VOV4.Bahnar - Tơ̆ hop akŏm mă 8, Anih chĕp kơ̆l pơ gơ̆r Kuô̆k hô̆i pơ ma nuh păng drơ̆ng nơ̆r hăm tơ drong kăl tơ lĕch tơ drong Tơ chơ̆t găh hơ năp jang, tơ drong jang, tơ drong gơ̆h jang păng bơ ngai jang lơ̆m Anih jang găh bơ ngai tang măt vă pơm lăp hăm tơ drong ‘mĕh vă tơ plih ‘nao, đei yoa lơ̆m tơ drong jang đơ̆ng Kuô̆k hô̆i, dôm anih jang kơ Kuô̆k hô̆i.

Vă đĭ đăng lăp đon hăm tơ drong chih hơ dăh dơ̆ng hơ năp jang Anih anih jang găh bơ ngai tang măt, Jơ nŭm pơ gơ̆r kon pơ lei, tơ drong pôk rơih găh Hơ năp vei lăng đơ̆ng Anih chĕh kơ̆l pơ gơ̆r Kuô̆k hô̆i vă pơm hơ dăh ƀiơ̆ hơ năp jang đơ̆ng Anih jang găh bơ ngai tang măt, 1,2 nơ̆r oei athei klăih song hơ dăh tơ drong jang, gơ̆h jang đơ̆ng Anih jang găh Bơ ngai tang măt hăm hơ năp jang kơ dôm anih jang, khul grŭp đei ƀơm truh vă huei hơ drom băl.

‘Măng hop akŏm mă 8 tơ gop nơ̆r hơ len năng Tơ drong Tơ chơ̆t găh Trong bơ̆ jang đơ̆ng Anih chĕp kơ̆l pơ gơ̆r Kuô̆k hô̆i

Pơ ma truh tơ drong Anih jang găh bơ ngai tang măt jang hơ doi hăm Anih jang luơ̆t roi tơ ƀôh, tơ gŭm ăn Anih chĕp kơ̆l pơ gơ̆r Kuô̆k hô̆i lơ̆m tơ drong tơ gop nơ̆r ăn tơ drong rôp, kron, vei lăng, tơ kêng bơ ngai tang măt Kuô̆k hô̆i, set hơ len anih oei, anih jang kơ bơ ngai tang măt Kuô̆k hô̆i hăm dôm bơ ngai tang măt Kuô̆k hô̆i đei ƀôh pơm glăi kiơ̆ Kơ dră Anih vei lăng tơ pôl kơ Kuô̆k hô̆i Nguyễn Thúy Anh ‘nâu jĭ hơ năp jang đơ̆ng Anih jang Tư phap:

“Tơ drong set hơ len, rôp vei bơ ngai tang măt, Anih jang Tư phap athei hơ len năng trong jang, pơm hla ar. Tơ drong rôp vei bơ ngai hăm lăp hăm tơ drong hơ găt đơ̆ng luơ̆t dăh mă ưh. ‘Nŏh jĭ tơ drong jang kơ Anih jang Tư phap ưh kơ sĭ Anih jang găh bơ ngai tang măt ôh”.

Anih chĕp kơ̆l pơ gơ̆r Kuô̆k hô̆i akhan, tơ drong chih hơ met dơ̆ng tơ drong jang, hơ năp gơ̆h jang lơ̆m tơ dỏng Tơ chơ̆t ‘nŏh lapw hăm yăn âu păng lăp hăm tơ drong jang kăn ƀô̆. Atŭm hăm ‘nŏh drơ̆ng nơ̆r athei Anih jang găh bơ ngai tang măt pơ gơ̆r chih tơ dỏng ‘nâu vă lăp hăm tơ drong jang kăn ƀô̆ păng tơ drong gĭt kăl đơ̆ng tơ drong jang ‘nâu kiơ̆ khôi luơ̆t găh tơ drong tơ kêng. Dôm bơ ngai jang lơ̆m Anih chĕp kơ̆l pơ gơ̆r Kuô̆k hô̆i oei athei, chih tơ mât dơ̆ng tơ drong roi tơ ƀôh, pơ gơ̆r jang ƀơm truh tơ drong vei lăng kăn ƀô̆ hăm bơ ngai tang măt jang kơ tă lơ̆m Kuô̆k hô̆i; tơ drong chih hơ găt, pơ tho tơ ƀôh păng pơ gơ̆r jang pôk pơ ư, bơ̆ jang tơ drong tơ gŭm păng dôm tơ drong kăl nai hăm bơ ngai tang măt Kuô̆k hô̆i mă lăp ‘lơ̆ng.

Kơ dră Kuô̆k hô̆i Vương Đình Huệ athei, chih hơ met mă hơ dăh tơ drong jang, gơ̆h jang păng pơm hơ dăh hơ năp jang đơ̆ng Anih jang găh bơ ngai tang măt lơ̆m rim jăl jang, mă loi jĭ tơ drong jang găh bơ ngai tang măt đơ̆ng năr pôk rơih Kuô̆k hô̆i truh bơ ngai tang măt pơ dơ̆h hưu: “Tơ drong pôk rơih tơ̆ âu chih hơ dăh Anih jang găh bơ ngai tang măt tơ gŭm ăn Anih vei lăng pôk rơih tĕh đak păng Khul kơ dră chĕp kơ̆l Kuô̆k hô̆i dôm tơ drong kiơ? Hơ len năng tơ drong kiơ anih jang pơ gơ̆r, tơ drong kiơ athei jang hơ doi? Hăm tơ drong tơ gŭm kơ bơ ngai tang măt Kuô̆k hô̆i păng kăn ƀô̆ găh Anih chĕp kơ̆l pơ gơ̆r Kuô̆k hô̆i vei lăng? Tơ drong jang kăn ƀô̆ inh tôch ‘mĕh mă đơ̆ng ‘nao đei pơ jing, lơ̆m hop akŏm mă blŭng păng đơ̆ng rŏng ning mônh oei pơ jao rim tơ drong ăn Anih jang găh bơ ngai tang măt ngăl. Dôm anih jang kơ Kuô̆k hô̆i, Anih vei lăng hơ drĕch kon kông, dôm anih jang pơ gơ̆r jang kiơ̆ dôm trong jang găh kăn ƀô̆, set hơ len, tơ chơ̆t dôm tơ drong ‘nâu”.

Kŭm tơ̆ hop akŏm mă 8 mơ̆n, Anih chĕp kơ̆l pơ gơ̆r Kuô̆k hô̆i, dôm bơ ngai tang măt vang tơ gop nơ̆r ăn Tơ drong tơ chơ̆t hơ met ming Tơ drong hơ găt bơ̆ jang đơ̆ng Anih chĕp kơ̆l pơ gơ̆r Kuô̆k hô̆i. Dôm bơ ngai tang măt drơ̆ng nơ̆r hăm 3 grŭp tơ chĕng, nơ̆r chih pơ tho hăm tơ drong hơ met ming Tơ drong hơ găt bơ̆ jang vă pơm lăp hăm tơ drong tơ plih ‘nao trong jang, hơ tŏk tơ drong ‘lơ̆ng, đei yoa đơ̆ng tơ drong jang kơ Kuô̆k hô̆i, dôm anih jang kơ Kuô̆k hô̆i. Dôm bơ ngai tang măt athei hơ met ming Tơ drong hơ găt bơ̆ jang đơ̆ng Anih chĕp kơ̆l pơ gơ̆r Kuô̆k hô̆i lăp hăm chăl ‘nao atŭm kơ rim anih jang chinh trĭ, hơ tŏk tơ drong tơ plih kơ măy sô̆, pơ jing Kuô̆k hô̆i điên tư, jang kiơ̆ rơ gei, đei yoa mă đei tơ drong gĭt kăl dăh mă tơ̆ hơ năp dôm tơ drong krê hơ mơt tam biơh đei nhen jĭ hơ buh COVID-19… Găh nŏh dơ̆ng athei chih hơ dăn đon tơ chĕng ‘nŏh Tơ drong hơ găt bơ̆ jang ưh đei chih tơ drong gơ̆h jang plơ̆ng đơ̆ng Anih chĕp kơ̆l pơ gơ̆r Kuô̆k hô̆i mă lăp chih găh trong jang, pơm hla ar mă rơ đăh vă bơ̆ jang dôm tơ drong gơ̆h jang hlôi đei chih hơ găt lơ̆m luơ̆t, tơ drong tơ chơ̆t đơ̆ng Kuô̆k hô̆i, Anih chĕp kơ̆l pơ gơ̆r Kuô̆k hô̆i.

Dơ̆ng: Tơ blơ̆