VOV4.Bahnar - Phó Thủ tướng Lê Minh Khái ‘nao kĭ tơ lĕch trong jang jên hu truh sơ năm 2030. Tơ drong tơm ‘nŏh vă vei lăng măh mai jên jang vang tơ gop bơ̆ jang dôm tơ drong jang tơm, tơ drong jang atŏk tơ iung mŭk drăm tơ pôl păng vei sơ đơ̆ng tĕh đak. Mă hơ dăh, kơ sô̆ jên mong akŏm ăn tĕh đak đơ̆ng 2021 -–2025 jô̆ păh lăp ưh đei tŏ sĕt hlŏh 16% GDP păng đơ̆ng 2026 –2030 'nŏh đơ̆ng 16 -17% GDP. Kơ sô̆ jên thu mong lơ̆m tĕh đak truh sơ năm 2025 đơ̆ng 85 - 86%, truh sơ năm 2030 đơ̆ng 86 - 87%.

Vei lăng tơ drong tơ lĕch jên jang mă 'lơ̆ng; hơ nơ̆ng hơ met ming jên tơ lĕch jang kiơ̆ trong kơ jăp 'lơ̆ng; pơ 'nhŏ ăn dôm tơ drong jang tŏk păng vei lăng 'lơ̆ng jên vă kla hre, hơ tŏk jên mong kơ tĕh đak tơ̆ anih 'măn răk, hơ tŏk jên tơ lĕch ăn kon bơ ngai păng vei lăng sơ đơ̆ng tơ drong arih xa tơ pôl. Đơ̆ng 2021 - 2030, pơ 'nhŏ jên vă mong akŏm 'măn răk kơ tĕh đak, lăp hăm trong tơ lĕch jang vă tơ jră hrĕnh, đei yoa mưh đei tơ drong kăl ưh tom băt păng jang 'lơ̆ng dôm tơ drong jang đei Khul kơ dră tĕh đak, Thủ tướng tĕh đak pơ jao.

Dơ̆ng: Tơ blơ̆