Rim kơdră tang măt hơlen lơ̆m khei ‘năr tơdrong đak roi năr roi kơƀăh kơƀôch, ưh pă sơđơ̆ng ăn tơdrong ‘meh vă atŏk tơ iung mŭk drăm-tơpôl ‘noh tơdrong Trong vă pơjing Khôi luơ̆t vei lăng đak (hơmet ming) hơmet pơ ‘lơ̆ng, pơm hơdăh hloh dơ̆ng trong tơlĕch jang kăl hlŏh lơ̆m vei lăng năng tông đak, tơmơ̆t dơ̆ng dôm tơdrong kăl tơroi tơbăt hơdăh, apĭnh hơdrol vă iŏk yua đak lơ̆m teh ‘noh trŏ ƀlep hloh. Bơngai tang măt Lê Thị Ngọc Linh, Khul Bạc Liêu hơlen:“Hrei au tơdrong chă sir, iŏk yua đak lơ̆m teh kư̆ kă ưh kơ pơm kiơ̆ trong pơprŏ rŏ năng gô pơm ăn đak roi năr roi kơƀăh kơƀôch, pơm ‘mê̆ ‘mach đak lơ̆m teh. Lơ̆m Chăl 2, Apăng 52 tơdrong vă pơjing Khôi luơ̆t sir iŏk đak lơ̆m teh kơ rim ŭnh hnam vă pơyua ăn sŏ nhă đơ̆ng kơdih kăl tơroi mă hơdăh. ‘Moi kiơ̆ kơsô̆ chih jô̆ đơ̆ng hơnih bơ̆ jang vei lăng gô đei nơ̆r chă pơkă ăn tơtom găh tơdrong đak mă đe sư tŏk bŏk iŏk yua đei rim trong jang vei lăng năng tông mă trŏ lăp hloh”.

Pơma truh tơdrong găh đak sŏ nhă, rim kơdră tang măt athei kăl đei tơchơ̆t hơdăh hloh dơ̆ng trong vă jang vei lăng năng tông hăm rim hơnih pơtruh ăn đak sŏ nhă. Kơ yuơ găh đak pơtruh ăn sŏ nhă đei ƀơm kơtă truh jơhngơ̆m pran jăng kơ kon pơlei. Bơngai tang măt Huỳnh Thị Phúc pơma hơdăh:“Lơ̆m mĭnh ƀar tơdrong hơdăh kơ yuơ tơdrong ‘meh vă tôch kăl kơ đak sŏ nhă kơ kon pơlei tŏk kơtang pơtih gia nhen lơ̆m pơyan phang pơđang, tŏ đunh khei ‘năr ‘noh tơdrong ‘meh vă iŏk yua đak roi lơ pơtêng hăm tơdrong pơkăp gơ̆h iŏk yua đak. Ĭnh apĭnh athei pơjing dơ̆ng trong chă tơchĕng hơlen, tơmơ̆t dơ̆ng tơdrong tơchơ̆t pơkăp găh tơdrong ăn iŏk yua đak sơđơ̆ng măh kiơ̆ khei pơyan ‘meh vă păng tơdrong ƀôh hơdăh yan au lơ̆m tơdrong hơrih sa, jang sa, mơdro sa adoi nhen tơgŭm ăn tơdrong hơrih sa kơ kon pơlei”.

Trong vă pơjing Khôi luơ̆t hrei au lăp tơchơ̆t pơm pơ ‘lơ̆ng ăn iŏk yua đak, lơ̆m mă hrei au tơdrong hơmơt phang pơđang, ưh kơmăh đak hmă rŏ năng đei ƀôh hơnơ̆ng rim sơnăm, kiơ̆ đơ̆ng bơngai tang măt Nguyễn Thị Thu Thủy, Khul Bình Định, kăl đei trong jang tơdra hơdrol hrôih vă tơtom tơlĕch jang trŏ lăp:“Hơnih chih tơlĕch kăl tơchơ̆t hơdăh 2 sơnăm 1 ‘măng tơ iung pơjing trong jang ăn bơ̆ jang pơtruh đak sŏ nhă tơring kơdrơ̆m lơ̆m khei ‘năr tơplih tŏ ‘mi kial hrei au. Rim trong jang ăn rim tơring kơdrơ̆m đei ƀơm ưh kơ ‘lơ̆ng đơ̆ng đak ƀăt ƀoh hram păng dôm tơdrong đei ƀơm truh anai kơ yuơ tơplih tŏ ‘mi kial; vei lăng năng tông kơjăp tơdrong chă pơchoh đak ‘mê̆ ‘mach lơ̆m thoong hơboong đak vă iŏk yua đak pơtruh ăn tơring kơdrơ̆m, vă hoei iŏk yua đak ‘mê̆ mach đơ̆ng rim hnam kmăi pơm tơlĕch tơmam drăm găh tu đak, rim tơdrong hơmơt pơm ‘mê̆ ‘mach đơ̆ng rim dêh char găh tu thoong đak kroong; chă tơchĕng hơlen tơ iung pơjing rim trong tơdra hơdrol hơmơt đei tơdrong ưh sơđơ̆ng găh thoong đak”.

Pơma tơbăt hơdăh yan au tơ̆ đĭ đăng tơring tim mă tơ iung pơjing kmăi kmŏk hơlen hơdăh găh đak tơ̆ tơring, kơtơ̆ng ang, dôm tơdrong chih tơbăt găh đak oei tim mă hơdăh, bơngai tang măt Vương Thị Hương, khul Hà Giang pơma hơdăh:“Ĭnh lăp đon hăm tơdrong pơjing trong jang hơnih mong răk dôm hla bơar chih tơbăt găh đak lơ̆m teh đak vă kơ bơ̆n đei dôm kơtơ̆ng ang trŏ lăp dih băl. Mă lei lơ̆m trong vă pơjing khôi luơ̆t tim mă tơchơ̆t hơdăh. Kơ yuơ lơ loh, ĭnh apĭnh athei tơmơ̆t dơ̆ng găh khei ‘năr, jơ ‘năr jang keh đang lơ̆m tơ iung pơjing hơnih mong răk dôm hla bơar chih tơbăt găh đak kơ teh đak vă tơgŭm ăn bơ̆ jang vei lăng năng tông đak kiơ̆ kmăi kmŏk kơsô̆ kơ Trung ương păng tơring”.

Tơ̆ hơnăp dôm tơdrong tơplih ưh kơ măh ê găh tŏ ‘mi kial roi năr roi kơtang, bơngai tang măt Nguyễn Hữu Thông, khul Bình Thuận akhan, kăl tơchơ̆t mă hơdăh hlŏh dơ̆ng găh iŏk yua khoa hŏk, kmăi kmŏk lơ̆m vei lăng, sir iŏk, iŏk yua đak, tang găn hơlau tơdrong đei ƀơm kơnê̆ đơ̆ng đak pơm ăn:“Ĭnh athei tơmơ̆t dơ̆ng tơdrong chă tơchĕng hơlen trong jang kmăi kmŏk pơm rơgoh đak dơsĭ đei jing đak hmă vă pơjing đei lơ đak gơ̆h iŏk yua adoi nhen pơm sơđơ̆ng găh đak, mă kăl đak hmă tơgŭm ăn đak sŏ nhă păng choh jang sa kơ kon pơlei, mă kăl kon pơlei oei tơ̆ rim achon dơsĭ kơ bơ̆n lơ̆m jơ ‘năr kăl hloh, chăl 1, apăng 6 kơ trong vă pơjing khôi luơ̆t”.