VOV4.Bahnar - Pơ gê 8/3, Khul jang đơ̆ng Anih vei lăng hơ drĕch kon kông Kuô̆k hô̆i yoa Phŏ Kơ dră Anih vei lăng hơ drĕch kon kông Cao Thị Xuân chĕp kơ̆l đei jơ bơ̆ jang hăm Dơ nŏ anih vei lăng kon pơ lei dêh char Dak Lak vă hơ len năng tơ drong đei ƀơm truh đơ̆ng tơ drong chĕng hơ met tơ ring kon kông kiơ̆ đon hlôh vao, tơ drong jang tŏk ‘nao âu hăm tơ drong jang kiơ̆ tơ drong tơ gŭm ăn kon kông tơ̆ dêh char Dak Lak.

Yă Cao Thị Xuân, Phŏ Kơ dră Anih vei lăng hơ drĕch kon kông pơ ma lơ̆m jơ bơ̆ jang

Kiơ̆ tơ drong hơ găt ‘nao, đơ̆ng 2021 – 2025, dêh char Dak Lak đei 54 xăh tơ ring III, 5 xăh tơ ring II, 71 xăh tơ ring I, 519 pơ lei mơ mat tat dêh hlŏh găh tơ ring kon pơ lei kon kông păng groi kông. Thoi nŏh, lơ̆m dêh char đei 54 xăh ưh pă đei găh tơ ring kon kông păng groi kông, 4 xăh klăih đơ̆ng tơ ring mơ mat tat dêh hlŏh păng 143 pơ lei mơ mat tat dêh hlŏh ưh pă đei măt lơ̆m tơ ring mơ mat tat dêh hlŏh bơih. Dôm tơ drong tơ gŭm vei lăng arih xa tơ pôl oei bơ̆ jang tơ̆ dôm xăh, pơ lei kơ pal gô ưh pă đei tơ lĕch jang dơ̆ng bơih.

Lơ̆m jơ bơ̆ jang, dôm bơ ngai tang măt pơ ma nuh găh tơ drong jang đei đơ̆ng vei lăng sơ đơ̆ng arih xa tơ pôl tơ̆ dôm xăh, pơ lei pơ la mơ mat tat dêh hlŏh găh tơ ring kon kông păng groi kông đơ̆ng 2016 – 2022; hơ len năng tơ drong đei ƀơm truh đơ̆ng Tơ drong tơ chơ̆t ‘nao mưh tơ lĕch jang tơ̆ tơ ring. Đơ̆ng nŏh, athei Anih vei lăng hơ drĕch kon kông apinh Kuô̆k hô̆i kĭ ăn trong tơ mât jên jang, tơ gŭm hơ drô̆ hăm dôm xăh, pơ lei pơ la ‘nao klăih đơ̆ng mơ mat tat dêh hlŏh đơ̆ng 2021-2025 mă mŭk drăm tơ pôl oei mơ mat tat; hơ nơ̆ng asong bơ̆ jang kiơ̆ dôm tơ drong tơ gŭm vă vei lăng sơ đơ̆ng ‘lơ̆ng tơ drong arih xa tơ pôl.

Dơ̆ng: Tơ blơ̆