Đắk Lắk jĭ dêh char mă 4 tơ̆ tơring Tây Nguyên đei Khŭl jang mơdro sa Khŭl lĭnh so Việt Nam pơjao asong hla ar chih đơ̆ng tơdrong jang “Mĭnh triệu hla ar chih ăn kơ hŏk tro dơnuh hin dôm hơdrĕch hơdrŭng Tây Nguyên păng dêh char Bình Phước”. Tơdrong jang pơgơ̆r pơgê brei (27/6) tơ̆ pơlei tơm Buôn Ma Thuột, dêh char Đắk Lắk. Anih pơgơ̆r jang hlôi pơjao  200.000 blăh hla ar chih ‘măn asong ăn kơ vă jê̆ 15.600 ‘nu hŏk tro dơnuh hin lơ̆m dêh char Đắk Lắk, hăm kơjă vă jê̆ 900 triệu hlak jên.

Kơsô̆ hla ar chih ‘nâu jĭ iŏk yua đơ̆ng tơdrong jang krao hơvơn “Mĭnh triệu hla ar chih ăn kơ hŏk tro dơnuh hin dôm hơdrĕch hơdrŭng Tây Nguyên păng dêh char Bình Phước” yua đơ̆ng Khŭl jang mơdro sa Khŭl lĭnh so Việt Nam tơlĕch jang, bơ̆jang kiơ̆ lơ̆m 2 sơnăm (2023-2024). ‘Nâu jĭ tơdrong jang tơƀôh tơdrong bơngơ̆t truh, vei lăng đơ̆ng dôm anih jang păng Khŭl lĭnh so rim tơring hăm jơhnơr mơlôh vă tơgop pơlung, pơtrŭt, tơgŭm ăn hŏk tro đei dơ̆ng tơdrong hiôk truh tơ̆ hnam trưng lơ̆m sơnăm hŏk ‘nao.