Tơ̆ jơ bơ̆ jang, lăp đơ̆ng rŏng mơ̆ng kơdră tang măt ăn Khul kơdră chĕp pơgơ̆r Teh đak păng Khul bơ̆ jang Dăr lăng đŏk Hla bơar tơbăt tơdrong jang kiơ̆ păng  Hla bơar tơbăt lăng hơlen ‘măng mă blŭng đơ̆ng Khul bơ̆ jang Dăr lăng găh Tơdrong jang kiơ̆ Tơdrong tơchơ̆t kơsô̆ 88 păng Tơdrong tơchơ̆t 51 kơ Kuô̆k hô̆i găh tơplih ‘nao tơdrong jang pơtho pơhrăm păng kơsơ̆p hla bơar pơtho jăl pêng, rim kơdră lơ̆m Khul bơ̆ jang Dăr lăng păng kơdră tang măt hlôi pơma dơnuh găh rim tơdrong lơ̆m 2 hla bơar tơbăt tơdrong bơ̆ jang au. Lơ̆m au, đei rim tơdrong nhen: lăng hơlen găh Dôm tơdrong jang tơm păng rim tơdrong pơtho pơhrăm; Găh tơdrong tơplih ‘nao trong pơtho, trong hơlen tơdrong ‘lơ̆ng pơtho pơhrăm; Tơdrong chih tơlĕch, hơlen, tơchơ̆t, pơm tơlĕch păng kơjă kơsơ̆p hla bơar hŏk; Dôm tơdrong tim mă ‘lơ̆ng păng tơlĕch nơ̆r hơmet ming hăm tơdrong khul ƀok thây kô pơtho jăl pêng; Hnam trương, kmăi mŏk tơgŭm ăn pơtho pơhrăm kiơ̆ trong ‘nao.  

Iung pơma tơ̆ jơ bơ̆ jang, Kơ iĕng Kơdră chĕp pơgơ̆r Kuô̆k hô̆i Trần Thanh Mẫn sơkơ̆t hơdăh, rim nơ̆r tơgop tôch tơpăt, trŏ lăp ‘lơ̆ng. Khul bơ̆ jang dăr lăng tơgoăt iŏk tôm tong păng gô chă hơlen mă hơdăh, pơm pơkeh Hla bơar tơbăt pơtôch dăr lăng păng trong vă pơjing Tơdrong tơchơ̆t vă Hơnih bơ̆ jang Khul kơdră chĕp pơgơ̆r Kuô̆k hô̆i tơlĕch jang dăr lăng hơlen tơ̆ ‘Măng hop akŏm khei 8/2023. Hăm nơ̆r tơgop đơ̆ng Khul bơ̆ jang dăr lăng păng tang măt ăn rim hơnih tơm, hơnih bơ̆ jang tơ̆ jơ bơ̆ jang, athei Khul kơdră chĕp pơgơ̆r Teh đak chă tơchĕng hơlen, tơgoăt iŏk tôm tong vă pơm pơkeh hla bơar tơbăt tơdrong bơ̆ jang tơblang hơdăh, tơmơ̆t dơ̆ng pơtruh ăn Khul bơ̆ jang Dăr lăng. Kơ iĕng Kơdră chĕp pơgơ̆r Kuô̆k hô̆i Trần Thanh Mẫn athei Khul kơdră chĕp pơgơ̆r Teh đak kăl lăng ba truh 5 tơdrong tơm, lơ̆m au đei tơdrong găh khul ƀok thây kô pơtho:“Găh khul ƀok thây kô pơtho, ‘nau jing tơdrong kăl hloh sơđơ̆ng ăn tơdrong iŏk đei jơnei kơ tơlĕch jang kiơ̆ Tơdrong jang pơtho pơhrăm jăl pêng kiơ̆ trong ‘nao. Athei Khul kơdră chĕp pơgơ̆r teh đak pơrô̆ athei rim hơnih tơm đei ƀơm truh dăr lăng hơlen tôm tong găh hơmet pơ ‘lơ̆ng, tơdrong ‘meh vă atŏk tơ iung khul ƀok thây kô pơtho lơ̆m khei năr kơnh păng đei trong jang mă trŏ lăp, tơtom vă hơmet pơ ‘lơ̆ng tơdrong ưh kơ măh ƀok thây kô pơtho păng khul vă tơmơ̆t pơm ƀok thây kô pơtho; atŏk kơtang pơtho pơhrăm, pơtho ming dơ̆ng ăn ƀok thây kô pơtho vă trŏ lăp hăm Tơdrong pơtho pơhrăm jăl pêng sơnăm 2018”.

Kơ iĕng Kơdră chĕp pơgơ̆r Kuô̆k hô̆i Trần Thanh Mẫn jei athei Khul kơdră chĕp pơgơ̆r Teh đak lăng ba kơjăp pơrô̆ jang dăr lăng, lăng hơlen tơdrong yan au păng tơdra hơdrol tơdrong ‘meh vă tơmam drăm, kmăi kmŏk pơtho hŏk pơhrăm; đei trong jang tơgŭm ăn rim tơring hơmet pơ ‘lơ̆ng tơnap tap, tơhlăk tơhlĭn lơ̆m tơlĕch jang kiơ̆. Hơnơ̆ng tơlĕch jang hơdrol, jang kiơ̆ kơjăp tơdrong pơprŏ kon jên ăn pơtho pơhrăm kiơ̆ tơdrong tơchơ̆t; Adoi atŏk kơtang bơ̆ jang dăr lăng, lăng hơlen lơ̆m jang kiơ̆ tơdrong jang pơtho pơhrăm, kơsơ̆p hla bơar hŏk pơhrăm.

Hơdrol kơ ‘nŏh, lơ̆m khei 4/2023, Khul bơ̆ jang dăr lăng kơ Hơnih bơ̆ jang chĕp pơgơ̆r Kuô̆k hô̆i hlôi bơ̆ jang hăm Hơnih tơm vei lăng Hnam trương pơtho pơhrăm găh jang kiơ̆ Tơdrong Tơchơ̆t kơsô̆ 88 păng Tơdrong tơchơ̆t kơsô̆ 51 đơ̆ng Kuô̆k hô̆i găh tơplih ‘nao Trong pơtho pơhrăm, kơsơ̆p hla bơar hŏk pơhrăm jăl pêng. Khul bơ̆ jang dăr lăng ƀôh oei đei mĭnh ƀar tơdrong kăl pơm hơdăh lơ̆m au tơdrong sơđơ̆ng kon jên jang ăn tơlĕch jang kiơ̆ tơdrong jang au adoi nhen jang kiơ̆ jơnei kơ tơdrong ‘mĕh vă tơpôl vang iung jang lơ̆m pơtho pơhrăm. Yă Vũ Thị Lưu Mai, Kơ iĕng kơdră chĕp pơgơ̆r Hơnih bơ̆ jang Jên hu-Kon jên bơ̆ jang kơ Kuô̆k hô̆i pơma:“Lơ̆m lơ tơdrong jang anai ‘nŏh bơ̆n gơ̆h vang chă hơvơn tơpôl vang tơra iung jang kiơ̆, mă lei hăm tơdrong pơtho pơhrăm ‘nŏh tơdrong chă hơvơn rim khul jang mŭk drăm anai vang iung jang ‘noh jei gô tơjră muh măt hăm lơ tơdrong tơnap tap. Kơ yuơ lơ loh, tơdăh bơ̆n pơm kiơ̆ tơdrong au ‘nŏh hơvơn kon jên jang đơ̆ng tơpôl rơvơn dăh mă tơnap tap lơ liơ ‘nŏh jei kăl apĭnh Khul kơdră chĕp pơgơ̆r Teh đak tơl mă hơdăh tơdrong au hăm kĕ jang ưh lơ̆m chă hơvơn tơpôl vang iung jang 2 Tơdrong tơchơ̆t đơ̆ng Kuôk hô̆i au”.

Lơ̆m khei 6 au ki, Kơdră chĕp pơgơ̆r Kuô̆k hô̆i Vương Đình Huệ hlôi pơm tơm jơ bơ̆ jang đơ̆ng Khul kơdră Kuô̆k hô̆i hăm Khul bơ̆ jang dăr lăng Kơ Hơnih bơ̆ jang Khul kơdră chĕp pơgơ̆r Kuô̆k hô̆i găh “Tơdrong jang kiơ̆ Tơdrong tơchơ̆t kơsô̆ 88 păng Tơdrong tơchơ̆t 51 kơ Kuô̆k hô̆i găh tơplih ‘nao tơdrong jang pơtho pơhrăm păng kơsơ̆p hla bơar pơtho jăl pêng”. ‘Nau jĭ mĭnh lơ̆m 4 tơdrong tơm vă dăr lăng hơlen đơ̆ng Kuô̆k hô̆i, Hơnĭh bơ̆ jang Khul kơdră chĕp pơgơ̆r Kuô̆k hô̆i lơ̆m sơnăm 2023. Kơdră chĕp pơgơ̆r Kuô̆k hô̆i hôn bơnê kơtang Khul bơ̆ jang dăr lăng hlôi bơ̆ jang ‘lơ̆ng, trŏ ƀlep hăm rim tơdrong tơchơ̆t đơ̆ng Kuô̆k hô̆i păng Hơnih bơ̆ jang Khul kơdră chĕp pơgơ̆r Kuô̆k hô̆i, bơ̆ jang tôch hơlen hăm tơdrong chĕp pơgơ̆r ‘lơ̆ng, hơnăp jang kơtang chih tơbăt lơ̆m hla bơar đơ̆ng Kơdră chĕp pơgơ̆r Khul bơ̆ jang dăr lăng, Kơ iĕng Kơdră chĕp pơgơ̆r Kuô̆k hô̆i Trần Thanh Mẫn.