VOV4.Bahnar - Sơ năm hŏk ‘nao pơ tơm truh. Tơ drong jang kiơ̆ trong tơ gŭm ăn kon hơ ‘lơ̆p bơ ngai kon kông hơ nơ̆ng đei Kuô̆k hô̆i tơ rĕk truh. ‘Nao âu, Kơ dră Kuô̆k hô̆i Vương Đình Huệ truh akŏm lơ̆m jơ pơm lêh et hơ tŏk Hnam trưng Trung học phô thŏng Kỳ Sơn, Nghệ An păng pơm lêh mât blŭng sơ năm hŏk ‘nao 2022-2023. Kơ dră Kuô̆k hô̆i pơ ma hơ dăh, vei lăng năng tông, pơ tho pơ hrăm mă ‘lơ̆ng ăn đe ŏh ‘nŏh jĭ tơ drong kăl hlŏh, jĭ chơ khoă vă năm truh ning mônh kơnh, pơ klăih kon pơ lei đơ̆ng tơ drong tơ nuh hin, kơ tul jơ du, vă gơ̆h đei tơ drong arih xa phĭ tơ tŏ dơ nŏ ‘lơ̆ng, hiôk chơt. 

Kỳ Sơn jĭ apŭng sơ lam, tơ ring groi kông, kon pơ lei kon kông lơ, găh 1/74 apŭng mơ mat tat dêh hlŏh lơ̆m tĕh đak. Hnam trưng THPT Kỳ Sơn đei pơ jing sơ năm 1967 ‘nŏh jĭ 1 hnam trưng THPT tơ̆ apŭng Kỳ Sơn hăm hlŏh 95% ‘nŏh jĭ kon hơ ‘lơ̆p bơ ngai kon kông truh đơ̆ng 21 xăh, thĭ trơ̆n lơ̆m apŭng. Trong năm tơ̆ hnam trưng đơ̆ng đe ŏh athei yak trong bri kông, tơ hrông trong đak tôch hơ mơt, mă loi ‘nŏh lơ̆m pơ yan ‘mi kial, hơ nơ̆ng đei tĕh hơ lih.

Kơ dră Kuô̆k hô̆i Vương Đình Huệ năm pơm lêh mât hŏk sơ năm hŏk ‘nao tơ̆ Nghệ An

Adrol kơ man hnam trưng ‘nao, tơ mam, lăm hŏk tơ̆ hnam trưng đĭ so ngăl bơih, ưh đei anih oei ăn hŏk tro păng thây kô, vă rim hŏk tro athei pơ ngơ̆t ăn kơ dih găh anih oei, sŏng xa, tep pơ dơ̆h vă hŏk pơ hrăm. Hnam trưng THPT Kỳ Sơn đei man ‘nao ‘lơ̆ng rŏ, đei tôm tĕch tơ mam ‘nao, lăp hăm tơ drong hơ găt ‘lơ̆ng kơ tĕh đak, gơ̆h ăn 2.000 ‘nu hŏk tro hŏk pơ hrăm, hăm đĭ đăng 245 lăm hŏk.

Pơ ma lơ̆m jơ pơm lêh, Kơ dră Kuô̆k hô̆i Vương Đình Huệ pơ ma dơ̆ng đon tơ chĕng đơ̆ng Ƀok Hô găh pơ tho pơ hrăm, atŭm hăm ‘nŏh pơ ma hơ dăh, Đảng păng tĕh đak bơ̆n ling lang năng kăl tơ drong pơ tho pơ hrăm, năng ‘nâu jĭ trong jang tơm; hơ nơ̆ng ‘măn dôm tơ drong ‘lơ̆ng hlŏh vă vei lăng, năng tông tơ drong pơ tho pơ hrăm, pơm ‘lơ̆ng ăn đĭ đăng hŏk tro, mă tơ̆ tơ ring tơ hnă dăh mă tơ̆ tơ ring groi kông, tơ ring sơ lam, tơ ring achon kông tơ̆ đak dơ sĭ, bu bu kŭm đei hŏk pơ hrăm hơ tŏ ‘lơ̆ng thoi băl.

“Atŏk tơ iung pơ tho pơ hrăm, pơm hơ tŏ ‘lơ̆ng lei lăi băl lơ̆m tơ drong pơ tho pơ hrăm, vă ưh đei bu đei hŭt hơ chăng tơ̆ rŏng, mă loi ‘nŏh jĭ kon pơ lei kon kông tơ̆ tơ ring hơ tăih yăih, kon pơ lei kon kông roi kăl đei tơ gŭm hlŏh dơ̆ng vă pơm tơ jur ƀiơ̆ mơ mat tat, dar dĕh jang tŏk, druh kiơ̆ tom tơ ring tơ hnă ‘nŏh jĭ đon tơ chĕng, nơ̆r pơ tho tih păng hơ nơ̆ng đơ̆ng Đảng, tĕh đak bơ̆n. Khul kơ dră chĕp kơ̆l Trung ương hlôi tơ lĕch tơ drong tơ chơ̆t kơ sô̆ 29 găh tơ plih ‘nao tôm tơ drong mưh pơ tho pơ hrăm. Kuô̆k hô̆i akŏm jơ hngâm chih hơ dăh đon tơ chĕng đơ̆ng Đảng, hơ met pơ ‘lơ̆ng păng tơ lĕch lơ tơ drong tơ gŭm, khôi luơ̆t vă atŏk tơ iung pơ tho pơ hrăm, mă loi ‘nŏh jĭ tơ drong tơ chơ̆t 88 găh tơ plih ‘nao trong pơ tho, hla ar hŏk phô thŏng. Vei lăng, pơ tho pơ hrăm mă ‘lơ̆ng ăn đe ŏh ‘nŏh jĭ tơ drong kăl hlŏh, jĭ chơ khoă vă năm truh ning mônh kơnh, pơ klăih kon bơ ngai đơ̆ng tơ nuh hin, kơ tul jơ dư vă tơ drong arih xa gơ̆h phĭ tơ tŏ, dơ nŏ ‘lơ̆ng, hiôk chơt”.

Yoa thoi nŏh, Kơ dră Kuô̆k hô̆i Vương Đình Huệ tơ ƀôh đon hơ pơi ‘mĕh, đe thây kô hơ nơ̆ng jing bơ ngai tơ ƀôh trong chong glung găh jơ hngâm đon ‘lơ̆ng, nơ̆r pơ ma xa, đon jang tơ năp hăm tơ drong jang, đĭ jơ hngâm ‘mêm kơ eng, pơ tho tơ ƀôh; ưh lăp pơ tho chư, tơ drong hlôh vao đĕch mă oei jing bơ ngai tơ iung jơ hngâm hưch hanh vă đe ŏh pơ nam hŏk, chă hơ len năng tơ drong hlôh vao, gơ̆h hơ gei păng khoa hŏk.

Kơ dră Kuô̆k hô̆i Vương Đình Huệ tĕh hơ gơ̆r pơ tơm mât hŏk sơ năm hŏk ‘nao

Kơ dră Kuô̆k hô̆i Vương Đình Huệ tơ ƀôh đon hơ mĕng păng lui đe ŏh hŏk tro vă tưk hơ tŏk đon pơ nam hŏk, hŏk gơ̆h hơ gei đơ̆ng kon pơ lei tơ ring Nghệ, adrin hlŏh dơ̆ng, hŏk pơ hrăm pơ nam hlŏh dơ̆ng, đei đon tơ păt, đon adrin tôch ai; hŏk blŭng a ‘nŏh vă pơ ‘nhŏ ăn kơ dih, vă hlôh vao, vă bơ̆ jang, vă arih xa hơ dai, vă tơ ƀôh kơ dih; hŏk vă hơ met ăn kơ dih kâu trong ‘lơ̆ng hlŏh vă ning mônh kơnh bơ̆ jang, tơ gop ăn pơ lei pơ la tĕh đak. Kơ dră Kuô̆k hô̆i athei anih jang đảng, khul kơ dră tơ ring păng anih pơ tho pơ hrăm tơ rĕk, pơ tho tơ ƀôh pơ jing tơ drong pơ ma xa ‘lơ̆ng hơ iă tơ̆ hnam trưng, vă rim hnam trưng ưh lăp anih pơ tho pơ hrăm ‘lơ̆ng, thây kô jĭ ƀok thây kô, hŏk tro jĭ hŏk tro, hnam hŏk jĭ hnam hŏk mă oei jing anih ‘lơ̆ng hơ iă hlŏh, đei tơ drong juăt ‘lơ̆ng hlŏh tơ̆ tơ ring, kơ hơ drĕch hơ dung đei rong, vei lăng, tưk tơ iung lơ̆m jơ hngâm, đon ‘mêm, tơ drong tơ chĕng, hlôh vao đơ̆ng rim đe ŏh hŏk tro, đơ̆ng rim hnam trưng.

Hnam trưng THPT Kỳ Sơn athei jing hnam trưng jang pơ long năng hơ drol kơ dêh char lơ̆m tơ drong pơ jing tơ drong pơ ma xa ‘lơ̆ng hơ iă tơ̆ hnam hŏk tơ klep hăm tơ plih ‘nao, hơ tŏk tơ drong ‘lơ̆ng mưh pơ tho păng hŏk. Atŭm hăm ‘nŏh, akŏm jơ hngâm pơ jing păng tơ lĕch jang pơ long năng Hnam trưng THPT hŏk tro kon kông hŏk, kơ ‘năr oei tơ̆ hnam trưng rơ gei ‘lơ̆ng hơ dai hăm pơ jing kơ jă kăp gĭt đơ̆ng pơ ma xa, oei xa tơ̆ hnam trưng đei ƀĕnh tơ drong juăt ‘lơ̆ng đơ̆ng tơ ring groi kông Kỳ Sơn.

Kơ dră Kuô̆k hô̆i ăn tơ băt, sơ năm 2022-2023 ‘nŏh jĭ sơ năm mă blŭng tơ lĕch tơ drong tơ chơ̆t 88 găh tơ plih ‘nao tơ drong pơ tho, hŏk ar hŏk, trong pơ tho pơ hrăm păng kiêm tra hơ len năng kiơ̆ Tơ drong pơ tho pơ hrăm phô thŏng 2018 hăm lăm 10. Anih chĕp kơ̆l pơ gơ̆r Kuô̆k hô̆i vă pơ gơ̆r hơ len năng găh tơ drong tơ plih ‘nao tơ drong pơ tho, hla ar hŏk phô thŏng lơ̆m sơ năm 2023 vă tơ tom chă ƀôh, hơ met ming dôm tơ drong tơ hlăk, pơm ‘lơ̆ng ăn tơ drong ‘mĕh vă đơ̆ng Đảng păng Kuô̆k hô̆i đei tơ lĕch bơ̆ jang tôm tĕch, ‘lơ̆ng hơ iă.

Dơ̆ng: Tơ blơ̆