Iung pơma pơtôch hop akŏm lơ̆m teh đak tơlĕch jang kiơ̆ Khôi luơ̆t, tơdrong tơchơ̆t đơ̆ng Kuô̆k hô̆i jăl XV, Kơdră chĕp pơgơ̆r Kuô̆k hô̆i Vương Đình Huệ athei, atŏk kơtang hloh dơ̆ng hơnăp jang, sơnong jang pơgơ̆r jang kiơ̆ Khôi luơ̆t tơm teh đak, khôi luơ̆t, tơdrong tơchơ̆t đơ̆ng Kuô̆k hô̆i; tơtom pơtho tơbăt, đei trong xek tơlang jơnei rim tơdrong tŏk bŏk tơhlăk tơhlĭn, ưh kơlăp, sơđơ̆ng ƀlep tơdrong athei lơ̆m yan au păng trŏ lăp tơdrong tơchơ̆t khôi luơ̆t, Tơdrong tơchơ̆t. Atŏk kơtang, tơplih ‘nao tơbăt, pơtho tơbăt khôi luơ̆t trŏ lăp hăm rim bơngai, rim tơdrong, tơring, mă kăl ‘nŏh hăm tơring kon kông păng groi kông.

Kơdră chĕp pơgơ̆r Kuô̆k hô̆i athei akŏm jang keh đang tơdrong tơlĕch ăn, sơđơ̆ng ‘lơ̆ng 83 hla bơar pơkăp hơdăh jang kiơ̆ rim khôi luơ̆t, tơdrong tơchơ̆t đơ̆ng Kuô̆k hô̆i jăl XV. Hăm 8 khôi luơ̆t đei tơlĕch jang kiơ̆ lơ̆m sơnăm 2024, hla bơar sơkơ̆t hơdăh gô tơlĕch ăn tôch kơ lơ, 68 hla bơar pơkăp. Kơ yuơ lơ loh, Kơdră chĕp pơgơ̆r Kuô̆k hô̆i athei:“Athei Khul kơdră chĕp pơgơ̆r teh đak đei trong vă jang hơdăh, hơmet pơ ‘lơ̆ng dôm tơdrong yă kiơ tơlĕch jang hơdrol trŏ lăp, iung jang mă ‘lơ̆ng, tơlĕch mă tôm tong, mă ‘lơ̆ng dôm hla bơar pơkăp, sơđơ̆ng đei jang kiơ̆ hăm khei ‘năr pơkăp jang kiơ̆ hloi kơ khôi luơ̆t, tơdrong tơchơ̆t, mă kăl khôi luơ̆t đei tơlĕch jang kiơ̆ đơ̆ng năr 01/01/2024. Tơtom ƀôh rim tơdrong pơkăp ‘moi kiơ̆ jang kiơ̆ đei tơdrong tơhlăk tơhlĭn, tim mă trŏ lăp, oei hơgrop vă hơmet ming, tơmơ̆t dơ̆ng kiơ̆ tơdrong pơjao jang dăh mă tơlĕch nơ̆r athei chă hơmet ming, tơmơ̆t dơ̆ng, pơjing ‘nao hla bơar pơkăp khôi luơ̆t, tơroi tơbăt ăn Kuô̆k hô̆i pơtôch ‘măng bơ̆ jang dăr lăng hơlen tơ̆ ‘Măng hop akŏm mă 6 (khei 10/2023). Pơm pơkeh dôm tơdrong pơkăp găh xek tơlang hơnăp jang păng xek tơlang kơhret, tơtom khul, bơngai jang pơm ăn đei tơdrong glăi lơ̆m tơ iung pơjing hla bơar pơkăp khôi luơ̆t”.

Hăm rim hơnih bơ̆ jang kơ Kuô̆k hô̆i, Kơdră chĕp pơgơ̆r Kuô̆k hô̆i pơkă kăl hơnơ̆ng atŏk kơtang iung jang, hơnăp jang kơ Hơnih bơ̆ jang chĕp pơgơ̆r Kuô̆k hô̆i, rim hơnih bơ̆ jang kơ Kuô̆k hô̆i lơ̆m tơdrong dăr lăng hơlen, pơrô̆ athei păng dăr lăng Khul kơdră teh đak, rim hơnih jang pơgơ̆r tơlĕch jang kiơ̆ rim khôi luơ̆t, tơdrong tơchơ̆t đơ̆ng Kuô̆k hô̆i. Iung jang hơdoi kơjăp hăm rim hơnih đei ƀơm truh lơ̆m chih tơlĕch, hơlen, hơmet ming trong vă pơjing khôi luơ̆t, tơdrong tơchơ̆t; dăr lăng tơdrong pơm kiơ̆ kơtang tơdrong pơkoĕl “trong vă pơjing hla bơar pơkăp hơdăh kăl hơmet ăn hơdrol păng tơƀôh ăn hơdoi hăm trong vă pơjing khôi luơ̆t, tơdrong tơchơ̆t”.  

Rim Khul tang măt Kuô̆k hô̆i păng rim bơngai tang măt Kuô̆k hô̆i hơnơ̆ng atŏk kơtang dăr lăng bơ̆ jang kiơ̆ khôi luơ̆t, tơlĕch rim khôi luơ̆t, tơdrong tơchơ̆t đơ̆ng Kuô̆k hô̆i tơ̆ tơring; Jơnŭm vei lăng kon pơlei păng Hơnih vei lăng kon pơlei, mă kăl tơ̆ tơring jang kiơ̆ pơlong năng ‘moi kiơ̆ rim tơdrong tơchơ̆t đơ̆ng Kuô̆k hô̆i hơnơ̆ng atŏk kơtang bơ̆ jang ‘lơ̆ng hlŏh dơ̆ng lơ̆m tơlĕch jang kiơ̆ khôi luơ̆t tơ̆ tơring.

Kơdră chĕp pơgơ̆r Kuô̆k hô̆i Vương Đình Huệ pơma hơdăh, tơdrong pơgơ̆r Hop akŏm găh bơ̆ jang tơlĕch rim khôi luơ̆t, tơdrong tơchơ̆t đơ̆ng Kuô̆k hô̆i ‘nŏh mĭnh trong ‘nao lơ̆m tơdrong bơ̆ jang kơ Kuô̆k hô̆i jăl XV. ‘Moi kiơ̆ pơtôch Hop akom, Khul kơdră chĕp pơgơ̆r Teh đak, rim hơnih bơ̆ jang, tơring, chă tơchĕng hơlen, pơgơ̆r rim ‘măng hop akŏm au to trŏ lăp vă tơlĕch jang kiơ̆ hơdăh kơ rim khôi luơ̆t, tơdrong tơchơ̆t kơ yuơ Kuô̆k hô̆i tơlĕch ăn găh lơ̆m tơdrong bơ̆ jang dăh mă đei ƀơm truh kơtă hăm rim hơnih bơ̆ jang, tơring bơ̆n.“Tơlĕch jang kiơ̆ pơkăp tơ̆ Tơdrong tơchơ̆t 27 “tơdrong chĕp pơgơ̆r teh đak đei pơjao tôch hơdăh, jang hơdoi kơjăp, dăr lăng ‘lơ̆ng”, ĭnh lui akhan, hăm twodrong vang iung jang tơnăp, jơnei păng dăr lăng kơjăp đơ̆ng Kuô̆k hô̆i, atŭm hăm bơ̆ jang hơbĕch hơbal păng kơrŭn đĭ ai pơgơ̆r jang kiơ̆ khôi luơ̆t ‘lơ̆ng hơ iă đơ̆ng Khul kơdră chĕp pơgơ̆r teh đak, tơdrong vang iung jang hơdoi kơjăp đơ̆ng rim hơnih bơ̆ jang, nhen hlôi tơƀôh hơdăh tơdrong đei jơnei kơ Hop akŏm ‘măng mă au, gô jing trong kơnăl kăl hloh vă jang kiơ̆ “Chĕp pơgơ̆r vei lăng teh đak gơ̆h hơgei, jơnei kơtang”, tơgop vă tơlĕch jang kiơ̆ khôi luơ̆t, tơdrong tơchơ̆t gô đei ‘lơ̆ng hơ iă hloh dơ̆ng, iŏk đei jơnei kơtang, ‘lơ̆ng liĕm hloh dơ̆ng lơ̆m khei năr kơnh, trŏ lăp hăm tơdrong ‘mĕh vă atŏk tơ iung teh đak, tơdrong hơmŏ păng lui ngêh đơ̆ng rim kơdră tang măt Kuô̆k hô̆i, bơngai tăh hla păng Kon pơlei”.