VOV4.Bahnar - Giĕng âu ki, tơ̆ Hop akŏm mă 4, Jơ nŭm pơ gơ̆r kon pơ lei dêh char Dak Lak jăl X, dôm bơ ngai tang măt pơ ma nuh găh lơ tơ drong gĭt kăl ƀơm truh trong vă bơ̆ jang dôm tơ drong hơ găt, tơ drong jang atŏk tơ iung mŭk drăm, tơ pôl, vei sơ đơ̆ng tĕh đak 6 khei hơ tuch sơ năm, dôm tơ drong đei ƀơm truh tơ drong arih xa kơ kon pơ lei.  

Tơ roi tơ̆ hop akŏm, 6 khei blŭng sơ năm, mă đơ̆ng pŭ lơ tơ drong ưh kơ ‘lơ̆ng đơ̆ng jĭ covid-19, mă lei mŭk drăm Đắk Lắk oei ƀôh tŏk ‘lơ̆ng, akŏm đĭ đăng tơ mam jang đei tŏk truh 7,37% , thu mong jên ăn tĕh đak đei 4.860 ti, tŏk vă jê̆ 40% pơ têng hăm khei âu sơ năm sơ̆; jên tech tơ mam tơ̆ tĕh đak đei 845 triu Đô La Mi, tŏk hlŏh 61%. Dôm tơ drong jang chă tơ mang lăng, tĕch mơ dro, jang xa tŏk ‘lơ̆ng ngăl. Mă lei tơ drong tơ lĕch jên jang kơ tĕh đak oei tŏ sĕt, lăp đei hlŏh 20%; chă tơ drong jang tam mă lăp hăm nơ̆r hơ găt, kơ sô̆ bơ ngai ƀet vác xin tang găn jĭ Covid 19 jrŭm 3,4 lơ̆m kon pơ lei oei tŏ sĕt, dôm tơ drong jang tơm kơ tĕh đak oei tơ lĕch jang hiơ̆,…

Jơ bơ̆ jang lơ̆m hop akŏm

Hlŏh đơ̆ng chă pơ ma nuh, dôm bơ ngai tang măt drơ̆ng nơ̆r hăm hla ar chih tơ roi dôm tơ drong jang đei lơ̆m 6 khei blŭng sơ năm, atŭm hăm ‘nŏh tơ lĕch 1,2 nơ̆r tơ gop vă bơ̆ jang đei yoa ‘lơ̆ng ƀiơ̆ lơ̆m 6 khei hơ tuch sơ năm nhen: hơ tŏk tơ drong hơ met ming trong pơm hla ar păng sơng iŏk jên tơ mât jang; tơ rĕk truh tơ drong tơ lĕch jên pơm pơ ‘lơ̆ng trong nơ năm…  Găh tơ drong choh jang xa, ƀơm truh tơ drong plei sâu riêng Việt Nam đei tĕch mơ dro tơ păt ‘lơ̆ng kiơ̆ ‘măng jang tơm năm tơ̆ Trung Quốc đơ̆ng ‘năr 11/7/2022, bơ ngai tang măt Trần Hồng Tiến, Bí thư đảng apŭng Krông Pach akhan: ‘nâu jĭ tơ drong ‘lơ̆ng hai, jing tơ drong nol hai hăm tơ drong choh jang xa kơ dêh char tơ̆ hơ năp kơnh:

“Nhôn tôch hơ pơi ‘mĕh Dơ nŏ anih vei lăng kon pơ lei dêh char păng dôm anih jang mă loi ‘nŏh anih vei lăng choh jang xa đei trong jang, hơ met tôm tơ drong vă tơ gŭm ăn kon pơ lei pơ tăm. Bơ ngai tăh hla lơ̆m dêh char tôch tơ rĕk yoa hrei ‘nâu bơ̆n đei dang 12.000 hec ta sâu riêng phĕ đei plei hlŏh 125.000 tân athei chă trong tĕch mơ dro, tơ dăh bơ̆n ưh jang ‘lơ̆ng ‘nŏh tôch mơ mat”.

Tơ rĕk truh tơ drong jang atŏk tơ iung tơ ring kon kông oei xa, bơ ngai tang măt Y Ca Enuôl, Phŏ Kơ dră Anih vei lăng hơ drĕch kon kông dêh char Dak Lak tôch pơ ngơ̆t, mưh kiơ̆ tơ drong hơ găt tơ nuh hin ‘nao ‘nŏh kơ sô̆ unh hnam tơ nuh hin lơ̆m dêh char tŏk tôch lơ. Lơ̆m nŏh, tơ ring kon kông tŏk truh 65,3%. Bơ ngai tang măt Y Ca ENuôl  athei, kăl đei trong tơ gŭm mă tơ găl hlŏh dơ̆ng hăm dôm bơ ngai âu:

“Apĭnh Dơ nŏ anih vei lăng kon pơ lei tơ rĕk, đei nơ̆r pơ tho păng trong tơ gŭm pran hlŏh dơ̆ng găh tơ drong jang tơ jur tơ nuh hin. Bơ̆ jang tơ jur tơ nuh hin đei yoa, pơ ‘nhŏ lơ tơ drong tơ gŭm hăm tơ ring hơ tăih yăih vă tơ jur tơ nuh hin hrĕnh păng kơ jăp. Tơ jur kơ sô̆ unh hnam tơ nuh tơ̆ tơ ring kon kông oei, mă loi ‘nŏh unh hnam tơ nuh tơ̆ tơ ring kon kông kơ tă tơ̆ dêh char, pơ gơ̆r bơ̆ jang hrơ̆ch ‘lơ̆ng dôm tơ drong jang”.

Ƀok Y Vinh Tơr – Kơ dră jang pơ gang lơ̆m Trung ương Đảng – Phŏ Kơ dră Anih vei lăng hơ drĕch kon kông, Kơ dră chĕp kơ̆l Khul tang măt Kuô̆k hô̆i Dak Lak pơ ma ƀât blŭng hop akŏm

Pơ ma găh tơ drong jang pơ gang, bơ ngai tang măt Nguyễn Ngọc Hùng, phŏ Kơ dră vei lăng jŏh ayŏ tơ pôl kơ Jơ nŭm pơ gơ̆r kon pơ lei dêh char Dak Lak pơ ngơ̆t găh tơ drong ƀak si tơ̆ hnam pơ gang tĕh đak pơ dơ̆h jang păng trong chă răt pơ gang, tơ mam pơ yoa ăn tơ drong jang pơ gang hiơ̆ hyĭn, ƀơm ưh ‘lơ̆ng truh tơ drong vei lăng jơ hngâm pran kon pơ lei. Yoa thoi nŏh, bơ ngai tang măt athei năng kăl truh trong sek tơ lang 2 tơ drong ‘nâu.

“Tơ dăh tơ drong ‘nâu ưh đei lơ trong jang vă iŏk yoa ‘lơ̆ng ‘nŏh krê tơ̆ hơ năp kơnh dôm hnam pơ gang tĕh đak, mă loi ‘nŏh tơ̆ dêh char gô ưh kơ măh bơ ngai jang. Yoa thoi nŏh athei đei lơ trong vă pơm thoi yơ dôm bơ ngai jang tơ̆ nŏh gơ̆h sơ đơ̆ng jơ hngâm bơ̆ jang, đơ̆ng nŏh bơ̆n gơ̆h vei lăng, pơ gơ̆r ‘lơ̆ng rim tơ drong jang”.

Lơ̆m 6 khei hơ tuch sơ năm, Dơ nŏ anih vei lăng kon pơ lei dêh char Dak Lak oei hơ nơ̆ng akŏm jơ hngâm tang găn jĭ COVID-19 hai, jang atŏk tơ iung ming mŭk drăm, tơ pôl hai. Vă jang kĕh dôm tơ drong hơ găt găh jang tŏk sơ năm 2022, ƀok Trần Phú Hùng, Phŏ Kơ dră Jơ nŭm pơ gơ̆r kon pơ lei dêh char Dak Lak athei Dơ nŏ anih vei lăng kon pơ lei dêh char akŏm jơ hngâm hơ met pơ ‘lơ̆ng dôm “tơ drong tơ hlăk”, “găn trong” găh tơ drong tơ lĕch jên jang kơ tĕh đak:

“Athei Anih vei lăng kon pơ lei mưh kĭ ăn dôm tơ drong jang, dôm anih jang tơ gŭm athei hơ len năng mă brĕ rim tơ drong mưh Jơ nŭm pơ gơ̆r tơ chơ̆t tơ lĕch trong tơ mât jên jang, mă lei mưh đei tơ drong tơ chơ̆t ‘nŏh đei hê̆ tơ drong tơ hlăk athei, athei hơ met ming tơ drong jang, ‘nŏh jĭ tơ drong chưk pơ ‘ngoăih tĕh hiơ̆. Yoa thoi nŏh jing hiong jơ năr athei Anih vei lăng kon pơ lei jăh hơ met, găn lê̆ tơ drong ‘nâu.”

Kŭm hăm hơ len năng dôm tơ drong jang đei mưh bơ̆ jang atŏk tơ iung mŭk drăm tơ pôl, vei sơ đơ̆ng tĕh đak 6 khei blŭng sơ năm păng dôm tơ drong vă jang tơm lơ̆m 6 khei hơ tuch sơ năm, tơ̆ hop akŏm âu, Jơ nŭm pơ gơ̆r kon pơ lei dêh char Dak Lak oei pơ ma nuh, drơ̆ng nơ̆r ăn lơ tơ drong tơ chơ̆t gĭt kăl nhen: Tơ drong tơ chơ̆t hơ găt găh tơ drong klăih song jên đơ̆ng thuê̆ hơ tŏk kơ jă tơ mam hăm tơ drong jang ming man tơ̆ dêh char; Tơ drong tơ chơ̆t hơ găt sô jên vă thu panwg jên athei nôp găh tơ drong hơ met ming trong tơ mât jên jang ăn dôm tơ drong jang tơ gŭm atŏk tơ iung tơ ring sơ lam – Tơ drong jang iĕ kơ dêh char Dak Lak; Tơ drong tơ chơ̆t hơ găt găh klăih song jên tĕh đak vă bơ̆ jang tơ drong jang tơm kơ tĕh đak atŏk tơ iung mŭk drăm, tơ pôl tơ̆ tơ ring kon kông panwg groi kông đơ̆ng 2021 – 2030.

Dơ̆ng: Tơ blơ̆