Ăh tong anê̆ khei 7, Quảng Trị tô̆ hlơ hlĕng nhen kơ unh. Khul linh so kơ Trung đoan Phao tih 241 đei 160 ‘nu chôt vih kơdrăn tơblah so sơ̆ vă plang hlôt nhang ƀlŏk tơbăt kơ khul grŭp.

Tơ̆ Tơmo chih hơnăn ƀlŏk tơbăt kơ Trung đoan đei ‘măn ah Pơsat ƀlŏk tơbăt kơ linh lôch dŏng teh đak tơ̆ apŭng Hướng Hóa, dôm bơngai so sơ̆ ki ‘măn minh pơnĭt tơnuh, ƀlŏk tơbăt kơ đe boăl, khul grŭp hlôi lôch hơchăng lơ̆m tơdrong tơblah pơrơngei păng vei lăng teh đak. Lơ̆m kơsô̆ 400 kăn ƀô̆ linh lơ̆m Trung đoan Phao tih 241 lôch plang tơ̆ kơdrăn tơblah Quảng Trị, truh dang ei lơ kơting hơkâu oei rok kiơ̆ đak glung, lơ̆m bri kơdrơ̆ng. Ƀok Nguyễn Hùng Tiến, linh so lơ̆m Trung đoan 241 ăn tơbăt: Đơ̆ng sơnăm 2013, đe linh Trung đoan 241 hlôi tơgop man pơjing tơmo chih hơnăn tơ̆ Pơsat ƀlŏk tơbăt tơ̆ apŭng Hướng Hóa păng rim sơnăm đe linh so kơ anih linh chôt vih tơring teh grasia âu vă plang hlôt nhang ƀlŏk tơbăt kơ bôl boăl, khul grŭp:  “Nhôn ƀôh sơnong jang kơ dôm bơngai oei hơrih, kơlih khul grŭp nhôn hlôi lôch plang noh nhôn athei pơm rim tơdrong vă pôk bơnê. Lơ̆m kơsô̆ ‘nhŏng oh nhôn đei lơ bơngai ưh gơh chôt vih ‘noh tôch jĭ jơhngơ̆m. Kơyuơ noh,, anih chih hơnăn ƀlŏk tơbăt vă pôk bơnê jơhngơ̆m hlôi plang jên hu păng mkă kăl noh đon bơnôh kơ dôm bơngai oei hơrih”.

Sơnăm mă yơ adoi thoi ăi, trŏ ah năr 27/7, unh hnam ‘nhŏng Phạm Việt Phong ‘nŭng tơmam drăm đơ̆ng pơlei tơm Ninh Bình năm truh Pơsat Ƀlŏk tơbăt  Trường Sơn plang hlôt nhang ƀlŏk tơbăt kơ mih kơtơh noh linh lôch plang Phạm Văn Trọng. Linh lôch tang Phạm Văn Trọng jing linh kơ Binh đoan 559, lôch plang tơ̆ kơdrăn tơblăh Quảng Trị sơnăm 1972, ƀơ̆t lăp ‘nao 22 sơnăm. Rim sơnăm, ‘nhŏng Phong atŭm hăm unh hnam năm truh Quảng Trị năm hơpong, plang hlôt nhang ăn kơ đe linh lôch dŏng teh đak, pôk bơnê hăm đe linh lôch tang: “ ‘Nhŏng oh oei ƀĭch tơ̆ hơgăt teh Quảng Trị, inh ‘noh ‘nhŏng oh hơdrô̆ vei lăng pơsat mih. Inh đei tơdrong hơrih nhen ‘năr âu noh đei lơ bơngai hlôi tuh pham păng ƀĭch hloi tơ̆ teh Quảng Trị âu. Inh năm truh tơ̆ âu ƀôh pơsat ƀlŏk tơbăt guăng ‘lơ̆ng dêh. Lê̆ mih ƀĭ pơdơh tơ̆ âu, inh răp năm truh soi ƀlŏk atŭm hăm teh đak”.

Dôm năr âu, tơ̆ dôm pơsat ƀlŏk tơbăt tơ̆ dêh char Quảng Trị, lơ Khul Kơdră kơpal kơ Đảng păng Teh đak atŭm hăm ‘nhŏng oh linh lôch dŏng teh đak truh plang hlôt nhang, pôk bơnê kơ đe linh nuih mơng lôch plang kơyuơ tơdrong tơblah pơrơngei hơdrung hơdrĕch, rơngei teh đak.

Dôm kơvang pơkao atŭm hăm hlôt nhang ƀâu phu tơƀôh tơdrong pôk bơnê kăp gĭt hăm pơhngol đe linh, dôm bơngai kon gơh hơgei nuih mơng kơ teh đak. Ƀok Nguyễn Duy Tiến, 82 sơnăm, linh so kơ Binh đoan 559 chôt vih đơ̆ng kơdrăn tơblah sơ̆ Quảng Trị hơpơi ‘meh tơƀơ̆p ‘nhŏng oh po: “Rim ‘măng chôt vih hăm kơdrăn tơblah sơ̆ thoi âu, lơ̆m đon bơnôh nhôn adoi đei vih hơdơ̆r tôm tơdrong. Adrol hloh noh tơƀơ̆p đe bôl boăl khul grŭp ‘nhŏng oh po truh jơ pơnĭt âu. Hăm đe ‘nhŏng oh hlôi lôch plang, nhôn truh vă pôk bơnê. Sơnăm âu, nhôn pơgơ̆r lêh pôk bơnê. Hơnơ̆ng đei chôt vih tơ̆ kơdrăn tơblah sơ̆ lơ̆m đon bơnôh nhôn hơpơi ‘meh tơƀơ̆p dơ̆ng khul grŭp po”

Pơtôch tơdrong tơblah, hloh 53.000 linh lôch tang hlôi ƀĭch pơdơh lơ̆m 72 pơsat tih iĕ lơ̆m hơgăt teh Quảng Trị grasia. Pôk bơnê jơhngơ̆m plang đơ̆ng đe linh nuih mơng âu, Đảng păng teh đak hơnơ̆ng tơrĕk truh tơdrong asong ming hơmet pơ-‘lơ̆ng rim pơsat ƀlŏk tơbăt kơ linh lôch tang. Hrei âu, rim pơsat ƀlŏk tơbăt hlôi jing anih akŏm joh ayŏ đon lui, ƀlŏk tơbăt kơ linh nuih mơng lôch dŏng teh đak, vă pơtho rah ăn đe mơlôh hlôh vao. Ƀok Lê Nguyên Hồng, Kơdră Anih asong jang – Linh jĭ rơka păng Tơpôl dêh char Quảng Trị ăn tơbăt: Ah năr 27/7 sơnăm âu, dêh char Quảng Trị sơng jê̆ 15.000 ‘nu ‘nhŏng oh, tơmoi, đe linh so chôt vih plang hlôt nhang. Mă kăl, đơ̆ng khei 7 sơnăm 2022 truh dang ei, Anih pơgơ̆r vei lăng kon pơlei dêh char Quảng Trị pơgơ̆r sơng lơ Khul kơpal truh hơpong Pơsat linh lôch dŏng teh đak Đường 9 păng Pơsat ƀlŏk tơbăt kơ linh lôch tang Trường Sơn ăh kơmăng: “Nhôn asong ăn khul truh hơpong păng ah kơmăng nhôn ƀôh mă mônh noh Quảng Trị tô̆ hlơ hlĕng, ah kơmăng ‘noh rơngơp hloh. Mă 2, ah kơmăng gô tơguăt hloh, năm truh pơsat noh ƀôh grasia hloh păng ƀôh guăng ‘lơ̆ng hloh. Kon pơlei păng khul linh jâ̆p teh đak truh hơpong pơsat ƀlŏk tơbăt Trường Sơn păng Đường 9 păng nhôn hơnơ̆ng đei bơngai vei lăng vă jong ăn tơdrong năm hơpong đơ̆ng lơ khul kơpal păng ‘nhŏng oh đe linh lôch dŏng teh đak”.

Khei 7, rim bơngai chôt vih tơ̆ dôm Pơsat ƀlŏk tơbăt Trường Sơn, Pơsat ƀlŏk tơbăt Đường 9, Thành cổ Quảng Trị… plang hlôt nhang ƀâu phu tru hŭt, tơhiu pơkao tơ̆ đak krong Thạch Hãn vă pôk bơnê kơ đe linh nuih mơng lôch plang ăn teh đak.