Tơ̆ hop akŏm, dôm bơngai jang lơ̆m Jơnŭm jang hlôi tơblang hơdăh dôm tơdrong tơm, hơnăp jang tơlĕch ăn lơ̆m hla ar chih Tơdrong jang. Kiơ̆ kơ ‘noh, lơ̆m Tơdrong tơchơ̆t  29 đơ̆ng Anih chĕp kơ̆l Trung ương Đảng jăl 11 đei dôm tơdrong hơgăt tŏk bŏk ƀlep trong, ƀlep tơdrong ‘noh kăl kơ jang kiơ̆; grŭp tơdrong hơgăt tam mă ƀơm, tam mă ƀlep dăh mă trong jang tơlĕch ăn tam mă tôm, tam ‘lơ̆ng. Hơdai hăm, tơdrong jang kăl kơ tơlĕch ăn dôm tơdrong hơgăt ‘nao, trong jang ‘lơ̆ng vă pơm lăp hăm ‘meh vă bơngai jang hrei ‘nâu.

Iung pơma tơ̆ ‘măng hop akŏm, Phŏ Thủ tướng, Kơdră Jơnŭm jang Teh đak Pơtho pơhrăm păng Hơtŏk tơiung bơngai jang tơroi rơđăh, Tơdrong jang hơtŏk tơiung pơtho pơhrăm jăl jang truh 2030 păng lăng truh sơnăm 2045 đei tơdrong gĭt kăl, ƀơm tih truh trong jang tơgŭm pơtho pơhrăm păng hơtŏk tơiung bơngai jang tơ̆ hơnăp kơnh. Yua thoi noh, Tơdrong jang kăl kơ đei hơnih hơdăh, hơnăp jang tơm, đon tơchĕng ‘lơ̆ng; hơdrin jang kiơ̆ trŏ ƀlep mă lei kŭm đei tơdrong tơplih, tŏk pran.