Kiơ̆ đơ̆ng Dơnŏ anĭh tơm vei lăng Tơdrong jang Việt Nam, đơ̆ng khei 9/2022 trŭh đĭ năr 10/12/2022 hlôi đei 1.242 hơnĭh mơdro sa tơƀơ̆p tơnap tap, hlôi kăt tơjur tơdrong pơkăp tĕch răt tơmam drăm kơna măh tơjur jơ jang kơ 482.120 bơngai jang. Lơ̆m au, tơjur jơ jang dăh mă pơdơ̆h jang mă lei oei ăn sa jên khei hăm 433.908 ‘nu bơngai, tơmơ̆t 90% akŏp măt bơngai đei ƀơm kơnê̆. Đei dang 6.600 ‘nu bơngai măh pơdơ̆h kĭ pơkăp jang dơ̆ng đunh khei ‘năr, pơdơ̆h jang ư̆h kơ sa jên khei.

Tơdrong hơnĭh mơdro sa kăt tơjur kĭ pơkăp tĕch răt tơmam drăm, bơngai jang hiong tơdrong jang dăh mă jang tŏ sĕt, pơm ăn đei ƀơm kơnê̆ tĭh tên, mă kăl lơ̆m khei ‘năr Têt Nguyên đán vă jê̆ trŭh. Hơnĭh jang mei hơbĕn ao ‘nŏh mĭnh hơnĭh mơdro sa đei ƀơm kơnê̆ kơtang hlŏh mưh tơdrong kĭ pơkăp răt iŏk tơmam drăm lơ̆m hơtuch sơnăm kơ lơ hơnĭh mơdro sa đei kăt tơjur pơkăp tĕch răt tơmam drăm đơ̆ng 15% truh 50%, ‘nŏh jĭ pơm kơnê̆ kơtang trŭh kơ trĭu ‘nu bơngai jang. Ƀok Trương Văn Cẩm, Kơ iĕng Kơdră chĕp pơgơ̆r Khŭl Hơnĭh jang Tanh mei Việt Nam tơlĕch nơ̆r athei:“Đei dôm tơdrong mă trŭh dang ei nhôn lăng akhan hơnĭh mơdro sơng iŏk đei tơnô̆ tơgŭm djru găh jang sa oei sa păng tơdrong jang 48,5 rơbau ti ăn bơngai jang; 110.000 ti hlak jên tơgum djru ăn hơnĭh mơdro sa, lơ̆m au đei ăn tơgŭm kon jên chĕh 2%, bơ̆n oei tim mă jang đei ‘mơ̆i. Tơnô̆ VAT tơjur thuê̆ 2% ‘nŏh nhôn athei hơnơ̆ng pơm kiơ̆ ăn hơnĭh mơdro sa. Dôm trong jang tơgŭm ăn găh ƀao hiêm tơpôl, ƀao hiêm jang pơgang oei đei lơ trodrong tim mă lăp mă nhôn hlôi tơbăt ăn jei athei chă tơchĕng hơlen vă đei trong xek tơlang pơ ‘lơ̆ng”

Kiơ̆ đơ̆ng yă Trần Thị Lan Anh, Tổng thư ký Khŭl mơdro sa păng Kmăi kmŏk Việt Nam, tơdrong jang pơm tơlĕch tech mơdro kơ hơnĭh mơdro sa ư̆h kơ gan hơ iă lơm dôm khei hơtuch sơnăm păng tơchĕng hơdrol gô pơdui đunh rŏ lăng trŭh jăl 1 sơnăm au hloi.“Tơ̆ hơnăp dôm tơdrong tơnap tap au, Khŭl mơdro sa păng Kmăi kmŏk Việt Nam (VCCI) apĭnh athei kăl pơm sơđơ̆ng mŭk drăm, đei rim trong jang pơtrŭt tĕch răt tơmam drăm lơ̆m teh đak, tơgŭm djru pơtrŭt mơdro sa, tơchă hơnĭh tĕch mơdro hle, hơnĭh đe răt iŏk ‘nao. Adoi, kăl hơnơ̆ng pơm pơkeh păng atŏk tơ iung rim trong jang tơgŭm djru găh kon jên hu bơ̆ jang; trong jang tơgŭm ăn tŏk iŏk jên, pơm sơđơ̆ng erĭh sa jang sa tơpôl; lơ̆m au iung jang hơdrol tơgŭm djru rim hơnĭh mơdro sa păh ai păng iĕ. Kăl hơmet ming rim trong jang hơnĭh iung jang trŏ lăp hlŏh hăm yan au, pơtho tơdrong jang păng pơtho ming tơdrong jang”

Lơ̆m khei năr au, ƀok Ngọ Duy Hiểu, Kơ iĕng Kơdră chĕp pơgơ̆r Dơnŏ anĭh tơm vei lăng Tơdrong jang Việt Nam akhan, kăl đei lơ trong jang hrơ̆p lei lăi, mĭnh păh tơgŭm djru lơ̆m khei ‘năr kơđeh tơgŭm ăn bơngai jang yak hlŏh tơnap tap, dơ̆ng kơ jăp tơ̆ hơnih jang dăh mă hrôih năm jang dơ̆ng, adoi tơgŭm djru lơ̆m khei ‘năr đunh vă atŏk kơtang tơdrong gơ̆h nĭt kơ bơngai jang tơ̆ hơnăp sar bar, tơplĭh kơ hơnĭh jang sa:“Mă blŭng, kăl atŏk kơtang tơroi tơbăt hơnĭh tơchă bơngai jang, tơlĕch jang rim trong jang tơgŭm ăn bơngai jang ƀônh tơchă đei tơdrong jang, hăm rim hơnĭh krao tơmơ̆t ‘lơ̆ng, rim hơnĭh mơdro sa, khŭl jang tŏk bŏk tơchă bơngai jang. Adoi, kiơ̆ yok hơnăp jang kơ rim khul krao tơmơ̆t bơngai jang lơ̆m tơgoăt dĭh băl vă tơroi tơbăt tơdrong jang ăn bơngai jang đơ̆ng rim hơnĭh mơdro sa tơm ư̆h kơ kĕ vă krao tơmơ̆t bơngai jang ăn rim hơnĭh mơdro sa tơm anai”

Vă hơmet pơ ‘lơ̆ng dôm tơdrong tơnap tap tơ̆ hơnăp kơnh, ƀok Vũ Trọng Bình, Kơdră chĕp pơgơ̆r Hơnĭh vei lăng Tơdrong jang găh Dơnŏ anĭh tơm vei lăng Tơdrong jang-Bơngai rơka păng Tơpôl akhan, kăl đei trong hơmet pơ ‘lơ̆ng tơ̆ dôm tơdrong jang păng sơđơ̆ng erĭh sa tơpôl. Dang ei,  Dơnŏ anĭh tơm vei lăng Tơdrong jang-Bơngai rơka păng Tơpôl tŏk bŏk iung jang hơdoi hăm rim hơnĭh tơm, hơnĭh bơ̆ jang hơtŏ hăm hơnĭh tơm pơtrŭh ăn Khŭl kơdră chĕp pơgơ̆r Teh đak pơjing Tơdrong tơchơ̆t găh atŏk tơ iung hơnih jang ‘lơ̆ng hơ iă vă hơmet pơ ‘lơ̆ng tĕnh koăng mŭk drăm-tơpôl.“Dang ei đei mĭnh tơdrong kăl hlŏh pơm lơ liơ ‘nŏh tơgoăt dĭh băl đĭ đăng lơ̆m teh đak rim hơnĭh mơdro sa bơ̆ jang krao tơmơ̆t bơngai jang lơ̆m teh đak, teh đak đe păng tơdrong jang, ‘nŏh Bình Dương păng mĭnh ƀar tơring tŏk bŏk athei, rŏ năng bơ̆n pơjing mĭnh khul krao tơmơ̆t bơngai jang. Pơjing hơnĭh tơƀô̆h tơbăt tơdrong jang au tơgŭm ăn tĕh đak tơlĕch jang tơtgŭm djru ‘lơ̆ng hlŏh dơ̆ng”

Tơ̆ hơnăp dôm tơdrong tơnap tap ƀơ̆t măt mư̆h Têt nguyên đán tŏk bŏk vă trŭh kăl đei Khŭl kơdră chep pơgơ̆r Teh đak, rim Hơnih tơm, hơnih bơ̆ jang đei ƀơm trŭh tơlĕch jang hloi rim trong jang kăl hlŏh vă pơm dă ƀiơ̆ tơnap tap ăn rimhơnĭh mơdro sa păng bơngai jang, vei kơjăp khŭl jang bơ̆ jang gơ̆h, tơgop pơm sơđơ̆ng bơngai jang, iung jang hloi ăn chăl sơnăm hơmet pơ ‘lơ̆ng lơ̆m sơnăm 2023.