Thiếu tá Vũ Hồng Hiến kơdră chĕp pơgơ̆r Khul K51 tơbăt, groi teh năm tơchă kôch iŏk kơting ƀô̆ đô̆i lôch dŏng teh đak tơ̆ groi teh kơ Campuchia hmă hmă ‘noh groi kông hli hlơt, mơmat tat, găh lơ ‘noh chă yak hăm yak jơ̆ng, đei tơring lăp yak kiơ̆ trong đak kroong. ‘Ngoăih rim tơmam drăm chĕp kơ ti, mĭnh ‘nu ƀô̆ đô̆i lơ̆m khul hmă hmă hơnhăk ba phe, tơmam sa măh mai ăn 7-10 năr. Lơ̆m ‘măng năm tơchă kơting ƀô̆ đô̆i lôch dŏng teh đak, đei lơ ‘măng năm tơchă mă lei ưh kơ ƀôh, mă lei jei đei ‘măng pŭn ai, tơchă ƀôh lŏk bôl boăl, jei tơchă ƀôh tơmam pơsư̆ hloi.“Yak hơdrô̆ hơdrô̆, mĭnh khul ‘noh 2,3 ‘nu ‘nhŏng oh. Mư̆h bơ̆n chă sir kôch, lăng ƀôh koăl tăng lôm chô̆ đe mih ma ‘noh jreo hloi. Ou, mih ‘nou bơih! Mưh tơchă ƀôh ‘noh pơm ăn kơ bơ̆n chơt hiôk ưh kơbăt dang yơ hloi. Mă tơpă, mưh chă sir lŏk đe mih ma, đei mih ma oei đei tŏ sĕt sĕch akar, jei đei đe mih ma pă đei sĕch akar bơih, lăp ƀôh lơ̆m noh ‘noh ƀlak hơbĕn ao dăh mă tơmam pơsư̆. Kơna pơm ăn kơbơ̆n sa roi sơ ‘ngon hloh dơ̆ng.”

Atŭm hăm bơ̆ jang năm tơchă, kôch iŏk kơting ƀô̆ đô̆i lôch dŏng teh đak, kang ƀô̆, ƀô̆ đô̆i Khul K51 Dak Lăk oei jang ‘lơ̆ng bơ̆ jang pơrô̆ pơrôp kon pơlei lơ̆m hơnih oei păng bơ̆ jang tơbôl khul lĭnh, tơbôl hăm kơdră tơring, jang ‘lơ̆ng bơ̆ jang tơgoăt tơgoăl hăm kon pơlei ‘moi kiơ̆ năm ngôi, pôk tơmam drăm, khăm ming hơmet jĭ jăn păng ƀơk pơgang ăn kon pơlei. Đơ̆ng noh, lơ kon pơlei hlôi tơroi tơbăt ăn Khul dôm tơdrong kăl. Thiếu tá Nguyễn Văn Duẩn, bơngai jang lơ̆m Khul K51 tơbăt:“Mưh kon pơlei lăng bơ̆n nhen kon hơ ‘lơ̆p lơ̆m pơlei ‘noh đe sư tơbăt rơhao, tơgŭm djru, đei ‘măng chă hơvơn ŭnh hnam vang năm tơchă păng tơgŭm djru Khul vă tơchă ƀôh kơting ƀô̆ đô̆i lôch dŏng teh đak tơ̆ kơdrăn tơblăh lơ̆m teh đak Campuchia. Lơ kon pơlei mưh nhôn tơchă ƀôh kơting ƀô̆ đô̆i lôch dŏng teh đak ‘noh đe sư jei ơh sơ ‘ngon mơ̆n păng mưh brŏk ‘noh jei tôch hơlŏk ƀlŏk hơdơ̆r. Mưh nhôn truh ‘noh kon pơlei lăng nhôn jei nhen lĕ bơngai lơ̆m ŭnh hnam, nhen sơ̆ ‘noh ƀô̆ đô̆i Ƀok Hô truh tơgŭm dŏng kon pơlei Khmer yak hloh tơdrong pơlôch rŭng đơ̆ng Pôl pôt.”

Khul K51 hăm tơdrong jang năm tơchă kôch akŏm kơting ƀô̆ đô̆i lôch dŏng teh đak tơ̆ tơring 4 apŭng: Bátchanđa, Cônhét, Keosama, Ôrăng păng pơlei tơm Senmônôrum găh dêh char Mundulkiri (Campuchia). ‘Nou jĭ dêh char groi kông, groi teh să sap, trong nơnăm tơnap tap, tŏ ‘mi kial ưh sơđơ̆ng. Thượng tá Trịnh Ngọc Kiệm, Kơdră Khul K51 tơbăt, lăp kơtơ̆ng tơbăt, mă đơ̆ng ưh kơ gan hơmŏ tơ̆ tơring hơtăih truh kơhrĕng kây sô̆, Khul oei iung năm hloi.“ Tơ̆ yơ tơroi ‘noh tơ̆ noh ƀôh kang bang kơ̆l kang ƀô̆ ƀô̆ đô̆i hloi, mă đơ̆ng tơnap tap truh dang yơ jei hơdrin yak vă năm tơchă, kôch akŏm. Mưh hơmĕng, sir ƀôh, tơchă ƀôh gru kơnăl kơ ƀô̆ đô̆i bơ̆n ‘noh mă đơ̆ng gleh lap dang yơ, mơmat tat dang yơ jei nŏng tôch ai ‘mơ̆i.”

Lơ̆m 23 sơnăm hơdrin năm tơchă kơting bôl boăl tơ̆ teh đak boăl Campuchia đơ̆ng Khul K51 hlôi chơ vih đei 746 kơ̆l ƀô̆ đô̆i lôch dŏng teh đak brŏk vih hăm groi teh mĕ ƀă yă ƀok Việt Nam. Yă H’Yim Kdoh, Kơ iĕng Kơdră chĕp pơgơ̆r Hơnih vei lăng kon pơlei dêh char Dak Lăk sơkơ̆t hơdăh, dôm tơdrong hơdrin păng jang jơnei lơ̆m khei năr ou ki kơ Khul K51 hlôi tơgop tih tên pơm chhơp jơhngơ̆m ơ̆h sơ ‘ngon kơ ŭnh hnam ƀô̆ đô̆i lôch dŏng teh đak, tơbăt hơdăh jơhngơ̆m đon “Nhă đak chăm kơtu”, “Sa plei ƀlŏk hơdơ̆r bơngai pơtăm” đơ̆ng hơdrĕch hơdrung bơ̆n, hơnhăk đei jơhngơ̆m đon ‘lơ̆ng hơ iă hloh.“Tôch hơ iă păng hôn bơnê dôm tơdrong hơdrin đơ̆ng đe ‘nhŏng oh. Ba lui akhan, hăm tơdrong lăng ba tih tên đơ̆ng Hơnih Đảng dêh char, Jơnŭm vei lăng kon pơlei, Hơnih vei lăng kon pơlei, Hơnih bơ̆ jang Mặt trận Tổ quốc Việt Nam dêh char păng mă kăl hăm jơhngơ̆m đon lăng ba kơjăp đơ̆ng rim hơdrĕch hơdrung lơ̆m dêh char ‘măn ăn kang ƀô̆ ƀô̆ đô̆i Khul K51 ưh khan jơhngơ̆m đon ‘mêm kơ eng, lui yom mă lei oei hloh glŏh gloi hloh dơ̆ng ‘noh hơpơi đe ‘nhŏng bơ̆ jang ‘lơ̆ng dôm tơdrong jang gĭt kăl tơ groi teh kơ teh đak boăl.”

Hăm tơdrong jang gĭt kăl, dôm ƀô̆ đô̆i kơ Khul K51 Dak Lăk băt dôm yơ jơhnơr ling lang yăk hloh mơmat tat. Dôm tơdrong jang ƀĕnh ƀang mơmat tat, hrat hrĭn đơ̆ng kang ƀô̆, ƀô̆ đô̆i Khul K51 hrăm ƀĕnh ƀang đak pơuh pơang atŭm hăm kơtoh đak măt chhơp jơhngơ̆m mưh tơchă đei kơting rim đe mih ma, đe ‘nhŏng vă ba đe sư ƀrŏk vih hăm groi teh mĕ ƀă yă ƀok.