VOV4.Bahnar - Kơsơ̆ năr 18/2, Trung ương Khŭl Sinh viên Việt Nam sơng iŏk tơdrong tơgŭm djru ăn Hơnih mong jên Tơgŭm djru păng atŏk tơ iung sinh viên Việt Nam păng rim tơdrong jang tơgŭm djru chă tơchĕng khoa hŏk kơ Khŭl.

Khŭl Sinh viên Việt Nam sơng iŏk tơdrong tơgŭm djru 20 ti hlak jên tơgŭm ăn sinh viên

Sơnăm 2022, Kơ iĕng Kơdră chĕp pơgơ̆r Khŭl chĕp pơgơ̆r Kŏng ty Tơmơ̆t jên jang păng Mơdro sa Golf Long Thành Lê Nữ Thùy Dương hlôi kĭ pơkăp drơ̆ng mĭnh nơ̆r pôk ăn 10 ti hlak jên tơgŭm ăn Hơnĭh mong jên Tơgŭm djru păng Atŏk tơ iung Sinh viên Việt Nam vă tơgŭm ăn rim ŏh sinh viên tơnap tap hơdrin hŏk pơhrăm. Kon jên au gô đei mong răk lơ̆m Hơnĭh Mong jên Tơgŭm djru păng Atŏk tơ iung Sinh viên Việt Nam. Rim sơnăm, Hơnĭh mong jên au tơlĕch kon jên vă pôk ăn kon jên hŏk pơhrăm ăn sinh viên. Adoi, yă Lê Nữ Thùy Dương jei pôk ăn Khŭl Sinh viên Việt Nam 10 ti hlak jên vă pơgơ̆r iung jang rim tơdrong hŏk pơhrăm, chă pơjing, chă tơchĕng khoa hŏk păng tơplĭh kơsô̆ hăm tơlĕch jang tơdrong jang “Sinh viên 5 ‘lơ̆ng” lơ̆m sơnăm 2022.

Tơblơ̆ nơ̆r: Amazư̆t