Vă hơmet ăn tơdrong hơlen năng Luơ̆t tĕh (oei chih hơmet) tơroi ăn Anih chĕp kơ̆l pơgơ̆r Kuô̆k hô̆i tơ̆ hop akŏm khei 4 păng tơgop nơ̆r ‘măng mă 2, lơ̆m hop akŏm mă 5, Kuô̆k hô̆i jăl 15, kơsơ̆ 9/3, Kơdră Anih vei lăng jang mŭk drăm pơgơ̆r bơ̆ jang hăm Anih tơm vei lăng tơmam drăm păng cham char vă mơ̆ng nơ̆r tơroi găh tơdrong chih hơmet ming Luơ̆t tĕh, dôm tơdrong tơtŏ mưh chă iŏk nơ̆r tơgop đơ̆ng kon pơlei. Kơdră Kuô̆k hô̆i Vương Đình Huệ pơgơ̆r jơ bơ̆ jang âu.

Kiơ̆ nơ̆r tơroi đơ̆ng Anih tơm vei lăng tơmam drăm păng cham char, jô̆ truh ‘năr 06/3, kiơ̆ kơsô̆ chih jô̆ lơ̆m website chă iŏk nơ̆r tơgop đơ̆ng kon pơlei đơ̆ng anih chih tơlĕch, tam mă iŏk kơsô̆ chih jô̆ đơ̆ng dôm tơring, đĭ iŏk đei 7.873 nơ̆r tơgop đơ̆ng 768 khul grŭp, lơ bơngai ăn dôm tơdrong kăl lơ̆m luơ̆t. Kiơ̆ đơ̆ng chih akŏm nơ̆r tơgop đơ̆ng dôm anih jang, khul grŭp, rim bơngai, lơ nơ̆r lăp đon hăm dôm tơdrong kăl đei hơmet lơ̆m Luơ̆t, akhan luơ̆t hlôi đei lơ tơdrong tơplih ‘nao, pơm lăp hăm tơdrong ‘mĕh vă đơ̆ng kon pơlei, tơ iung đei tơdrong ‘lơ̆ng đơ̆ng tĕh ăn tơdrong jang atŏk tơ iung mŭk drăm, tơpôl, vang tơgop vei lăng ‘lơ̆ng tĕh, iŏk yoa tĕh ‘mơ ‘met, đei yoa ‘lơ̆ng.

Pơma pơtôch jơ bơ̆ jang, Kơdră Kuô̆k hô̆i Vương Đình Huệ akhan, tơdrong iŏk nơ̆r tơgop đơ̆ng kon pơlei athei jang kiơ̆ jơhngâm đon tơpăt ‘lơ̆ng, ưh đei đon pơvĕr, hŭt lê̆ tơdrong ưh kơlăp, iŏk yoa tơdrong ‘lơ̆ng, năng kăl rim nơ̆r tơgop. Kơdră Kuô̆k hô̆i drơ̆ng nơ̆r hăm dôm nơ̆r iung pơma lơ̆m jơ bơ̆ jang akhan, athei hơlen năng rim nơ̆r tơgop, nơ̆r pơma apinh. Đơ̆ng rŏng kơ ‘nŏh chă rơih 1,2 tơdrong kăl, mă loi jĭ tơdrong oei đei lơ nơ̆r pơma phara băl dăh mă tam mă rơđăh lơ̆m luơ̆t vă hơnơ̆ng tơchĕng hơlen, iŏk nơ̆r tơgop, pơgơ̆r pơma đam mă hơdăh ƀiơ̆, mă hơlen ƀiơ̆.