dơ̆ng kơjăp păng atŏk tơ iung. Akŏm lơ̆m 3 tơdrong, ‘nŏh tơdrong tơgoăt tơƀưh trong nơnăm lơ̆m 5 dêh char păng hăm rim tơring tơjê̆. Mă ƀar ‘nŏh iung jang hơdoi hơvơn tơmơ̆t jên jang kiơ̆ trong đei iŏk yua kơjăp kơtơring. Mă 3 ‘nŏh lăng kơjăp truh tơdrong jang tơm teh đak, gô atŏk pran kơtang hloh lơ̆m 2 sơnăm uơ oei vă druh tom kiơ̆ trong pơprŏ jang đei tơlĕch ăn”.

Kơ iĕng Thủ tướng Trần Lưu Quang jei pơkă athei rim dêh char hrôih jang keh đang trong pơprŏ vă jang dêh char păng trong pơprŏ vă jang tơring, lăng kơjăp dôm tơdrong đei ƀơm truh đơ̆ng cham char păng tơplih tŏ ‘mi kial. Adoi, atŏk kơtang bơ̆ jang vei lăng năng tông bri, atŏk kon jên vei lăng bri vă kon pơlei jang sa iŏk yua kơjăp ƀiơ̆. Lăng kơjăp atŏk kơtang bơ̆ jang tơplih kơsô̆, atŏk kơtang tĕch mơdro tơmam drăm ‘moi kiơ̆ mạng.