Đảng viên Đặng Dậu Quý rơneh sơnăm 1983 oei tơ̆ tơring Cư Suê, apơŭng Cư M’gar, hlôi hŏk đang đăi hŏk bơ̆ jang tơ̆ mĭnh Hơnih mong jên tơ̆ Đăk Lăk hăm sa jên khei tôch kơ păi. Mă lei, đơ̆ng rŏng 10 sơnăm, lăng ƀôh tơdrong jang hơnih jang mong jên ưh kơ lăp hăm kơ dih, kơna ‘nhŏng pơdơ̆h jang vă chŏh jang sa. Hlôi đei 1ha 6 sao mir đei mĕ ƀă chrek ăn, atŭm hăm kon jên mong răk đơ̆ng bơ̆ jang lơ̆m hơnih mong jên, ‘nhŏng koh rô̆ hŭt 800 dơnơm chehphe kră krŭt, tŏk iŏk jên đơ̆ng hơnih mong jên pơtăm hrau 300 hơdrơ̆ng tiu păng vă jê̆ 100 dơnơm sầu riêng.

‘Măng mă blŭng, tim gan băt jang, lơ dơnơm sâu riêng păng tiu lôch pơm ăn hiong răm kơtang. Ư̆h kơdŭn tơ̆ rŏng, ‘nhŏng tŏk iŏk kon jên đơ̆ng ŭnh hnam, bôl boăl pơtăm ming dơ̆ng dôm dơnơm lôch, hŏk pơhrăm đơ̆ng rim bơngai joăt jang choh jang sa jang kiơ̆ pơtăm kiơ̆ trong tuh mơ̆r. Hơlen đơ̆ng tơdrong răm, roi năr mir pơgar ‘nhŏng ‘long pơtăm blŭh vơ̆ jing ‘lơ̆ng đei iŏk yua kơjăp. Iŏk đei jơnei đơ̆ng ‘long pơtăm, ‘nhŏng pơ̆ih să pơgar ơng dơđăh ‘long. Hơdrô̆ lơ̆m sơnăm 2022 au ki, mir pơgar ‘nhŏng atŭm hăm pơgar ơng dơđăh hlôi hơnhăk đei iŏk yua ăn kơ ‘nhŏng truh 600 triu hlak jên. ‘Nhŏng Đặng Dậu Quý tơroi:“Hăm bơngai đảng viên, ba băt kơ dih bơ̆n kăl hơdrin pơm jŭk yŭk trong hơlau lơ̆m choh jang sa, ăp jang sa đei iŏk yua kơjăp ‘nŏh mă kĕ chă tơgŭm ăn ŭnh hnam păng tơgum djru ăn bơngai anai. Nhen sơnăm au ki, ba phĕ đei 6 tân sâu riêng tĕch iŏk đei 300 triu hlak jên; 2 tân tiu ‘nŏh tĕch đei 120 triu păng iŏk đei đơ̆ng pơgar ơng dơđăh hăm chehphe ‘nŏh jei đei hloh 100 triu dơ̆ng. Tơklăh pơđĭ kon jên tơmơ̆t jang, ŭnh hnam oei iŏk đei hloh 300 triu hlak jên.”

Đảng viên Võ Văn Hoàng 64 sơnăm, oei tơ̆ tơring Ea Tu, pơlei tơm Buôn Ma Thuột hăm jơhngơ̆m đon pơnam, hơdrin păng gơ̆h găt băt ‘mêm kơ eng kơ đe. Pơlei tơm đơ̆ng dêh char Quảng Ngãi, kiơ̆ mĕ ƀă năm tơ̆ Đak Lăk oei đơ̆ng hơdrol teh đak rơngei hiôk hian 1975. Lơ̆m tơdrong choh jang sa, yak hloh ưh kơbăt dôm yơ tơdrong tơnap tap hrat hrĭn, hiong răm lơ đơ̆ng nŏh mă đei jơnei. Hrei au, đơ̆ng rŏng lơ sơnăm jang sa, ƀok đei 5ha mir pơtăm sâu riêng pơtăm hrau bơ̆n ‘long sa plei nhen măng cụt, krô̆i kam, kuyt, krô̆i pung ... Jang sa iŏk đei đơ̆ng mir pơgar lơ̆m sơnăm dang 4 ti hlak jên, tơklăh pơđĭ kon jên tơmơ̆t jang ŭnh hnam oei iŏk đei hloh 2 ti hlak jên. Ŭnh hnam jang sa đei ƀôh kơna ƀok ling lang chă tơgŭm djru dôm ŭnh hnam tơnap tap găh kon jên tơmơ̆t jang, hơdrĕch ‘long pơtăm, phong păng tơdrong erih sa adoi nhen tơ iung pơjing tơring tơrang ‘nao tơ̆ tơring. Ƀok Võ Văn Hoàng tơroi:“Jĭ bơngai đảng viên kơ ba hơdrin pơm jŭk yŭk trong hơlau lơ̆m jang sa atŏk tơ iung mŭk drăm, đơ̆ng noh kon pơlei jang kiơ̆. Ba băt kih thuơ̆t jang sa ‘nŏh chă pơtho tơbăt ăn kon pơlei hloi, chă tơgŭm dih băl vă vang atŏk tơ iung. Dôm sơnăm jang pơgar ơng dơđăh, lăng ƀôh ŭnh hnam ayơ tơnap tap ‘nŏh ba tơgŭm, tơdăh ŭnh hnam tơnap dă ƀiơ̆ ‘nŏh ba tĕch ăn đe sư hre, găh dôm ŭnh hnam ayơ tơnap tap hloh ‘nŏh ba asong đĕch; găh rim ŭnh hnam tơnap tap găh hnam oei, mă khul chă pơm ăn hnam ‘mêm mơnat ‘noh ba vang chă tơgŭm ăn lơ̆m 1 ŭnh hnam đơ̆ng 5 - 10 triu hlak jên, gô mơ̆ng kiơ̆ dôm ŭnh hnam ‘nŏh tơnap tap dang yơ. Ba jei vang chă tơra pơm trong nơnăm, chă hơvơn kon pơlei thôn 3 pơm pơđĭ rim jăl trong lơ̆m thôn hloi.”

Yă Lại Thị Loan – Kơdră chĕp pơgơ̆r Khul kon pơlei choh jang sa dêh char Đak Lăk hơlen, găh lơ rim đảng viên jei iung jang ƀlep hăm hơnăp jang pơm juk yuk trong hơlau lơ̆m choh jang sa atŏk tơ iung mŭk drăm. Rim bơngai jang lơ̆m khul nhen Đặng Dậu Quý dăh mă Võ Văn Hoàng jei dôm bơngai “đảng viên yak hơlau, kon pơlei rok kiơ̆ đơ̆ng rŏng”, ‘nau dôm bơngai kăl hloh pơjing đei jơhngơ̆m lang să lơ̆m tơdrong jang atŏk tơ iung mŭk drăm xut xa pơngot rơvĕt tơjur dơnuh tơ̆ tơring. Yă Lại Thị Loan akhan, vă tơdrong jang atok tơ iung xut xa pơngot rơvĕt tơjur dơnuh kơ khul au roi năr roi pran kơtang, măt bơngai đảng viên lơ̆m khul roi năr roi lơ, khei năr kơnh khul kăl lăng ba kơjăp hloh dơ̆ng tơdrong jang atŏk tơ iung đảng viên, pơjing hơyak pran vă roi năr roi đei ƀôh lơ hloh dơ̆ng dôm bơngai đảng viên pơm jŭk yŭk trong hơlau, jang sa gơ̆h hơgei:“Nhôn lăng kơjăp tơdrong tơroi tơbăt dôm bơngai lơ̆m khul bơ̆ jang ‘lơ̆ng vă pôk tơmơ̆t jang lơ̆m Đảng. Lơ̆m rim tơdrong jang hơdăh, ‘nŏh atŭm hăm rim khul bơ̆ jang au to, nhôn đei trong iung jang hơdăh nhen pơjao ăn rim đảng viên, rim kơdră khul lăng tông nông gia dôm kon pơlei choh jang sa ‘lơ̆ng hơ iă vă pơtho pơjing, tơgum djru, tơdăh ƀôh đei tôm tơdrong rơvơn ‘lơ̆ng hơ iă ‘nŏh pôk tơmơ̆t vă rim bơngai lơ̆m khul au mơ̆t jang lơ̆m khul jang Đảng.”

Ư̆h khan jang mŭk drăm hơgei, rim đảng viên nhen ‘nhŏng Đặng Dậu Quý dăh mă ƀok Võ Văn Hoàng oei hơnơ̆ng hơdrin tơroi tơbăt, chă pơma dơnuh tơbăt dih băl trong jang sa hơgei, tơgŭm djru rim bơngai lơ̆m khul oei tơnap tap atŭm dih băl atŏk tơ iung choh jang sa đei iŏk yua kơjăp, sơđơ̆ng erih sa; hơdrin kơtang vang tơgop tơ iung pơjing tơring tơrang 'nao tơ̆ tơring.