Hloh đơ̆ng dăr lăng đei ƀôh, tơdrong jang pơtho pơhrăm sơnăm 2018 đei tơ iung pơjing tôch hơlen, tôch kơ trŏ lăp, hlôi tơplih trong pơtho ăn tơdrong hlôh vao jing pơchoh trong atŏk tơ iung jơhngơ̆m đon ‘lơ̆ng, jơhngơ̆m đon hlă ăn hŏk tro. Dôm tơdrong lơ̆m kơsơ̆p hla bơar chih tơbăt hơdăh dôm tơdrong kăl vă iŏk đei jơnei kơ Tơdrong jang pơtho pơhrăm kiơ̆ chăl hle. Tơdrong chih pơm tơlĕch kơsơ̆p hla bơar hŏk hlôi hơvơn đei lơ bơngai joăt jang, bơngai jang khoa hŏk, ƀok thây kô gơ̆h hơgei vang tơgop.

Mă lei, dăr lăng jei đei ƀôh, tơdrong chih tơlĕch, jang kiơ̆, tơchơ̆t kơsơ̆p hla bơar hŏk oei đei lơ tơdrong tim mă lăp: Hơnih tơm vei lăng hnam trương pơth pơhrăm ưh kơ pơm tơlĕch đei mĭnh kơ loăi kơsơ̆p hla bơar hŏk kiơ̆ tơdrong Tơchơ̆t kơsô̆ 88 Kuô̆k hôi jăl XIII, tim mă jang kiơ̆ tôm tong sơnong ang kơ Teh đak, mă kăl lơ̆m tơdrong vei lăng, tơmơ̆t dơ̆ng, atŏk tơ iung dôm tơdrong pơtho pơhrăm chăl hle; vei lăng, hơmet ming kơjă kơsơ̆p hla bơar hŏk. Tơdrong jang pơlong năng kơsơ̆p hla bơar hŏk tim mă lăng kơjăp trŏ ƀlep, tơdrong hơlen tơchơ̆t, tơgoăt iŏk, hơmet ming kơsơ̆p hla bơar hŏk tim mă kơjăp, pơm ăn truh đeu glăi dôm tơdrong tơ̆ 18 kơsơ̆p hla bơar hŏk. Oei đei tơdrong hui kơ đei, ưh kơmăh kơsơ̆p hla bơar hŏk hăm mĭnh ƀar kơloăi kơsơ̆p hla bơar hŏk hơdrol kơ khei ‘năr vă mơ̆t hŏk sơnăm hŏk ‘nao. Kơdră chĕp pơgơ̆r Hơnih bơ̆jang Khôi luơ̆t kơ Kuô̆k hô̆i Hoàng Thanh Tùng akhan:"Dôm tơdrong tơhlăk tơhlĭn hrei au ‘nŏh tim mă tơlĕch jang kơtang lơ̆m tơlĕch tơdrong jang; dăh mă đei tơdrong tơnap tap lơ̆m jang kiơ̆ trong jang tơgŭm djru hŏk tro tơring hơtăih yăih; dăh mă kơsơ̆p hla bơar điên tư vă atŏk kơtang iŏk yua kmăi kmŏk kơtơ̆ng ang. Rŏ năng ưh khan hăm hla bơar mă lei kơsơ̆p hla bơar hŏk điện tử. Găh tơdrong pơm tơ-‘ngla tơdăh iŏk yua kơsơ̆p hla bơar hle. Hơlen mă brĕ hloh dơ̆ng dôm tơdrong tim mă lăp, tim mă ƀlep mưh bơ̆n ưh kơ đei mĭnh kơloăi kơsơp hla bơar hŏk kơ Teh đak, ‘moi kiơ̆ trong au kăl đei trong hơmet ming dôm tơdrong tim mă lăp, tim mă ƀlep au păng trong iung jang ‘nŏh đei lơ ưh lăp kăl lăp đei mĭnh trong jang pơm tơlĕch kơsơ̆p hla bơar hok ‘nao ‘nŏh ƀơ̆t au kăl hơlen kơtang hloh".

Tơdrong tơplih ‘nao trong pơtho pơhrăm, kơsơ̆p hla bơar hŏk ‘noh jing tơdrong jang kăl hloh, iŏk đei tơdrong lăng ba kơjăp đơ̆ng bơngai tăh hla păng kon pơlei. Kiơ̆ đơ̆ng rim kơdră tang măt, tơdrong pơtho pơhrăm chăl hle jĭ tôch kơ trŏ lăp, mă lei trong pơtho pơhrăm lăp sơkơ̆t hơdăh tơdrong hlôh vao. Mă lei tơdrong hlôh vao lơ̆m pơtho pơhrăm jĭ tôch gĭt kăl, kăl đei vei lăng năng tông kơjăp đơ̆ng teh đak. Bí thư Trung ương Đảng, Kơdră chĕp pơgơ̆r Hơnih bơ̆ jang Trung ương MTTQ Đỗ Văn Chiến athei: "Tơdrong kăl iung jang hloi ‘nŏh kăl hloh kăl đei trong bơ̆ jang vei lăng kơjăp đơ̆ng chih tơlĕch, in tơlĕch, tĕch tơlĕch păng bơ̆n kăl tơjur kơjă kơsơ̆p hla bơar hŏk au, teh đak vei lăng kơjă au. Tơdrong hơmet ming ‘nŏh jei kăl hloh, iung jang hloi. Kơ yuơ tơdăh ăn yă kiơ ăn dôm bơngai tơnap tap ‘nŏh kiơ̆ kơ ĭnh ăn “chư”’nŏh ‘lơ̆ng hơ iă hloh. Nơ̆r athei đơ̆ng Khul dăr lăng ‘nŏh jĭ tôch kơtrŏ lăp kơna kăl iung jang kiơ̆ dăh mă ưh lei kăl chă tơchĕng mă brĕ, tơl mă hơdăh hloh dơ̆ng".

Tơ̆ hop akŏm hơnih bơ̆ jang Kuô̆k hô̆i, Kơdră chĕp pơgơ̆r Kuô̆k hô̆i Vương Đình Huệ tơƀôh hơdăh tơdrong jang pơtho pơhrăm hle tơlĕch jang kiơ̆ hiơ hiơ̆ 30 khei pơtêng ‘mĕh vă. Kơdră chĕp pơgơ̆r Kuô̆k hô̆i akhan kăl lăng hơlen hơnăp jang kơ dôm bơngai jang tơplih ‘nao trong pơtho pơhrăm kơsơ̆p hla bơar ‘nao. Mă kăl, tơdrong lăng hơlen, tơgoăt iŏk, hơmet ming kơsơ̆p hla bơar hŏk tim mă kơjăp, pơm ăn truh đei glăi dôm tơdrong tơ̆ 18 kơsơ̆p hla bơar hŏk, mă kăl Kơsơ̆p hla bơar hŏk Tiếng Việt lăm 1, Khoa học tự nhiên lăm 6, Lịch sử lăm 11. Kơdră chĕp pơgơ̆r Kuô̆k hô̆i athei tĕnh koăng pơjing hla bơar pơtho tơbăt găh trong lăng hơlen kơsơ̆p hla bơar hŏk, sơkơ̆t hơdăh kơjă kơsơ̆p hla bơar hŏk, sơđơ̆ng vei lăng kơjăp kon jên pơm tơlĕch, pơm tơjur kon jên kơdranh vă pơm tơjur kơjă kơsơ̆p hla bơar hŏk. Kơdră chĕp pơgơ̆r Kuô̆k hô̆i athei jang kiơ̆ kơjăp dôm tơdrong lơ̆m tơdrong tơchơ̆t 88 Kuô̆k hô̆i găh tơplih ‘nao trong pơtho pơhrăm kơsơ̆p hla bơar hŏk pơhrăm hle: "Tơdrong tơchơ̆t 88 pơma hơdăh: Hơnih tơm vei lăng Hnam trương pơtho pơhrăm kăl chĕp pơgơ̆r pơm tơlĕch ‘nŏh mĭnh grup kơsơ̆p hla bơar hŏk pơhrăm tôm tong đơ̆ng lăm 1 truh lăm 12 đei 137 kơ loăi kơsơp hla bơar hŏk. Rim hơnih jang, rim bơngai anai đei pơtrŭt vang jang chih tơlĕch kơsơ̆p hla bơar hŏk minh dăh mă lơ kơloăi kơsơ̆p hla bơar hŏk mơ̆ng kiơ̆ kơdih gơ̆h, ư̆h kơ kăl mă iung jang chih tơlĕch tôm kơloăi kơsơ̆p hla bơar hŏk. Tơdrong tơchơ̆t 88 ‘nŏh lơ loh. Tơdrong đei ƀôh hrei au khul dăr lăng tơƀôh ăn ĭnh ƀôh jei kăl hơlen mă brĕ, kăl chă tơchĕng hơlen dơ̆ng".

Kơdră chĕp pơgơ̆r Kuô̆k hô̆i pơma hơdăh kăl hơnơ̆ng iung jang hơdrol, jang kiơ̆ kơjăp tơdrong tơlĕch ăn tôm kon kên ăn pơtho pơhrăm, mă kăl ‘nŏh kon jên tơlĕch jang kiơ̆ Tơdrong jang Pơtho pơhrăm hle sơnăm 2018. Mă kăl ‘noh, kăl atŏk kơtang pơtho tơbăt, tơlĕch jang kiơ̆ kơtang jơ̆p jang hloh dơ̆ng truh hăm kang ƀô̆, ƀok thây kô pơtho, rim răih kon pơlei vă hlôh vao hlŏh dơ̆ng, đơ̆ng noh pơjing đei drơ̆ng mĭnh nơ̆r mưh tơlĕch jang kiơ̆ Tơdrong jang pơtho pơhrăm hle 2018 iŏk đei jơnei trong tơlĕch ăn.