Tơ̆ tơring Snay Anhchit, apŭng ChumKiri, dêh char Kampot, teh đak Campuchia, kon pơlei erih sa gơnang lơ̆m chŏh jang sa, oei hơtăih kơ hơnĭh kơdrơ̆m kơna tơdrong erĭh sa tôch tơnap tap păng tơdrong vei lăng năng tông jơhngơ̆m jăn tim gan hlôh vao păng tơƀơ̆p tôch tơnap tap, kơƀăh kơƀôch. Yă Chanol ƀôh ƀô̆ đô̆i Việt Nam năm khăm, ƀơk pơgang ăn kơ yă păng kon pơlei tơ̆ au, yă măh chhưu lơ̆m jơhngơ̆m:  “Ĭnh jĭ đĭ đunh bơih, kơ yuơ kơ hŏh kơna ư̆h kơ đei năm hơmet, dang ei kơtơ̆ng khŭl ƀok thây pơgang kơ Ƀô̆ đô̆i dêh char Kiên Giang năm khăm păng ƀơk pơgang, tơgŭm tơmam drăm ăn kon pơlei tơ̆ au, inh chơt dêh. Bơnê lơ”.

Lơ̆m jơ ‘năr iung jang, khŭl bơ̆ jang tơƀơ̆p tôch lơ tơdrong tơnap tap găh ‘năr ‘mi, gre, nơ̆r pơma phara dĭh băl, mă lei tơ̆ hơnăp tơdrong mơmat tat gleh hrat kơ kon pơlei teh đak boăl, rim bơngai lơ̆m khul hơnơ̆ng chă hơlêm dih băl hơdrin yak hlŏh tơnap tap vă bơ̆ jang keh đang tơdrong jang. Nơ̆r tơbăt đơ̆ng ƀak si Trần Thu Quỳnh, hnam pơgang tơm Kiên Giang:“Kơdih ba tôch tơtăm, hlêng hlang kơ yuơ ‘măng mă blŭng ba năm khăm jĭ tơ̆ teh đak boăl. Mă đơ̆ng oei đei lơ tơdrong tơnap tap lơ̆m chă yak, pơgang adoi nhen tơmam drăm jang pơgang, mă lei năm tơ̆ au tơdrong chă khăm ming hơmet jĭ jăn kơ kon pơlei oei tơƀơ̆p tôch lơ tơdrong tơnap tap, kơdĭh ba ‘nŏh ƀak si atŭm hăm ‘nhŏng ŏh jang pơgang lơ̆m khŭl jei hơdrin đĭ jơhngơ̆m vă chă khăm ming hơmet jĭ ăn kon pơlei tơ̆ au; adoi nhen tơgop tŏ sĕt pơm dă ƀiơ̆ trăp trĭn ăn tơdrong jang pơgang tơring”.

            Thiếu tá Hoàng Trọng Thiên, Kơdră chĕp pơgơ̆r hơnĭh jang pơgang Ƀô đô̆i dêh char Kiên Giang tơbăt:“Tơdrong hơmet jơ ‘năr jei hăt hot, tim gan rơvơn mă lei mư̆h jang ‘nhŏng ŏh jei hơdrin đĭ ai păng mư̆h trŭh ‘nŏh đei khul lĭnh boăl adoi nhen kon pơlei oei tơjê̆ kơđông khul lĭnh oei tơgŭm djru tôch kơtang, kơna ‘măng năm khăm jĭ đei jơnei hơ iă”.

            Tơ̆ au, Khul ƀok thây pơgang Ƀô̆ đô̆i dêh char Kiên Giang hlôi khăm păng ƀơk ăn hlŏh 300 tơnô̆ pơgang ăn kang ƀô̆ păng kon pơlei tơ̆ au, mĭnh tơnô̆ kơjă 100.000 hlak jên. Jei tơ̆ hơnih khăm păng ƀơk pơgang, khul hlôi pôk ăn 60 tơnô̆ tơmam drăm ăn rim ŭnh hnam tơnap tap, mĭnh tơnô̆ kơ jă kơjên 500.000 hlak jên. Tơdrong jang au hlôi pơjing đei jơhngơ̆m đon ‘mêm kơ eng ‘lơ̆ng hơ iă hlŏh đơ̆ng khŭl kơdră tơring păng kon pơlei teh đak boăl hăm ƀô̆ đô̆i Việt Nam lơ̆m chăl rơngei hiôk hian. Yă Sui Kết, kon pơlei apŭng Chumkiri, dêh char Kam Pốt pơma tơbăt jơhngơ̆m đon:  “Ĭnh chhôk dêh đei khul ƀok thây pơgang trŭh pôk ăn tơmam drăm păng khăm jĭ, ƀơk ăn pơgang, ư̆h kơ băt vă hôn bơnê dang yơ bơih, tơdăh đei ‘măng đơ̆ng rŏng kơnh năm tơgŭm nhôn mĭnh ‘măng dơ̆ng, kơ yuơ lơ̆m khei ‘năr au, kon pơlei bơ̆n oei mơmat tat, mă đơ̆ng tơmam drăm tŏ sĕt mă lei hlôi tơgŭm ăn nhôn sơđơ̆ng ƀiơ̆ jơhngơ̆m lơ̆m khei ‘năr mơnat tat au”.

Đơ̆ng sơnăm 2015 trŭh dang ei, Dơnŏ anĭh Ƀô̆ đô̆i dêh char Kiên Giang hlôi pơgơ̆r ăn 6 khul năm khăm jĭ păng ƀơk ăn hlŏh 3.500 tơnô̆ pơgang ăn kon pơlei lơ tơring, apŭng oei tơnap tap tơ̆ Campuchia hăm kơjă kơjên hlŏh 400 triu hlak jên. Rim ‘măng chă apĭnh jet gia phăl hơlăng, mĭnh tơnô̆ pơgang, mĭnh tơnô̆ tơmam drăm đei pôk ăn ‘nŏh jing jơhngơ̆m đon ‘lơ̆ng hơ iă vă pơjing kơtang hlŏh dơ̆ng tơdrong tơgoăt tơgoăl dĭh băl ‘lơ̆ng liĕm ƀar păh khul lĭnh păng kon pơlei ƀar teh đak. Đại tá Tếp Âm, Kơ iĕng Kơdră chĕp pơgơ̆r Khul linh apŭng Kampot tơbăt:  “Đei kơdră kơpal pơjao ăn kơ nhôn iung jang hơdoi hăm ƀok thây pơgang dêh char Kiên Giang năm khăm, ƀơk pơgang păng pôk ăn tơmam drăm. Hlŏh đơ̆ng jang hơdoi hăm khul dêh char, Khŭl jang K92, khul hlôi năm khăm ƀơk pơgang lơ̆m tơring Snay Anh Chít. Ba chơt hơ iă dêh păng bơnê kơ khul ƀok thây pơgang dêh char Kiên Giang tôch kơ dêh”.

Tơdrong pơgơ̆r ăn khul bôk thây pơgang năm khăm păng ƀơk pơgang ăn kon pơlei tơring Snay Anhchit ‘nŏh tơdrong jang tôch git kăl kơ Khul Ƀô̆ đôi dêh char Kiên Giang, tơgop atŭm hăm kơdră tơring kơ teh đak boăl lăng tông nông gia tơdrong erih sa ăn kon pơlei. Đơ̆ng au jei pơjing đei rơvơn ăn khul K92 dang ei tŏk bŏk tơchă kôch akŏm  kơting ƀô̆ đô̆i păng khŭl joăt jang Việt Nam bơ̆n lôch răm lơ̆m kơdrăn tơblăh Campuhia bơ̆ jang keh đang trong jang đei pơjao, ba rim ƀô̆ đô̆i bơ̆n lôch răm dŏng tĕh đak vĭh hăm groi tĕh mĕ ƀă yă ƀok. ‘Nau jei jing jơ ‘năr vă tơgoăt kơjăp hlŏh dơ̆ng 2 dêh char Kiên Giang hăm Kampot pơma hơdrô̆, ƀar păh teh đak păng kon pơlei Việt Nam – Campuchia pơma atŭm. Đại tá Cao Minh Tâm, Kơdră chĕp pơgơ̆r khul Đảng Dơnŏ anĭh Ƀô̆ đô̆i dêh char Kiên Giang tơbăt dơ̆ng: “Tơdrong pơgơ̆r chă ƀơk ăn pơgang păng tơmam drăm ăn kon pơlei oei tơ̆ dêh char Kampot đơ̆ng Dơnŏ anĭh Ƀô̆ đô̆i dêh char hăm hnam pơgang tơm dêh char Kiên Giang ‘nŏh jĭ vă pơjing rơvơn hlŏh lơ̆m tơdrong vei lăng năng tông tơdrong erĭh sa ăn kon pơlei lơ̆m dêh char Kampot pơma atŭm păng apŭng Chumkiri pơma hơdrô̆ vă tơgoăt kơ jăp hlŏh dơ̆ng tơdrong tơgoăt tơgoăl dĭh băl ƀar hơdrĕch hơdrung Việt Nam păng Campuchia adoi nhen ƀar dêh char Kiên Giang hăm Kampot”.