VOV4.Bahnar - ‘Nao âu, Kơ dră chĕp kơ̆l Đảng păng tĕh đak đei jơ tơ ƀâp bơ ngai kon kông pơm bơ ngai tang măt Kuô̆k hô̆i jăl 15. Pơ ma lơ̆m jơ tơ ƀâp, Kơ dră Kuô̆k hô̆i Vương Đình Huệ tơ ƀôh đon hơ mĕng păng lui akhan, rim bơ ngai kon kông pơm bơ ngai tang măt Kuô̆k hô̆i hơ nơ̆ng adrin vă jang đang ‘lơ̆ng hlŏh tơ drong jang kơ dih, adrin vă tơ găl hăm đon lui đơ̆ng bơ ngai tăh hla lơ̆m tĕh đak, mă loi jĭ kon pơ lei kon kông, bơ ngai tăh hla tơ̆ tơ ring kon kông păng groi kông. 

Kơ dră Kuô̆k hô̆i Vương Đình Huệ pơ ma hơ dăh, Đảng păng tĕh đak ling lang vei kơ jăp trong jang tơ guăt đĭ đăng hơ drĕch hơ drung, năng ‘nâu jĭ tơ drong jang tôch gĭt kăl hăm tĕh đak bơ̆n, 1 tĕh đak kơ jăp ‘lơ̆ng hăm 54 hơ drĕch hơ drung oei xa hơ dai, vang yak 1 trong lơ̆m tơ drong pơ jing păng vei lăng tĕh đak đơ̆ng jơ hnơr rim hơ drĕch hơ drung păng ling lang vei kơ jăp tơ drong pơ jing trong tơ guăt đĭ đăng hơ drĕch hơ drung, kiơ̆ đơ̆ng năng hơ tŏ băl, 1 ƀơ̆r đon, năng kăl păng tơ gŭm băl jang tŏk. Dôm trong jang đei ƀơm truh tơ̆ kon pơ lei kon kông, đei chih hơ dăh lơ̆m khôi luơ̆t tơm kơ tĕh đak Cộng hoà xã hội chủ nghĩa Việt Nam. Dôm sơ năm âu ki, đei lơ trong jang, tơ drong tơ gŭm jang atŏk tơ iung mŭk drăm, tơ pôl hăm tơ ring kon kông păng groi kông, tơ drong arih xa găh tơ mam drăm, jơ hngâm đon kơ kon pơ lei kon kông roi tŏk, pơm tơ plih đei um ai tơ̆ tơ ring kon kông păng groi kông.

Jơ tơ ƀơ̆p muh măt

Mă lei, yoa anih jang tŏk blŭng a kơ đĕh, tơ ring choh jang xa mơ mat tat, hơ tăih kơ tơ ring kơ drâm, tŏ ‘mi kial ưh kơ ‘lơ̆ng, hơ nơ̆ng pŭ răm đơ̆ng tŏ ‘mi kial tơ plih, anih jang, trong nơ năm oei tam mă ‘lơ̆ng. Kơ na hrei ‘nâu, tơ ring kon kông păng groi kông oei jang tŏk hiơ̆, iŏk yoa jô̆ păh lăp kiơ̆ kơ̆l bơ ngai đơ̆ng kon pơ lei kon kông oei tŏ sĕt ƀiơ̆ pơ têng hăm kơ sô̆ jô̆ atŭm lơ̆m tĕh đak, đei ƀôh lơ tơ drong krê roi plŏh plĕch băl.

Kiơ̆ dôm tơ drong tơ chơ̆t đơ̆ng Trung ương, ‘năr 18/11/2019 Kuô̆k hô̆i tơ lĕch Tơ drong tơ chơ̆t kơ sô̆ 88 kĭ ăn tơ drong jang tơm atŏk tơ iung mŭk drăm, tơ pôl tơ̆ tơ ring kon kông păng groi kông đơ̆ng 2021-2030, chih hơ dăh: “Dôm tơ drong tơ gŭm jang tŏk mŭk drăm tơ pôl, vei sơ đơ̆ng tơ̆ tơ ring kon kông păng groi kông athei jang mă ‘lơ̆ng, năm truh tơ drong tơm hlŏh jĭ jang tŏk pran kơ jăp păng iŏk yoa ‘lơ̆ng dôm tơ drong ‘lơ̆ng tơ̆ tơ ring păng đon adrin jang kơ dih đơ̆ng kon pơ lei kon kông” kŭm hăm dôm tơ drong jang kăl nai păng đon hơ mĕng, păng đon pơ hnŏng jang chinh trĭ tôch ai.  

Vă jang đei dôm tơ drong ‘nŏh păng tơ drong kăl hrei ‘nâu, Kơ dră Kuô̆k hô̆i Vương Đình Huệ athei dôm bơ ngai tang măt Kuô̆k hô̆i pơ ma atŭm, mă loi jĭ Anih vei lăng hơ drĕch kon kông păng dôm bơ ngai tang măt jĭ bơ ngai kon kông lơ̆m jăl XV mă đơ̆ng jang kơ tă dăh mă jang hloi lơ kơ chư̆k tơ̆ dôm khul athei tơ rĕk, tơ gop kŭm hăm Kuô̆k hô̆i akŏm jơ hngâm dăr lăng, vă anih jang kơ pal đei ƀơm truh bơ̆ jang ‘lơ̆ng 1,2 tơ drong jang nhen:

“Kơ chăng, adrin păng jang mă hrĕnh hlŏh dơ̆ng lơ̆m tơ drong chih pơ jing trong dăr lăng, vă anih jang kơ pal bơ̆ jang trŏ hơ năp jang kiơ̆ tơ drong tơ chơ̆t đơ̆ng Kuô̆k hô̆i, hơ nơ̆ng tơ iung đon jang tơ năp, jang tŏk kơ dih, tơ gŭm băl đơ̆ng rim hơ drĕch hơ drung, đơ̆ng dôm tơ ring, tơ drong vang jang ‘lơ̆ng, đei yua đơ̆ng dôm anih jang mơ dro xa hăm kon pơ lei kon kông, atŏk loi dơ̆ng grŭp tơ goăt tơ goăl đĭ đăng hơ drĕch hơ drŭng. Bơ ngai tang măt Kuô̆k hô̆i bơ ngai kon kông hơ nơ̆ng kăl atŏk ‘lơ̆ng hloh dơ̆ng hlôh vao găh tơ drong jang vei lăng kon kông hăm kăn ƀô̆, kơ dră đảng, kơ dră chĕp kơ̆l tơ ring, mặt trận, đĭ đăng rim kơ dră lơ̆m khŭl jang chĭnh trĭ, bơ̆ jang kiơ̆ ‘lơ̆ng trong jang tơ gŭm hơ tŏ hơ nơ̆ng, 1 jơ hngơ̆m đon, pơ yom tơ gŭm băl vang jang tŏk, atŏk đon kơ chăng păng tang găn dôm tơ drong tơ chĕng vă pơm kơ nê̆, iŏk yua tơ drong kon kông, che re grŭp tơ goăt tơ goăl đĭ đăng hơ drĕch hơ drŭng; hơ met ‘lơ̆ng đon tơ chĕng kơ dơ̆ mơ lâu đơ̆ng bơ ngai kon kông.”

Kơ dră Kuôk hô̆i Vương Đình Huệ pơ ma tơ̆ jơ tơ ƀơ̆p muh măt

Kơ dră  Kuô̆k hô̆i Vương Đình Huệ ‘meh vă dôm bơ ngai tang măt Kuôk hô̆i jĭ bơ ngai kon kông hơ drin tơ chĕng hơ len, tơ lĕch nơ̆r păng pơm hơ dăh ‘lơ̆ng dôm tơ drong jang, trong jang tơ gŭm bơ ngai kon kông đơ̆ng Đảng păng teh đak bơ̆n jing dôm tơ drong jang, tơ drong hơ găt, hơ năp jang hơ dăh; bơ ngơ̆t truh trong jang tơ gŭm vei sơ đơ̆ng bơ̆ jang kiơ̆ đei yua dôm trong jang tơ gŭm đơ̆ng Teh đak tơ̆ tơ ring groi kông, tơ ring sơ lam, tơ ring kon pơ lei kon kông; akŏm pơ jing tơ ring kon kông păng tơ ring groi kông jang tŏk hrĕnh găh mŭk drăm, joh ayŏ, tơ pôl, pran kơ jăp găh tơ drong sơ đơ̆ng, khŭl linh, mơ̆t jang hơ dai hăm tơ drong jang tŏk atŭm kơ teh đak, tơ găl hăm anih dơ̆ng gĭt kăl kơ teh đak.

Kơ dră Kuô̆k hô̆i athei dôm bơ ngai tang măt Kuô̆k hô̆i jĭ bơ ngai kon kông akŏm jang tơ gŭm pơ jing, hơ met ming, tơ mơ̆t dơ̆ng dôm trong jang tơ gŭm khôi luơ̆t mă lăp hăm yan âu păng athei atŏk loi dơ̆ng tơ mơ̆t jên jang, tơ gŭm adrol atŏk tơ iung tơ ring kon pơ lei kon kông păng tơ ring groi kông, tơ ring sơ lam; mă kăl ‘noh tơ rĕk truh trong jang tơ gŭm atŏk tơ iung jang sa, atŏk ‘lơ̆ng tơ drong arih sa, atŏk tơ iung tơ drong jang pơ tho pơ hrăm, jang pơ gang, atŏk ‘lơ̆ng bơ ngai jang, atŏk ‘lơ̆ng kang ƀô̆ tơ ring, kang ƀô̆ bơ ngai kon kông; trong jang tơ gŭm pơ tho hŏk tơ drong jang, tơ chă ăn tơ drong jang, vei sơ đơ̆ng tơ drong arih xa tơ pôl, atŏk tơ iung kơ jăp ‘lơ̆ng; tơ klep atŏk tơ iung mŭk drăm tơ pôl hăm vei lăng cham char bri brăh; atŏk tơ iung mŭk drăm tơ pôl hăm vei sơ đơ̆ng teh đak; pơ jing tơ ring tơ rang ‘nao; pơm anih jang tơ mam drăm ăn tơ drong jang kơ măy kơ mŏk ‘nao; vei răk păng tơ ƀăk mong tơ drong oei xa ‘lơ̆ng hơ iă lơ̆m tơ pôl dôm hơ drĕch hơ drŭng Việt Nam.

Dơ̆ng: Tơ blơ̆