4 sơnăm au ki, ŭnh hnam mŏ K’Tâm oei tơ̆ thôn 1, tơring Liêng S’rônh, apŭng Đam Rông (Lâm Đồng) găh ŭnh hnam dơnuh. 3 sao teh jang chehphe, ƀa đak, hơƀo jang kiơ̆ trong jang sa sơ̆ ki, kơna ŭnh hnam hơnơ̆ng pơngot rơvĕt. Tơ̆ hơnăp tơdrong au, yă K’Nga, Kơdră chĕp pơgơ̆r Hơnih Măt trân Tổ quốc Việt Nam tơring Liêng S’rônh hlôi năm truh tơ̆ ŭnh hnam, chă pơrô̆ athei mŏ tơplih hơgăt teh ‘long pơtăm hơngrăng hơngrônh iŏk yua ư̆h kơ lơ vă pơtăm ‘long pơmur rong sơdrông pơm brai, tơgŭm mŏ K’Tâm tŏk iŏk jên, tơƀôh ăn hơnih ‘lơ̆ng vă mŏ răt ‘long pơmur pơtăm, răt hơnar hơdrông pơm brai chă rong păng hŏk trong rong. Lăp đơ̆ng rŏng tơplih jang sa hle, ŭnh hnam mŏ K’Tâm roi năr roi sơđơ̆ng. Mŏ K’Tâm tơbăt, jang sa iŏk đei đơ̆ng rong sơdrông pơm brai hlôi tơgŭm ăn mŏ ming hơmet hnam oei, ăn kon hơ-‘lơ̆p năm hŏk tôm. “Sơ̆ ŭnh hnam nhôn pơtăm chehphe, gơnơm mŏ K’nga chă pơtho ăn kơna ŭnh hnam nhôn tơplih pơtăm ‘long pơmur rong sơdrông pơm brai hlôi hơnhăk đei iŏk yua kơjăp hloh pơtêng hăm jang chehphe. Hăm kon jên jang đơ̆ng Hơnih bơ jang măt trân Tổ quốc Việt Nam apŭng tơgŭm ăn găh răt tơmam drăm rong sơdrông pơm brai, hlôi tơgŭm ăn ŭnh hnam nhôn jang sa sơđơ̆ng, ăn kon hơ ‘lơ̆p hŏk pơhrăm tôm”.

Ư̆h khan lăp hơdrô̆ mŏ K’Tâm mă lei lơ ŭnh hnam kon pơlei K’ho oei tơ̆ tơring Liêng S’rônh, apŭng Đam Rông hlôi hơdrin yak hloh dơnuh hin gơnơm tơplih trong jang sa, pơ̆n tơplih ‘long pơtăm kiơ̆ trong jang đơ̆ng Đảng păng Teh đak tơlĕch ăn. Vă jang kĕ đei tơdrong au, găh lơ kang ƀô̆ đang viên tơ̆ tơring, lơ̆m au đei yă K’Nga ‘noh jĭ mĭnh ‘nu bơngai ‘lơ̆ng hloh, hlôi tơƀôh hơdăh hơnăp jang tơnăp pơm jŭk yŭk trong hơlau jang kiơ̆ păng hơdrin chă pơrô̆ pơrôp, pơtho khan ăn kon pơlei jang kiơ̆...Hloh 12 sơnăm bơ̆ jang, mă đơ̆ng tơdrong jang kang ƀô̆ Tư pháp, Kơdră chĕp pơgơ̆r Khul drŏ kăn tơring, dăh mă dang ei tŏk bŏk bơ̆ jang Kơdră chĕp pơgơ̆r Hơnih Măt trân Tổ quốc Việt Nam tơring, yă K’Nga jei jang ‘lơ̆ng hăm hơnăp jang kơ bơngai đang viên. Yă ling lang tơklep hăm kon pơlei, lăng kơjăp pơlei pơla, chă mơ̆ng, băt hơdăh tơdrong hơpơi ‘meh vă đơ̆ng kon pơlei vă tơtom tơbăt ăn kơdră chĕp pơgơ̆r đảng, chĕp pơgơ̆r tơring. Gơnơm đơ̆ng noh, rim tơdrong jang kơ yuơ tơring tơlĕch ăn nhen: tơplih ‘long pơtăm, tơgŭm dih băl jang sa, vang tơ iung pơjing tơring tơrang ‘nao, plang ăn teh pơm trong, pơjing hơrih sa ‘lơ̆ng tơ pơlei pơla ... jei đei kon pơlei vang iung jang kơtang. Dôm tơdrong oei sa joăt joe sơ̆ ki pă gan trŏ ƀlep, iŏk ŭnh om hơgăm, iok hrôih, brư̆ yang đang pơsat đunh đai hlôi hŭt. Kiơ̆ đơ̆ng yă K’Nga, jĭ kon hơ ‘lơ̆p kơ pơlei păng jĭ bơngai kang ƀô̆ đang viên kơna kăl iung jang kơtang tơ iung pơjing pơlei pơla bơ̆n ‘lơ̆ng rŏ păng atŏk tơ iung. “Hăm tơdrong hŭt rim tơdrong oei sa pă trŏ lăp sơ̆ ki tơ̆ tơring ‘noh ba atŭm hăm Kơdră Đảng, Hơnih vei lăng kon pơlei tơring hlôi bơ̆ jang ‘lơ̆ng lơ̆m chă pơrô̆ pơrôp, pơtho tơbăt ăn kon pơlei hŭt hloi dôm tơdrong pă trŏ lăp, chă pơrô̆ hơvơn kon pơlei hŭt dôm tơdrong choh jang sa pă trŏ lăp sơ̆ ki. Pơtih gia nhen lơ̆m pơdong bơngai lôch ưh kơ lê̆ đunh hloh ƀar măng ƀar năr, jang kiơ̆ ƀlep trong jang atŭm đơ̆ng Đảng tơring, apŭng. Tơdrong pơkong ŭnh om pơm dă ƀiơ̆ athei ăn lơ. Hăm tơdrong vei răk tơƀăk mong tơdrong oei sa ‘lơ̆ng hơ iă kăl iung jang kiơ̆ ‘lơ̆ng, mă kăl ‘noh vei răk tôn chĭng chêng, hơsoang, tơdrong hơri kon kông bơ̆n jei đei atŏk kơtang”.

Liêng Srônh ‘noh tơring đei hloh 70% kon pơlei kon kông, găh lơ bơngai K'ho. Kiơ̆ đơ̆ng yă Nguyễn Thị Thu Hiền, Kơ iĕng Kơdră chĕp pơgơ̆r Đảng tơring Liêng Srônh, apŭng Dăm Rông, mă đơ̆ng tơdrong hơrih sa kơ kon pơlei hlôi đei tơplih ‘nao, atŏk tơ iung lơ pơtêng hăm sơ̆, mălei oei tơƀơ̆p lơ tơnap tap, tơdropng long kăl hơdrin hloh dơ̆ng vă kĕ atŏk tơ iung kơjăp. Kơ yuơ lơ loh, tơdrong atŏk kơtang hơnăp jang kơ đảng viên, mă kăl đảng viên kon kông lơ̆m atŏk tơ iung Mŭk drăm-Tơpôl jĭ tôch gĭt kăl. Đảng viên K’Nga hlôi jang ‘lơ̆ng hơnăp jang păng hlôi jing bơngai ‘lơ̆ng vă lơ đảng viên anai kiơ̆ yok rok jơ̆ng. Yă Nguyễn Thị Thu Hiền, pơma: “Hlŏh 10 sơnăm plang ăn tơring hăm duch K’Nga ‘noh bơngai tôch tơnăp đei kon pơlei kon kông yom kơtang hloh. Lơ̆m bơ̆ jang pơrô̆ pơrôp, pơtho tơbăt ăn kon pơlei pơm kiơ̆ ‘lơ̆ng trong bơ̆ jang đơ̆ng Đảng, khôi luơ̆t Teh đak. Lơ̆m au mă kăl ‘noh pơtho tơbăt ăn kon pơlei lơ̆m tơpôl vang iung jang tơ iung pơjing tơring tơrang ‘nao, atŏk tơ iung mŭk drăm, tơgŭm ăn kon pơlei yak hloh dơnuh hin kơjăp ‘lơ̆ng. Mă kăl ‘nŏh yă K’Nga hlôi tơgum lơ kon pơlei kon kông kơtă jang sa yak hloh dơnuh hin kơjăp ‘lơ̆ng.”

Hăm tơdrong tơgop đơ̆ng kơdih lơ̆m bơ̆ jang, yă K’nga, Kơdră chĕp pơgơ̆r Hơnih bơ̆ jang Măt trân Tổ quốc Việt Nam tơring Liêng Srônh hlôi iŏk đei lơ hla bơar pôk bơnê, hla bơar hôn bơnê kơ tơring, apŭng păng dêh char Lâm Đồng. ‘Nau dôm tơdrong hôn bơnê tơtom vă yă K’Nga hơnơ̆ng tơgop kơtang hloh dơ̆ng, atŏk kơtang hơnăp jang kơ bơngai kang ƀô̆ đang viên lơ̆m tơring kon kông.