Hloh đơ̆ng dăr lăng đei ƀôh, Khul kơdră chĕp pơgơ̆r Teh đak, Thủ tướng Teh đak hlôi pơrô̆ athei rim hơnih tơm, hơnih bơ̆ jang păng tơring hrôih tơlĕch jang rim Tơdrong tơchơ̆t đơ̆ng Kuô̆k hô̆i găh kĭ tơchơ̆t trong jang tơmơ̆t jên jang rim Tơdrong jang tơm teh đak.

Mă đơ̆ng dôm tơdrong jang pơm hla bơar găh vei lăng pơtho tơbăt iung jang pơđĭ 3 Tơdrong jang tơm Teh đak mă Trung ương kăl pơjing ‘nŏh tôch kơ lơ (hloh 70 hla bơar bơ̆ jang ), mă lei truh dang ei Khul kơdră Teh đak păng rim Hơnih tơm, hơnih jang hlôi jang keh đang, pơm kơnăl vă tơring hơmet pơ ‘lơ̆ng păng tơlĕch jang kiơ̆. Mă đơ̆ng lơ loh ră, hloh đơ̆ng dăr lăng lơ tơring tơroi tơbăt hla bơar bơ̆ jang tôch kơ lơ, 300 hla bơar đơ̆ng pơđĭ Trung ương păng tơring. Lơ tơdrong pơtho tơbăt tim mă hơdăh, tơnap mă jang kiơ̆. Dang ei truh tŏk bŏk ‘măng jang kiơ̆, mă lei oei đei mĭnh ƀar tơdrong jang kăl, tơdrong pơkăp tim mă đei rim hơnih tơm, hơnih bơ̆ jang pơtho tơbăt. Kơ iĕng Kơdră chĕp pơgơ̆r Kuô̆k hô̆i Nguyễn Khắc Định athei: "Lơ̆m 3 Tơdrong jang au vă jê̆ 300 hla bơar Khul kơdră teh đak, rim hơnih tơm 73 tơdrong. Rim tơring đei kơhrĕng hla bơar. Kơ yuơ kă kiơ mă đei lơ lơ lau. Lơ̆m mă lăp đei 1 tơdrong jang ‘nao, 2 tơdrong jang so đơ̆ng dôm jăl jang bơih. Kơ yuơ kă kiơ mă đei lơ hla bơar lơ lau. Hloh đơ̆ng dăr lăng jei kăl pơm hơdăh mĭnh tơdrong tơpŭ dih băl, veh ver, pơm ăn tơdrong jang hiơ hiơ̆ pơm tơhlăk tơhlĭn tơdrong jang kiơ̆ atŏk tơ iung mŭk drăm tơpôl, xek tơlang tơdrong jang kơ khul bơngai jang mơdro sa".

Tơdrong kăl lăng truh hloh đơ̆ng dăr lăng đei ƀôh kon jên tơmơ̆t jang atŏk tơ iung kơ hơnih mong jên bơ̆ jang trung ương klăh song (jăl II sơnăm sơ̆ ‘nao pơjao) tim mă đei trong tơlĕch jang pơjao tơdrong vă jang kon jên bơ̆ jang kơ kon jên bơ̆ jang teh đak jăl jang 5 sơnăm ăn Tơdrong jang tơm teh đak; tơdrong hơgrop kon jên jang ƀar păh rim Tơdrong jang tơm teh đak tơnap mă gơ̆h jang kiơ̆; tơdrong tơlĕch kon jên jang kơ trong pơprŏ kon jên bơ̆ jang Trung ương sơnăm 2022 păng jăl jang 2021-2025 oei hiơ hiơ̆. Tơdrong pơjao ăn rim dêh char kơdih hơmet pơ ‘lơ̆ng kon jên jang dêh char păng chă hơvơn au to vă jang kiơ̆ tơdrong jang iŏk đei jing tơring tơrang ‘nao ‘lơ̆ng liĕm hloh păng tơring tơrang ‘nao pơm jŭk ‘nŏh tôch tơnap tap, mă kăl hăm dêh char dơnuh.

Kơdră chĕp pơgơ̆r Kuô̆k hô̆i Vương Đình Huệ athei pơm hơdăh hơnăp jang kơ rim hơnih tơm, hơnih jang lơ̆m tơlĕch hiơ hiơ̆ kon jên jang 3 tơdrong jang tơm teh đak pơm ăn truh pơhoach pă tơdrong tơdrơ̆r kơtang: "Dăr lăng au kăl tơbăt hơdăh nơ̆r apĭnh. Kơ yuơ kă kiơ hiơ mă hiơ hiơ̆? Kơ yuơ kă kiơ mă tơhlăk tơhlĭn, rim tơdrong tơhlăk tơhlĭn au tơ̆ yơ? Păng tơdrong hơmet pơ-‘lơ̆ng lơ liơ. Pêng Tơdrong jang oei hơgôn dôm hrĕng tơdrong jang đei tơlĕch Tơchơ̆t 28, đơ̆ng rŏng ‘nŏh hơmet 27, dang ei hơnăp jang kơ rim hơnih tơm, hơnih bơ̆ jang ‘nŏh lơ liơ mă pơm ăn đei tơdrong au. Kơ yuơ kă kiơ mă tơlĕch kon jên jang hiơ hiơ̆? Kon jên bơ̆ jang oei hiơ hiơ̆ hloh kon jên tơmơ̆t jang ‘nŏh lơ liơ? Lê̆ đei tơdrong au ‘nŏh brăh brư tôch kơtang văi".

Khul bơ̆ jang athei đei trong jang pơjao trong vă jang kiơ̆ kon jên bơ̆ jang dăh mă tơroi tơbăt kon jên bơ̆ jang Trung ương tơlĕch jang rim Tơdrong jang tơm teh đak jăl jang 2024 - 2025 vă rim tơring iung jang hloi lơ̆m klăh asong kon jên bơ̆ jang. Pơrô̆ jang keh đang xek tơlang rim tơdrong tơnap tap, tơhlăk tơhlĭn, mă kăl hơmet ming, tơmơ̆t dơ̆ng dôm tơdrong tơchơ̆t tim mă lăp lơ̆m rim hla bơar tơchơ̆t khôi luơ̆t pơtho tơbăt jang kiơ̆ 3 Tơdrong jang tơm teh đak. Athei Hơnih bơ̆ jang hơlen jên hu Teh đak athei găh hơmet ming kon jên jang tơ̆ ‘măng hop akŏm mă 9 kơ Hơnih bơ̆ jang Kuô̆k hô̆i.

Tơgop nơ̆r găh lơ̆m tơdrong vă pơjing tơchơ̆t tĕch răt mŭk drăm (hơmet ming), Hơnih bơ̆ jang Kuô̆k hô̆i athei tơdrong hơmet ming kăl hơmet pơ ‘lơ̆ng dôm tơdrong tim mă lăp, tim mă ƀlep, tơdrong hơgrop hơmơt ƀônh đei tơdrong sa pơgơ̆m pơjĭp, pơhoach brăh brư lơ̆m sơkơ̆t hơdăh kơjă mŭk drăm, mă kăl lơ̆m sơkơ̆t hơdăh kơjă groi teh. Trong vă pơjing Khôi luơ̆t tĕch răt mŭk drăm(hơmet ming) hlôi tơmơt dơ̆ng lơ tơdrong tơchơ̆t găh hơnih pơgơ̆r, jơ ‘năr tĕch, jơ ‘năr sơng iŏk hla bơar apĭnh răt kiơ̆ trong trŏ ƀlep tơpăt, pơjing rơvơn ăn bơngai vang năm apĭnh răt iŏk mŭk drăm, lei lăi hăm tơdrong ăn kon jên hơdrol. Atŭm hăm ‘noh, trong vă pơjing Khôi luơ̆t tĕch răt mŭk drăm jei tơmơ̆t dơ̆ng trong tĕch, sơng iŏk hla bơar apĭnh răt mŭk drăm kiơ̆ trong trư̆k tuyên tơgop jang kiơ̆ kơtang iŏk yua kmăi kmŏk kơtơ̆ng ang. Rim kơdră tang măt athei dăr lăng, sơkơ̆t hơdăh tơ̆ khôi luơ̆t nhen Khôi luơ̆t groi teh vă pơm dă ƀiơ̆ tơlĕch ăn kon jên hmă hơdrol, pơm tơsŭl tơsăl lơ̆m tĕch răt. Kơdră chĕp pơgơ̆r Hơnih bơ̆ jang Khôi luơ̆t kơ Kuô̆k hô̆i Hoàng Thanh Tùng athei: "Dăr lăng dôm tơdrong tim mă lăp kơ mĭnh ƀar tơdrong tơchơ̆t lơ̆m mĭnh ƀar tơdrong, lơ̆m au đei tơdrong tĕch răt mŭk drăm, hơmet pơ ‘lơ̆ng dôm tơdrong tim mă lăp pơm ăn tơpôl ưh kơ lăp đon, mă kăl đơ̆ng rŏng tĕch răt tơdrong gơ̆h iŏk yua teh tơ̆ Thủ Thiêm Tân Hoàng Minh păng mĭnh ƀăr tơdrong tơ̆ mĭnh ƀar tơring anai; hơmet pơ ‘lơ̆ng tơdrong pơm hơtŏk kơjă, pơđep kơjă, pơdrơ̆ng dih băl lơ̆m sơkơ̆t hơdăh kơjă tĕch răt mŭk drăm".

Kơdră chĕp pơgơ̆r Kuô̆k hô̆i athei ‘măng hơmet ming au kăl hơmet pơkeh hloi dôm tơdrong tim mă lăp, tim mă ƀlep, hơgrop dih băl hơmơt đei tơdrong sa pơgơ̆m pơjĭp kơtang. Kơdră chĕp pơgơ̆r Hơnih bơ̆ jang Tư pháp kơ Kuô̆k hô̆i Lê Thị Nga athei tơchơ̆t hơdăh găh 10% kon jên ăn hơdrol lơ̆m tơdrong tĕch răt teh: "Tơdrong tĕch răt teh hăm teh đei pơjao, ăn mơng teh vă jang kiơ̆ tơdrong vă jang tơmơ̆t jên jang ‘nŏh kon jên ăn hơdrol tŏ sĕt hloh 10% păng lơ hlŏh ‘nŏh 20%. Kiơ̆ kơ nhôn ƀôh kiơ̆ tơdrong tơchơ̆t kơ khôi luơ̆t hrei au ‘noh kon jên ăn hơdrol găh tơdrong vă vang tĕch răt mŭk drăm lăp sơkơ̆t hơdăh lơ̆m 5%. Adoi groi teh ‘nŏh mŭk drăm gĭt kăl hloh hăm rim tơdrong jang kiơ̆ tơdrong vă jang tơmơ̆t jên jang. Kơ yuơ lơ loh, athei pơm hơdăh găh tơdrong kơ yuơ kă kiơ kơ tơdrong hơmet ming ăn hơdrol kon jên đơ̆ng 5% kiơ̆ khôi luơ̆t hrei au kơna mă tŏk truh 10% păng hơlen hơdăh tơdrong đei ƀơm truh đơ̆ng tơdrong tơchơ̆t au hăm tơdrong yan au".