VOV4.Bahnar - Giĕng âu ki, đei pơ gơ̆r Hop akŏm mă 7 kơ Anih chĕp kơ̆l pơ gơ̆r Kuô̆k hô̆i, tơ gop nơ̆r ăn lơ tơ drong gĭt kăl vă tơ roi ăn Kuô̆k hô̆i lơ̆m hop akŏm mă 3, pơ gơ̆r lơ̆m khei 5 truh. Lơ̆m nŏh, tơ drong tơ lĕch thim dơ̆ng “Mê đai druh dăm sŭng phŏng gơ̆h hơ gei” lơ̆m luơ̆t Pơ jei, pôk hơ păh (oei chih hơ met) 'nŏh jĭ tơ drong đei dôm bơ ngai tang măt păng bơ ngai tăh hla tơ rĕk truh.

Anih chĕp kơ̆l pơ gơ̆r Kuô̆k hô̆i akŏm tơ gop nơ̆r găh 1,2 tơ drong tih oei đei lơ nơ̆r pha ra băl vă tơ roi ăn Kuô̆k hô̆i set hơ len, drơ̆ng nơ̆r lơ̆m hop akŏm mă 3 đei: Set hơ len tơ lĕch dơ̆ng hơ năn xăh rơ gei, phương, thĭ trơ̆n rơ gei; tơ lĕch dơ̆ng Mê đai druh dăm sŭng phŏng gơ̆h hơ gei; găh grat tơ băt tơ drong jang kơ dêh char, lơ̆m nŏh đei Jơ nŭm pơ gơ̆r kon pơ lei dêh char, pơ tôch pôk hơ păh tơ mam ăn tơ drong vang iung tơ blăh; sek tơ lang dôm tơ drong glăi lơ̆m tơ drong pơ jei, pôk hơ păh.

Drơ̆ng nơ̆r tơ lĕch thim dơ̆ng hơ năn “Mê đai druh dăm sŭng phŏng rơ gei” lơ̆m luơ̆t oei chih hơ met ming ‘măng mă âu, Kơ dră vei lăng Khul jang kơ bơ ngai tang măt Kuô̆k hô̆i Nguyễn Thị Thanh pơ ma hơ dăh, khul druh dăm sŭng phŏng đei lơ kŏng tih, lôch tang hơ kâu, tơ gop tih tên ăn tơ drong jang atŭm kơ hơ drĕch hơ drung:

“Lơ̆m hla ar tơ roi 120 đei chih akhan, athei tơ jur ƀiơ̆ dôm tơ drong hơ păh kơ tĕh đak. Inh tơ chĕng 'nŏh jĭ trong jang trŏ, mă lei lăp tơ mât ăn tơ drong pơ jei, pôk hơ păh chăl hrei 'nâu păng ning mônh kơnh đĕch. Oei druh dăm sŭng phŏng 'nŏh jĭ tơ drong ƀơm truh khei 'năr iung tơ blăh sơ̆ păng dôm tơ drong oei đei dơ̆ng, oei tam mă lăp khei 'năr âu ki bơ̆n tam mă chih hơ met tơ tom. Grŭp bơ ngai âu, chăl 'nâu, đe yă ƀok năm tơ̆ kră ngăl bơih. Inh tơ chĕng tơ drong kiơ đei yoa ƀiơ̆, 'lơ̆ng ƀiơ̆ mưh chih hơ găt 'nŏh athei tơ chĕng hơ len vă chih tơ lĕch”.

Kŭm đei nơ̆r pơ ma thoi nŏh mơ̆n, Kơ dră Anih vei lăng jŏh ayŏ kơ dŏ xoang, pơ tho pơ hrăm kơ Kuô̆k hô̆i Nguyễn Đắc Vinh akhan: “’Nâu jĭ khul đei lơ tơ drong plang tih lơ̆m khei ‘năr tơ blăh sơ̆. Tơ pă mơ̆n tôch tơ găl. Găh luơ̆t vă bơ̆n đei 1 pôm Mê đai chih tơ băt hơ păh ăn khul linh lơ̆m tơ drong tơ blăh ‘nŏh inh tơ chĕng tôch tơ găl. Lăp hơ drô̆ khul linh vang năm tơ blăh păng 1,2 khul nai vang pơ vih ăn tơ drong tơ blăh ‘nŏh bơ̆n chă trong vă sek tơ lang pơm hơ tŏ âu”.

Kơ dră Kuô̆k hô̆i Vương Đình Huệ iung pơ ma lơ̆m hop akŏm

Dôm bơ ngai tang măt athei Khul kơ dră tĕh đak hơ nơ̆ng chă hơ len năng dôm bơ ngai jĭ Druh dăm sŭng phŏng vang iung tơ blăh sơ̆ tam mă iŏk đei tơ mam hơ păh đơ̆ng tơ drong hơ păh sơ̆ kiơ̆ tơ drong hơ găt. Thoi nŏh vă huei kơ lon tơ drong pôk hơ păh ăn dôm bơ ngai đei jơ nei, đei kŏng lơ̆m tơ drong tơ blăh păng pơ tho ăn dôm khul kơ dră tơ ring tơ rek truh, jang kiơ̆ dôm tơ drong tơ gŭm hăm Druh dăm sŭng phŏng vang iung tơ blăh sơ̆, bơ̆ jang '‘ơ̆ng tơdrong juăt “nhă đak ƀlŏk kơ tu”, “dŏng tơ gŭm ăn bơ ngai đei kŏng”.

Kơ dră Anih jang luơ̆t kơ Kuô̆k hô̆i Hoàng Thanh Tùng, đei nơ̆r pơ ma: “Trong hơ păh âu đei bơ̆n hơ met ming hăm grŭp bơ ngai tŏ sĕt ƀiơ̆, tơ drong hơ găt kơ jung ƀiơ̆ vă huei hơ drom lei lăi hăm tơ drong hơ păh mê đai nai. Mê nai đơ̆ng Đoàn thanh niên cộng sản Hồ Chí Minh hơ păh kiơ̆ đơ̆ng 1 anih jang chinh trĭ –tơ pôl kơ druh dăm hơ păh ăn druh dăm sŭng phŏng, ưh kơ sơ̆ hơ păh Mê đai đơ̆ng tĕh đak yoa Kơ dră tĕh đak kĭ tơ chơ̆t, kăp gĭt ƀiơ̆ thoi âu. 2 tơ drong ‘nâu tôch pha ra băl. Kơ na ưh gơ̆h pơ ma đei mê đai bơih ‘nŏh ưh pă gơ̆h hơ păh dơ̆ng grat ôh”.

Tơ̆ hop akŏm, Kơ dră Kuô̆k hô̆i Vương Đình Huệ athei pơm hơ dăh tơ drong hơ găt vă set hơ păh, atŭm hăm ‘nŏh tơ gŭm ăn tơ drong pơm tơ jur ƀiơ̆ grŭp vă pôk hơ păh, lăp hăm păh dôm bơ ngai đei jơ nei ‘lơ̆ng lơ̆m khei ‘năr iung tơ blăh đĕch: “Hơ len năng tơ drong đei ƀơm truh dơ̆ng. Tơ dăh bơ̆n rơih hơ met dơ̆ng ‘nŏh ưh kơ sĭ đĭ đăng. Đĭ đăng ‘nŏh sư jing lei lăi hăm mê đai. Lăp ‘măn ăn kơ sô̆ bơ ngai vang iung tơ blăh đĕch. Tơ drong ‘nŏh lăp hăm tơ drong jang hơ doi kiơ̆ nơ̆r tơ chơ̆t đơ̆ng Ƀan Bí thư. Oei Anih tơm Chinh trĭ pơ ma atŭm ‘nŏh tơ jur ƀiơ̆ grŭp bơ ngai vă hơ păh, ưh kơ sĭ ưh gơ̆h hơ păh thim bơ ngai ôh. Mă 2, gơ̆h chih hơ găt ưh kơ sĭ vă set hơ len đĭ đăng 1 ‘măng đĕch ôh. Bơ ngai yơ rơ đăh rơ đong, pơm hơ drol ăn hơ drol, ưh kơ sĭ pơm 1 ‘măng đĕch, tam mă jô̆ truh ning mônh kơnh đei bơ ngai lei lăi thoi nŏh dơ̆ng ‘nŏh bơ̆n athei set hơ len hơ păh dơ̆ng ‘năi.”

Kŭm tơ̆ hop akŏm mă 7 kơ Anih chĕp kơ̆l pơ gơ̆r Kuô̆k hô̆i, dôm bơ ngai tang măt athei chih tơ lĕch dơ̆ng hơ năn “xăh rơ gei” “phương, thĭ trơ̆n rơ gei”, ‘nŏh lăp hăm trong hơ nhăk tơ drong pơ jei băl năm truh tơ̆ tơ ring tơ rang panwg bơ ngai jang tơ păt. Găh tơ drong sek tơ lamng tơ drong glăi mưh pơ jei, pôk hơ păh kŭm đei lơ bơ ngai tang măt pơ ma nuh, pơm hơ dăh tơ drong sek tơ lang hăm dôm bơ ngai pơm glăi mưh hlôi iŏk đei tơ drong hơ păh dăh mă hơ năn pơ jei băl, tơ dăh ƀôh pơm glăi.

Dơ̆ng: Tơ blơ̆