VOV4.Bahnar - Giĕng âu ki, Khŭl dăr hơ len tơ drong jang đơ̆ng Khŭl tang măt Kuôk hô̆i dêh char Dak Lak hlôi pơ gơ̆r dăr hơ len tơ̆ Anih vei lăng tơ mam drăm păng cham char găh tơ drong jang kiơ̆ trong jang tơ gŭm, khôi luơ̆t găh bơ̆ jang kiơ̆ ‘mơ ‘met, tơ jră brăh brư. Tơ̆ jơ bơ̆ jang, Khŭl dăr hơ len hlôi athei anih jang âu pơm rơ đăh 1,2 tơ drong gĭt kăl đei tơ drong hơ lĕnh kơ jă teh tŏk lơ tơ̆ dêh char lơ̆m khei ‘năr âu ki, pơm ưh kơ ‘lơ̆ng đunh đai.

Tơ̆ hơ năp kơ jă teh tŏk lơ ưh kơ ê, pơm jing tơ drong kăl kơ teh khei ‘năr âu ki tơ̆ dôm tơ ring hơ met ăn vă tơ lĕch jang dôm tơ drong jang tih tơ̆ pơ lei tơm Buôn Ma Thuột păng dôm apŭng tơ jê̆ pơm ăn kon pơ lei ưh kơ sơ đơ̆ng jơ hngơ̆m choh jang sa. Mă kăl ‘noh, lơ kon pơ lei kon kông tĕch lê̆ teh choh jang sa. Khŭl dăr hơ len tơ tăm găh trong jang sơ đơ̆ng păng vei lăng đei yua teh. Yă Nguyễn Thị Xuân, bơ ngai tang măt Kuôk hô̆i dêh char Dak Lak tơ roi:

        “Dôm sơ năm âu ki dêh char tôch kơ bơ ngơ̆t truh hơ drin pơ gơ̆r tơ drong asong teh oei, teh choh jang sa ăn kon pơ lei kon kông. Mă lei, kiơ̆ đơ̆ng tơ drong hơ lĕnh kơ jă teh tŏk lơ hrei ‘nâu ‘noh đơ̆ng rŏng 2,3 sơ năm dơ̆ng, gô pơm ăn ưh kơ ‘lơ̆ng truh kon pơ lei ưh kơ măh teh oei, teh choh jang sa. Kơ plăh doh kơnh bơ̆n iŏk teh đơ̆ng yơ vă asong ăn kon pơ lei?

        Kiơ̆ kơ ƀok Trần Đình Nhuận, Kơ dră Anih vei lăng găh tơ mam drăm păng cham char dêh char Dak Lak, chih jô̆ 3 khei blŭng sơ năm 2022, kơ sô̆ pơm hla ar găh teh lơ̆m tơ ring tŏk lơ hăm 103.000 ‘măng, tŏk vă jê̆ 200% pơ têng hăm khei ‘nâu sơ năm hơ drol. Kơ jă teh kŭm tŏk lơ pơ têng hăm jăl khei mă 4 sơ năm 2021. Đei tơ drong tơ plih tih găh bơ ngai păng ‘meh vă, kon pơ lei đơ̆ng pơ lei tơm Hồ Chí Minh, Hà Nội năm tơ̆ tơ ring jih pơ lei tơm Buôn Ma Thuột akŏm răt teh oei. Ƀok Nhuận kŭm akhan dôm tơ drong kơ kĕ tơ răn lơ̆m tơ drong jang vei lăng teh, mă loi noh tơ drong ăn phep tơ plih iŏk yua teh pơ đĭ hloi dôm tơ ring ưh kơ đei vei sơ đơ̆ng anih jang kăl, ăn bơ ngai ưh kơ đei ‘meh vă pơm hnam oei. ‘Ngoăih kơ ‘noh, khôi luơ̆t găh teh oei ưh kơ ‘lơ̆ng, tơ drong tơ plih iŏk yua teh ăn kon pơ lei pơm hnam ưh kơ hơ găt khei ‘năr pơ kăp, ưh kơ hơ găt tơ drong, kơ ƀang kơ jă teh đơ̆ng teh đak hơ găt ưh kơ kiơ̆ hơ dai kơ jă anih tĕch mơ dro....

Khŭl tang măt Kuôk hô̆i dêh char Dak Lak bơ̆ jang hăm Anih vei lăng găh tơ mam drăm păng cham char Dak Lak

Tơ drong teh tŏk kơ jă hlôi pơm ăn 4 tơ drong ƀơm truh ‘noh: Mơ mat tat lơ̆m jang kiơ̆ păng vei lăng chĕng hơ met, iŏk teh, jên ‘mong hrŭ, tơ kêng, pơ ma băl roi tŏk, ưh kơ đei thu iŏk ăn jên jang mưh pơm hla ar tĕch răt teh. 1,2 kon pơ lei kon kông ƀôh kơ jă teh tŏk lơ ‘noh tĕch teh đang kơ ‘noh yua jên ưh kơ đei yua kiơ, hiong teh choh jang sa, hiong tơ drong jang...Tơ̆ hơ năp tơ drong yan âu ‘nâu, Anih vei lăng găh tơ mam drăm - cham char hlôi đei hla ar tơ gŭm ăn Anih vei lăng kon pơ lei dêh char athei dôm apŭng vei lăng kơ jăp tơ drong tơ plih iŏk yua teh. Ƀok Trần Đình Nhuận tơ roi:

“Nhôn jang tơ gŭm lơ hla ar vă hơ met ming, athei dôm apŭng vei lăng kơ jăp tơ drong tơ plih iŏk yua teh, tơ ƀôh ăn tơ plih hăm teh choh jang sa hơ lam lơ̆m hơ nih kon pơ lei oei hlôi đei anih jang kăl păng ăn bơ ngai tơ pă đei ‘meh vă. Oei lơ̆m tơ ring tơ jê̆ chĕng hơ met teh anih kơ drơ̆m ‘nao, tơ ring tơ rang ‘nao athei đei kĭ ăn păng kiơ̆ tơ drong hơ găt đơ̆ng khôi luơ̆t.”

Kơ dră Anih vei lăng găh tơ mam drăm păng cham char dêh char Dak Lak Trần Đình Nhuận kŭm tơ blang hơ dăh đei 6 tơ drong tơm pơm ăn hơ nhăk truh teh hơ tŏk kơ jă lơ nhen: Ƀơm truh đơ̆ng chĕng hơ met teh iŏk yua teh sơ năm 2021-2030, ƀơm truh đơ̆ng dôm tơ drong jang tơm đei trung ương tơ mơ̆t jên jang, ƀơm truh đơ̆ng hơ tŏk tơ iung chĕng hơ met teh anih kơ drơ̆m, ƀơm ưh kơ ‘lơ̆ng đơ̆ng jĭ Covid-19, hơ tŏk kơ jă lơ, ưh kơ lăp băl păng đon tơ chĕng tơ pôl. Hơ dai hăm ‘noh, bơ ngai tơ mơ̆t jên jang bơ ngơ̆t truh kơ sô̆ cham char ‘lơ̆ng kơ dêh char vă ming man hnam ‘lơ̆ng tih chă ƀĭch pơ dơh ngôi.

Khei ‘năr âu ki, Anih vei lăng kon pơ lei dêh char Dak Lak kŭm hlôi đei lơ hla ar athei, jô̆ hloi pơ jao ăn anih jang kŏng an pơm rơ đăh dôm bơ ngai chă tơ roi ưh kơ ƀlep tŭn kơ jă teh măk ưh kơ ê vă iŏk yua ăn kơ dih. Athei Anih vei lăng kon pơ lei apŭng, pơ lei tơm vei lăng kơ jăp tơ drong tơ plih iŏk yua teh. Hơ nơ̆ng athei hơ met ming khei ‘năr pơ kăp tơ klăh teh choh jang sa kiơ̆ trong tơ̆ pơ lei tơm ‘noh 1.000m2 tơ̆ kơ pal, apŭng ‘noh 2.000 m2 tơ̆ kơ pal. Kŭm hăm ‘noh, pơ jao kơ rim anih jang ƀơm truh tơ chĕng hơ len vă kơ jă teh kơ teh đak hơ găt dang ăi kơ jă hăm anih tĕch mơ dro, kŏng chư̆ng tĕch răt teh athei dang ăi hăm kơ jă yan âu...

        Khŭl tang măt Kuôk hô̆i dêh char Dak Lak athei, Anih vei lăng găh tơ mam drăm păng cham char dêh char Dak Lak hơ tŏk loi dơ̆ng tơ roi tơ băt khôi luơ̆t vă jang kiơ̆ pơm ‘mơ ‘met, tơ jră brăh brư đei iŏk yua. Hơ dai hăm ‘noh, lăng kăl vei lăng jên jang teh đak, bơ ngai jang, mŭk drăm ƀlep tơ drong hơ găt; vei sơ đơ̆ng iŏk yua dôm tơ mam găh teh, tơ mam drăm lơ̆m teh, đak đei iŏk yua, kơ jăp ‘lơ̆ng.

Thuem: Tơ blơ̆