Ăn tơgop nơ̆r lơ̆m Tơdrong tơchơ̆t đơ̆ng Hơnih bơ̆ jang Khul kơdră chĕp pơgơ̆r Kuô̆k hô̆i hăm Khul kơdră Hơnih bơ̆ jang Trung ương MTTQ (krao vă kơđeh ‘noh tơdrong tơchơ̆t kơsô̆ 525) găh tơdrong tơƀơ̆p pơma dơnuh hăm bơngai tăh hla đơ̆ng khul kơdră tang măt Kuô̆k hô̆i, rim kơdră tang măt pơma hơdăh tơdrong “kơdră tang măt năm tơƀơ̆p pơma dơnuh hăm bơngai tăh hla mă lei lăp chă tơ oei mơ̆ng”.

Kơdră chĕp pơgơ̆r Hơnih bơ̆ jang Tang măt kon pơlei Dương Thanh Bình tơbăt, hloh 10 sơnăm jang kjiơ̆ Tơdrong tơchơ̆t kơsô̆ 525, lơ kơdră tang măt Kuô̆k hô̆i jang kiơ̆ ‘lơ̆ng tơdrong tơƀơ̆p pơma dơnuh hăm bơngai tăh hla hăm trong phara dih băl; chih akŏm, chă tơchĕng hơlen păng pơtruh lơ nơ̆r tơgop đơ̆ng bơbngai tăh hla ăn rim hơnih bơ̆ jang kơpal xek tơlang. Mă lei, Kơ iĕng Kơdră chĕp pơgơ̆r Kuô̆k hô̆i Trần Quang Phương pơma hơdăh, tơdrong kăl hơmet ming găh trong pơgơ̆r, adoi nhen dôm bơngai kăl tơƀơ̆p pơma dơnuh, mă kăl đei tơdrong “kơdră tang măt năm tơƀơ̆p pơma dơnuh hăm bơngai tăh hla mă lei lăp chă tơ oei mơ̆ng”:  “Tơƀơ̆p bơngai tăh hla hrei au mă trŏ jing “tơpôl bơngai tăh hla: nhen lĕ bơngai tăh hla ‘noh đei pơtruh đơ̆ng rim kang ƀô̆ rim hơnih bơ̆ jang kơ tơring, mĭnh ƀar ‘nu ‘nŏh kang ƀô̆ kĕch mang sơ̆, kang ƀô̆ hlôi pơdơ̆h jang đei kon pơlei yom, oei tim mă đei lơ hăm rim bơngai. Trong pơgơ̆r đei lơ trong: tơƀơ̆p hơnơ̆ng, tơƀơ̆p pơma dơnuh kiơ̆ trong jang, pơma dơnuh kiơ̆ trư̆k tuyên, pơma dơnuh kơtă ... ‘noh kăl tơplih ‘nao. Găh tơdrong chih akŏm dôm nơ̆r tơgop, nơ̆r apĭnh athei đơ̆ng bơngai tăh hla, xek tơlang păng tơl hơdăh nơ̆r apĭnh păng dăr lăng tơdrong xek tơlang nơ̆r tơblang ‘noh”.

Găh Kơ iĕng Kơdră chĕp pơgơ̆r Kuô̆k hô̆i Nguyễn Khắc Định ‘noh pơma tơbăt mĭnh tơdrong ƀôh hơdăh anai:“Đei dêh char vang yak hơdoi hăm khul kơdră tang măt năm truh hơnih tăh hla păng năm hơnơ̆ng prăt jăl jang. Lơ loh, pêng ‘nu bơngai tang măt tơ̆ 3 apŭng ‘nŏh hơnơ̆ng tơplih dih băl kơ pêng apŭng ‘nŏh. Mĭnh ‘nu bơngai tang măt ‘nŏh tang măt iung pơma tơblang hơdăh, mĭnh ‘nu bơngai kơchư̆k iĕ ƀiơ̆, đei ‘măng lăp chă mơ̆ng đơ̆ng blŭng truh pơgơ̆r đang ưh kơ đei chă pơma hiă mĭnh nơ̆r.Găh bơngai tang măt tih ‘nŏh iŏk jang tơgoăt iŏk, tơblang hơdăh. Kơ yuơ lơ loh đei dôm kơdră tang măt năm tơƀơ̆p pơma dơnuh hăm bơngai tăh hla mă lei lăp chă mơ̆ng đĕch, ‘nau jĭ mĭnh tơdrong đei ƀôh tơpă lơ̆m yan au”.

Rim kơdră tang măt chă apĭnh hăm rim tơring đei lơ Kơdră tang măt Kuô̆k hô̆i kăl pơjing đei lơ khul vă đei lơ khul păng ‘măng năm tơƀơ̆p pơma dơnuh hăm bơngai tăh hla lơ ƀiơ̆. Adoi, lơ̆m tơƀơ̆p pơma dơnuh hăm bơngai tăh hla mă kăl akŏm lơ̆m rim tơdrong nhen erih sa, hŏk pơhrăm, bơ̆ jang, groi teh … rim tơdrong găh trong gơ̆h jang kơ tơring, đei ƀơm truh tơdrong đei iŏk yua ăn kon pơlei. Kơ yuơ lơ loh, lơ ‘măng kăl đei kơdră chĕp pơgơ̆r tơring vang năm tơƀơ̆p pơma dơnuh hăm bơngai tăh hla vă tơgoăt iŏk dôm nơ̆r tơgop, dôm tơdrong mă kơ dih gơ̆h bơ̆ jang tơlang ăn.

Tơ̆ hop akom, Kơdră chĕp pơgơ̆r Kuô̆k hô̆i Vương Đình Huệ pơma hơdăh: Kơdră tang măt Kuô̆k hô̆i ‘nŏh dôm bơngai tang măt ăn jơhngơ̆m đon hơpơi ‘meh vă đơ̆ng kon pơlei tơ̆ tơring pôk tơmơ̆t bơ̆n păng đơ̆ng kon pơlei lơ̆m teh đak, chiu pŭ tơ̆ hơnăp bơngai tăh hla păng Kuô̆k hô̆i. Kơ yuơ lơ ôh, tơdrong tơƀơ̆p pơma dơnuh hăm bơngai tăh hla ưh khan tơ̆ tơring pôk tơmơ̆t mă lei oei tơ̆ hơnih bơ̆ jang hloi:“Lơ̆m tơdrong tơchơ̆t bơngai tang măt Kuŏk hô̆i jei pơma truh ‘noh bơngai tang măt kăl hơnơ̆ng tơƀơ̆p pơma dơnuh hăm kon pơlei, mơ̆ng kon pơlei tơgop nơ̆r, đei kon pơlei yom kiơ̆. Khôi luơ̆t bơ̆ jang Kuô̆k hô̆i hơmet ming sơnăm 2020, đei nơ̆r pơma: Kơdră tang măt Kuô̆k hô̆i kăl hơnơ̆ng tơƀơ̆p pơma dơnuh hăm bơngai tăh hla tơchă băt dôm tơdrong hơpơi ‘meh vă đơ̆ng bơngai tăh hla. Bơngai tang măt Kuô̆k hô̆i ‘nŏh tơƀơ̆p pơma dơnuh hăm bơngai tăh hla kiơ̆ tơdrong pơgơ̆r tơƀơ̆p pơma dơnuh hăm bơngai tăh hla đơ̆ng Khul tang măt Kuô̆k hô̆i ‘nŏh mĭnh kơ loăi. Kơ loăi mă ƀar ‘nŏh tơƀơ̆p pơma dơnuh hăm bơngai tăh hla tơ̆ tơring oei păng tơ̆ hơnih bơ̆ jang. Tơdrong tơchơ̆t truh au kơnh jei kăl pơma hơdăh hloh dơ̆ng tơdrong ‘nau,trong pơgơ̆r lơ liơ đơ̆ng noh pơtho tơbăt hơdăh”.

Hơnih bơ̆ jang chĕp pơgơ̆r Kuô̆k hô̆i drơ̆ng mĭnh nơ̆r tơdrong hơmet ming, tơmơ̆t dơ̆ng Tơdrong tơchơ̆t kơsô̆ 525, tơmơ̆t lơ̆m tơdrong jang pơjing Tơdrong tơchơ̆t đơ̆ng Hơnih bơ̆ jang chĕp pơgơ̆r Kuô̆k hô̆i, pơjao ăn Hơnih bơ̆ jang tang măt kon pơlei pơm tơm iung jang hơdoi hăm rim hơnih bơ̆ jang đei ƀơm truh vă pơjing Tơdrong tơchơ̆t kiơ̆ ƀlep tơdrong tơchơ̆t kơ Khôi luơ̆t. 

Jei tơ̆ ‘măng hop akŏm au, Hơnih bơ̆ jang chĕp pơgơ̆r Kuô̆k hô̆i lăng hơlen tơroi tơbăt bơ̆ jang tang măt kon pơlei kơ Kuô̆k hô̆i khei 5 păng khei 6 au ki.Kơdră chĕp pơgơ̆r Hơnih bơ̆ jang Tư pháp yă Lê Thị Nga pơma tơbăt tơdrong mĕ ƀă hŏk tro chă pơrĕng prăt măng vă ba hal bơar ăn kon hơ ‘lơ̆p mơ̆t hŏk lăm 10, ‘nau jing mĭnh tơdrong mơnat tat hăm hŏk tro:“Tơdrong mơmat hăm hŏk tro pơlong mơ̆t hŏk lăm 10 tơ̆ Hà Nội, pơlei tơm Hồ Chí Minh ‘noh đei ƀôh hơnơ̆ng lơ̆m lơ sơnăm kơ au. Pơlong mơ̆t hŏk lăm 10 hrei au ‘nŏh oei tơnap hloh lơ̆m ‘măng pơlong mơ̆t hŏk Đăi hŏk dơ̆ng. Hăm rŏ kơ yuơ bơ̆n ưh kơ măh kơtang hnam trương jăl pêng teh đak dăh mă lơ liơ păng tơdrong mă au ‘nŏh xek tơlang lơ liơ? Khul kơdră Teh đak hlôi athei Hơnih tơm vei lăng hnam trương pơtho pơhrăm tơroi tơbăt ‘noh nhôn athei kăl chih tơmơ̆t dơ̆ng tơdrong au lơ̆m hla bơar chih tơbăt bơ̆ jang tang măt kon pơlei”.