VOV4.Bahnar - Anih vei lăng jŏh ayŏ kơ dŏ xoang, pơ tho pơ hrăm kơ Kuô̆k hô̆i, jang hơ doi hăm Anih jang Tư phap păng Anih vei lăng tơ pôl kơ Kuô̆k hô̆i ‘nao pơ gơ̆r hôp tơ blang găh tơ drong “Hơ tŏk trong jang kiơ̆ luơ̆t tang găn tĕh dong hơ iŏh”. Tơ̆ jơ hop akŏm âu, dôm bơ ngai tang măt tơ ƀôh hơ dăh dôm tơ drong tơm pơm tơ lĕch tơ drong hil hơ vĕng lơ̆m hnam păng tơ drong oei xa đơ̆ng bơ ngai ‘lŏ đơ̆ng rŏng kơ hrĕch hơ chăng băl, kăl loi jĭ jơ hngâm đon jing ưh ‘lơ̆ng tơ̆ 1 kơ sô̆ bơ ngai pơm hơ tŏk tơ drong tĕh dong đe hơ iŏh. Atŭm hăm ‘nŏh dôm trong jang vă tang găn tĕh dong hơ iŏh kŭm đei tơ lĕch lơ̆m hop akŏm âu.

“Tơ drong duch hle tĕh pơ lôch kon klo ‘nao 8 sơ năm”; Tơ drong pơ yô mĕ prăh 9 tŏ đinh lơ̆m kơ̆l mon drŏ kăn 4 sơ năm đơ̆ng rŏng lơ ‘măng tĕh dong, ƀơ ƀrơ̆h”, “Tơ drong bơ ngai ƀă klơ̆m kon kơ dih tơ̆ đak krong”… păng lơ tơ drong tĕh dong, ƀơ ƀrơh đe hơ iŏh tôch mơ nat đei ƀôh lơ̆m khei ‘năr âu ki. Phŏ Kơ dră chĕp kơ̆l Kuô̆k hô̆i Trần Thanh Mẫn pơ ma hơ dăh: dôm tơ drong tĕh dong. Ƀơ ƀrơ̆h đe hơ iŏh oei đei tôch hơ mơt păng ăn ƀôh dôm trong tang găn, vei rong, pơ tho tơ ƀôh păng vei lăng đe hơ iŏh oei tam mă pran.

Phŏ Kơ dră Anih vei lăng tơ pôl kơ Kuô̆k hô̆i Nguyễn Thị Kim Thúy đei nơ̆r pơ ma: “Dôm tơ drong tĕh dong hơ iŏh lơ sơ năm ưh kơ đe jur mă roi tŏk dơ̆ng, roi krê dơ̆ng. Tơ drong tơm ‘nŏh yoa kiơ? Anih tơm vei lăng tơ drong jang xa linh jĭ rơ ka păng tơ pôl; Anih tơm vei lăng Công an păng dôm anih jang kơ pal đei ƀơm truh đei trong jang thoi yơ vă găn lê̆ tơ drong ‘nâu”.

Kơ dră tơm vei lăng tơ dỏng jang xa, linh jĭ rơ ka păng tơ pôl Đào Ngọc Dung akhan oei đei lơ tơ drong ưh kơ lăp tơ̆ yăn âu yoa Luơ̆t găh đe hơ iŏh tam đei nơ̆r pơ tho tơ ƀôh, tơ lĕch jang kiơ̆ tơ tom. Kăl loi đei lơ tơ ring tam mă gan tơ rĕk truh tơ drong vei lăng năng tông đe hơ iŏh: “Dôm tơ drong ‘nao đei brei drou sư tơ ƀôh jơ hngâm đon tơ pôl roi jur kơ nê̆. Kiơ̆ inh yoa hil băl lơ̆m unh hnam păng tơ drong oei xa kơ bơ ngai ‘lŏ đơ̆ng rŏng kơ hrĕch hơ chăng băl. Đĭ đăng dôm tơ drong ‘nao đei kơ pal đei ưh ê ngăl yoa đơ̆ng unh hnam, ưh đei chă trong sek tơ lang pơ ‘lơ̆ng kơ na jing đei tơ drong ưh kơ ê thoi nŏh”.

Ƀât mă jĭ Covid-19 oei pơm tơ lĕch lơ tơ drong răm tôch kơ nê̆, ƀơm ưh ‘lơ̆ng truh tơ drong yak vih vât, kŭm hăm tơ drong kơ hret găh mŭk drăm roi tŏk, jing đei “tơ dỏng hil băl lơ̆m hnam tơ nŏ”. Lơ tơ drong tĕh dong kon hơ ‘lơ̆p tơ tă yoa đơ̆ng bơ ngai pơm mĕ, bơ ngai pơm ƀă, kơ tum kơ tŏng ‘nhŏng ŏh lơ̆m hnam pơm dơ̆ng. Tơ blang dơ̆ng găh trong tang găn tĕh dong đe hơ iŏh lơ̆m hnam, Phŏ Kơ dră vei lăng jŏh  ayŏ kơ dŏ xoang, tơ plŏng kơ dâu păng chă tơ mang lăng Tạ Quang Đông ăn tơ băt: “’Nao âu, nhôn roi tơ ƀôh luơ̆t tang găn tĕh dong lơ̆m unh hnam (oei chih hơ met) păng kiơ̆ trong jang vă tơ roi ăn Kuô̆k hô̆i lơ̆m ‘măng hop akŏm mă 3, pơ drơ̆ng nơ̆r lơ̆m hop akŏm mă 4. Luơ̆t ‘nâu đơ̆ng rŏng kơ đei drơ̆ng nơ̆r gô jing dôm tơ drong tôch ‘lơ̆ng vă hơ tŏk tơ drong tang găn tĕh dong lơ̆m unh hnam, lơ̆m nŏh đei tang găn tĕh dong đe hơ iŏh pơ ma adrô̆ lơ̆m luơ̆t ‘nâu”.

Găh trong jang atŭm vă vei lăng năng tông đe hơ iŏh, lơ̆m nŏh đei tang găn tĕh dong lơ̆m unh hnam, ƀok Kơ dră Đào Ngọc Dung pơ ma: “Nhôn vă akŏm jơ hngâm bơ̆ jang mă ‘lơ̆ng hlŏh tơ drong Tơ chơ̆t 121, chih hơ dăh hơ năp jang đơ̆ng rim anih jang, anih vei lăng năng tông đe hơ iŏh. Đơ̆ng blŭng sơ năm nhôn athei Dơ nŏ anih vei lăng kon pơ lei dôm dêh char, plt roi tơ băt tôm tơ drong găh trong tơ mât jên jang, jên vă vei lăng tĕh đak, jên pơ yoa ăn tơ drong jang kơ đe hơ iŏh sơ năm 2022. Kiơ̆ kơ ‘nŏh dôm tơ ring tơ lĕch ưh kơ tôm ‘nŏh gô đei set hơ len păng đei trong jang tơ găl hlŏh dơ̆ng”.

Hăm hơ năp jang đơ̆ng bơ ngai chĕp kơ̆l, chĭu pŭ vei lăng tĕh đak găh đe hơ iŏh, pơ gơ̆r jang kiơ̆ păng hơ len năng tơ drong jang kiơ̆ luơ̆t ƀơm truh tơ̆ đe hơ iŏh, ƀok Kơ dră Đào Ngọc Dung pơ ma hơ dăh: “Jĭ bơ ngai chĭu pŭ tơ̆ hơ năp Khul kơ dră tĕh đak, ưh lăp hơ drô̆ dôm kơ luơ̆t lơ̆m anih jang păng Khul kơ dră tĕh đak tơ lĕch đĕch, mă đĭ đăng luơ̆t, dôm hla ar chih hơ găt luơ̆t đei ƀơm truh tơ drong vei lăng, năng tông đe hơ iŏh. Chih tơ lĕch tơ drong hơ găt ‘moi kiơ̆ tơ drong vei lăng ‘lơ̆ng tơ drong pơm tơm kơ đe hơ iŏh, kŭm nhen dôm nơ̆r pơ kăp hăm apŭng plenh tĕh. Tơ drong mă 2, pơ tho ăn dôm tơ ring roi tơ ƀôh, jang kiơ̆ mă ‘lơ̆ng tơ drong vei lăng hơ iŏh. Tơ drong mă 3, hơ tŏk tơ drong vang bơ̆ jang đơ̆ng tơ pôl, vei lăng năng tông đe hơ iŏh hăm jên tơ mam đơ̆ng tơ pôl”.

Kơ dră Anih vei lăng jŏh ayŏ kơ dŏ xoang, pơ tho pơ hrăm kơ Kuô̆k hô̆i Nguyễn Đắc Vinh athei tơ̆ hơ năp kơnh, năng kăl truh tơ drong hơ met pơ ‘lơ̆ng dôm tơ drong hơ găt tang găn tĕh dong đe hơ iŏh mưh chih hơ met ming Luơ̆t tang găn tĕh dong lơ̆m unh hnam. Athei Khul ƀok kơ dră pơ gơ̆r sek tơ lang tơm tơ lĕch tơ drong tơ chơ̆t pơ tho tơ ƀôh trong sek tơ lang đe hrĕch hơ chăng băl, mưh vă pơ jao tơ drong vei rong kon athei lăng hơ len rim tơ drong ƀơm truh tơ̆ kon hơ ‘lơ̆p, lơ̆m nŏh athei năng kăl tơ drong hăm kĕ rong ‘me kon, vei lăng kon vă huei đei tơ drong tĕh dong, ƀơ ƀrơ̆h đe hơ iŏh ưh. Atŭm hăm ‘nŏh hơ tŏk tơ drong jang tang găn tĕh băl tơ̆ hnam trưng đơ̆ng rŏng kơ jĭ Covid-19.

 Lại Thị Hoa: Chih

Dơ̆ng: Tơ blơ̆