Tơdrong Tơchơ̆t Hop akŏm Đảng XIII hlôi băt hơdăh: hơtŏk tơiung hrơ̆ch 1 ‘măng păng pơm đei tơdrong jang hơdai đơ̆ng rim tơring; Hơdai hăm, chă trong vă hơtŏk tơiung rim tơring kiơ̆ trong iŏk jang ‘lơ̆ng hloh păng hơtŏk ‘lơ̆ng hloh dôm tơdrong ‘lơ̆ng đơ̆ng rim tơring găh anih jang kăl, tơdrong đei đơ̆ng kơ dih, anih teh mŭk drăm - chĭnh trĭ, bơngai jang păng hơtŏk loi dơ̆ng tơdrong jang hơdai tơring păng lơ tơring vă vang jang dôm trong jang kơ jă jơ̆p plĕnh teh, pơm tơdrong hơtŏk tơiung ‘nao...

 Vă đei jang hơdai tơring ‘noh tơdrong tơm kăl hloh ‘noh jĭ athei đei anih jang kăl păng tơ goăt anih jang. Kiơ̆ kơ ƀok Trần Văn Hảo - Kơdră chĕp kơ̆l Anih vei lăng găh kơ măy kơmŏk mơdro sa dêh char Hải Dương, lơ̆m dôm anih jang, tơdrong kăl ‘noh jĭ trong nơnăm hiôk đơ̆ng rim tơring ‘noh jĭ tơdrong ‘lơ̆ng vă tơƀưh tơ ring păng lơ tơring kŭm nhen pơm đei dôm anih jang gĭt kăl nai: Athei dôm Anih tơm, anih jang Trung ương, Anih vei lăng kon pơlei dôm dêh char, pơ lei tơm jăh akŏm tŭn hrĕnh pơ jing dôm tơdrong jang trong tơnăm tơƀưh hrơ̆ch 1 ‘măng đơ̆ng dôm dêh char, pơ lei tơm lơ̆m tơring vă hơtŏk loi dơ̆ng jang hơdai tơring, pơ trŭt pơ jing hơtŏk tơiung dôm anih jang kơ măy kơmŏk, dôm tơring jang hơdai tơdrong jang păng cham char bri brăh kơ măy kơmŏk, pơ vih pơvăn; Bơngơ̆t truh tơmơ̆t jên jang ming man ‘nao dăh mă pơih xă dôm anih jang Logictics pơm tih tơ̆ Hải Phòng, Quảng Ninh, Hà Nội, Hải Dương păng dôm dêh char đei tơmam ‘lơ̆ng vă ming man dôm anih jang Logictics chơ chuĕn, vă hơ tŏk tơiung păng hơtŏk tơdrong kĕ jang hơdai, tơgŭm băl, đei yua tơ jur jên ăn dôm anih jang mơdro sa hơtŏk ‘lơ̆ng tơdrong kĕ pơ jei băl pơm tơdrong ‘lơ̆ng ăn hơtŏk tơiung lơ̆m pơ đĭ tơring....

Đơ̆ng yan âu kơ tơring Tơmăn đak krong Hồng tơring tôch kơ gĭt kăl găh chĭnh trĭ, mŭk drăm, joh ayŏ, tơpôl, vei lăng teh đak păng jang tơbôl kơ teh đak. Hăm tơdrong tơm ‘noh jĭ Anih tơm  Hà Nội - ‘noh jĭ 1 lơ̆m 2 “anih jang tơm” mŭk drăm, tơdrong ‘lơ̆ng hơtŏk tơiung tih hloh kơ lơ̆m teh đak, khei ‘năr âu ki, gơnang đơ̆ng đei tơdrong jang hơdai, tơƀơ̆p băl găh jang mŭk drăm mă 1,2 tơring lơ̆m tơ rring tơ măn đak krong Hồng hlôi đei tơdrong hơtŏk tơiung ‘lơ̆ng găh trong nơnăm, logistics… Mă đơ̆ng thoi noh ră, kiơ̆ kơ yă Lê Việt Nga - Phŏ Kơdră Anih vei lăng mơdro sa lơ̆m teh đak, Anih tơm vei lăng găh kơmăy kơmŏk mơdro sa oei đei lơ tơdrong mă khŭl kơdră dôm tơring lơ̆m tơring kăl athei jang hơdai hăm băl lơ̆m tơlĕch jang kiơ̆ ‘nao gơh tơplih um ai anih mơdro sa kơ tơring păng kơ lơ̆m teh đak: Đei dôm tơdrong jang mă nhôn ƀôh akhan ‘noh jĭ tơdrong jang hơdai tơ ring ‘noh oei tam mă tơgĕch iŏk đei đĭ. Pơtih gia nhen hăm proh hơmet găh anih jang Logistics ‘noh tơring tơmăn đak krong Hồng tôch kơ đei tơgŭm ƀơ̆t mă Thủ tướng teh đak hlôi kĭ ăn tơ̆ tơchơ̆t kơ sô̆ 1012 sơnăm 2015 ăn tơring tơmăn đak krong Hồng đei hloi 1 anih jang Logistic kơ loăi 1 pơm tơ̆ tơring păih tu Hà Nội; Anih jang Logistic kơ loăi 2 pơm tơ̆ păih pơ băh Hà Nội; păng truh sơnăm 2030 oei đei hloi dôm anih jang Logistic đei teh xă truh 50 hecta đei jang hơdai hăm dôm tơnŏk - đơ̆ng cham gre păr ding truh tơnŏk đak dơsĭ lơ̆m tơring, mă lei ding truh dang ei bơ̆n oei tam mă đei. Thoi noh ‘noh tơdrong jang sơng đei tơmơ̆t jên jang lơ̆m tơdrong jang ‘nâu tôch kơ kăl tơdrong vang yak hơdai đơ̆ng rim tơring hăm băl...

Vang tơchĕng hăm tơdrong ‘nâu, mă lei yă Trần Thị Phương Lan - Kơdră pơ gia Anih vei lăng găh kơ măy kơmŏk mơdro sa pơlei tơm Hà Nội pơma hơdăh hơnăp jang đơ̆ng Anih tơm vei lăng găh mơdro sa kơ măy kơmŏk lơ̆m tơdrong hơtŏk tơiung anih jang logistics tơklep tơring păng lơ tơring:  Kiơ̆ kơ ĭnh tơchĕng ‘noh lơ dêh char lơ̆m tơring đei tơdrong hiôk hơtŏk tơiung logistics lơ̆m tơdrong jang trong nơnăm, trong gre păr, trong đak dơsĭ, trong đak krong... kơna ĭnh ‘meh ‘noh jĭ tơdrong jang âu ‘noh Anih tơm vei lăng găh kơmăy kơmŏk mơdro sa gô iŏk hơnăp jang tơm vă tơƀôh trong, chông ba ăn dôm dêh char, păng bơ̆n tơƀôh hơdăh dôm hơnih vă hơ tŏk tơ iung ăn kơ sư hoei kơ đei hơdrom băl, păng hơtŏk đei iŏk yua, iŏk jang đei đĭ dôm jăl trong mă bơ̆n đei tơdrong ‘lơ̆ng tơ̆ lơ̆m tơring...

Tơdrong tŭn pran jang hơdai đơ̆ng rim tơring lơ̆m tơring vă pơ jing dôm anih jang kăl nhen trong nơnăm, gre kơ dâu, logistics, anih jang mơdro sa... gô pơm tơdrong hiôk ăn tơdrong chơ chuĕn, gre kơ dâu, tĕch tơmam. Ƀok Triệu Đăng Khoa - Kơdră vei lăng Hơp tak xăh Trạm bạc Đồng Xâm (găh pơ lei tơdrong jang pơm tơmam đơ̆ng hu Đồng Xâm, apŭng Kiến Xương, dêh char Thái Bình) akhan: Mưh pơm đei tơdrong jang hơdai ‘noh kŭm tôch kơ hiôk ăn tơmam plei tơdrong jang pơm tơmam đơ̆ng hu Đồng Xâm yua kơ rim bơngai tă kơ băt truh, đang kơ ‘noh đĭ đăng dôm tơdrong mơdro sa jơ̆p jang ‘noh tơmam pơm đơ̆ng hu  Đồng Xâm pă jor gô đei lang să hloh...

Kiơ̆ kơ bơngai joăt jang mŭk drăm, PGS. TS Trần Đình Thiên, đơ̆ng rŏng hlôi đei dôm anih jang kăl tơklep hơdai, vă đei tơdrong jang hơdai tơpă ‘noh tôch kơ kăl đei tơdrong jang hơdai đơ̆ng dôm anih jang mơdro sa tơ̆ tơring lơ̆m tơring păng lơ tơring: Tơdrong mă blŭng đơ̆ng rŏng kơ tơklep hơdai tơring ‘noh athei yak truh pơ gơ̆r 1 tơdrong jang pơm tơlĕch, pơm liơ vă kơ dôm anih jang, dôm dêh char gơh jang hơdai đei hăm băl. Tơdrong mă blŭng ‘noh tơdrong trĕng lăng lơ̆m chĕng hơmet teh hăm tơring ‘noh athei pơm đei dôm tơring hơtŏk tơiung tơdrong jang, păng thoi noh ‘noh mă gơh jang hơdai đei. Pơm tơdrong jang mŭk drăm kơ dih sư athei dôm anih mơdro sa tơmơ̆t jên jang lơ̆m noh ‘noh jĭ athei jang hơdai. Mă 2 ‘noh găh tơdrong tơchơ̆t, khôi luơ̆t ‘noh dôm tơdrong hơlen lăng đunh kơ âu akhan bơ̆n đei tơring ‘noh jĭ tơring teh đĕch, mă oei tơring vă jang hơdai hơtŏk tơiung ‘noh tơdrong tơchơ̆t, khôi luơ̆t bơ̆n tam mă đei. Athei đei dôm tơdrong jang hơdai tơring athei vei sơđơ̆ng akhan dôm tơdrong jang ‘noh sư tơklep hơdai tơ ring hăm băl vă hoei kơ đei pơgăn... ăn oei hrei ‘nâu đơ̆ng 2dêh char ƀơ̆t lăp hơtăih băl 1 pôm gŏch mă ưh kơ gơh pơm liơ vă tơklep hơdai đei....  

Băt rơđăh, tơdrong gĭt kăl hloh ‘noh jĭ pơ jing, chih pơ keh tơdrong tơchơ̆t păng ưh kơ pơ dơh hơmet ming ‘lơ̆ng hơnih tơmơ̆t jên jang đơ̆ng rim tơring klĕp truh tơring păng lơ tơring, kiơ̆ đơ̆ng noh mă pơm tơdrong hiôk vă sơng đei tơmơ̆t jên jang hơtŏk tơiung anih jang kăl tơring ‘nao, să păng đei yua nhen nơ̆r tơgop đơ̆ng yă Nguyễn Thị Bích Ngọc Phŏ kơdră Anih tơm tơlĕch nơ̆r sơkơ̆t păng tơmơ̆t jên jang: Khŭl kơdră teh đak rim sơnăm kŭm hlôi tơlĕch tơdrongt ơchơ̆t đơ̆ng Khŭl kơdră teh đak găh tơplih ‘lơ̆ng hơnih tơmơ̆t jên jang tĕch mơdro. Yua thoi noh, nhôn kŭm athei dôm tơring lơ̆m tơring kăl akŏm tơlĕch jang 1 trong đei yua dôm tơdrong tơchơ̆t âu vă hơmet ming hla ar  hành chính, pơm rim tơdrong hiôk vă sơng đei tơmơ̆t jên jang lơ̆m hơtŏk tơơiung anih jang kăl. Rim tơring lơ̆m tơring ‘noh kăl kơchăng jang hơdai, hơnơ̆ng pơgơ̆r hop akŏm pơ trŭt tơmơ̆t jên jang kiơ̆ tơring păng pơ jing, tơlĕch ăn dôm tơdrong jang sơng đei tơmơ̆t jên jang  kiơ̆ trong PPP jăl jang 2021-2030 đei hloi dôm trong jang tơgŭm vă sơng đei tơmơ̆t jên jang kơ dih, kiơ̆ đơ̆ng noh tơgŭm anih mơdro sa hlôh rơđăh păng pơm đon lui mưh vang tơmơ̆t jên jang hơtŏk tơiung anih jang kăl ..../.