VOV4.Bahnar - Giĕng âu ki, Khŭl dăr hơ len kơ Kuôk hô̆i jăl  XV hlôi bơ̆ jang tơ̆ 2 dêh char Lâm Đồng păng Gia Lai găh tơ drong ‘mơ ‘met, tang găn brăh brư jăl jang 2016 – 2021. Kiơ̆ kơ ‘noh, khŭl dăr hơ len athei rim tơ ring roi tơ băt dôm jơ nei mă hơ dăh, dôm tơ drong oei đei, ưh kơ ‘lơ̆ng, tơ drong tơm pơm ăn păng apĭnh tơ lĕch nơ̆r vă hơ nơ̆ng jang ‘lơ̆ng tơ drong jang ‘mơ ‘met tang găn brăh brư lơ̆m dêh char lơ̆m jăl jang truh.

            Tơ̆ Lâm Đồng, Khŭl dăr hơ len kơ Kuôk hô̆i yua đơ̆ng Thượng tướng Trần Quang Phương, Bơ ngai jang lơ̆m Trung ương Đảng, Phŏ Kơ dră Kuôk hô̆i chĕp kơ̆l hlôi đei jơ bơ̆ jang hăm Anih vei lăng kon pơ lei dêh char Lâm Đồng găh tơ drong ‘mơ ‘met, tang găn brăh brư jăl jang 2016 – 2021.

Roi tơ băt tơ̆ jơ bơ̆ jang ăn ƀôh, dêh char Lâm Đồng hlôi akŏm vei lăng kơ jăp iŏk, tơ lĕch jên jang teh đak, vei sơ đơ̆ng iŏk ƀlep, iŏk tôm, tang găn hiong, hoach kư̆ kă, tơ jur hre jên thuê̆. Vei kơ jăp ‘mơ ‘met tơ lĕch jên jang, tơ gep hơ dai dôm trong jang tơ gŭm, pơ jing trong jang ‘mơ ‘met vă bơ̆ jang kiơ̆ hloi đơ̆ng tơ drong klăih song jên jang păng pơ đĭ hloi lơ̆m kơ plăh bơ̆ jang kiơ̆; jang kiơ̆ tơ păt jên jang teh đak đei Jơ nŭm pơ gơ̆r kon pơ lei dêh char kĭ ăn. Lơ̆m tơ lĕch jên jang hơ nơ̆ng jăl jang 2016-2021, tơ ring hlôi ‘mơ ‘met lơ̆m tơ drong pơm, hơ len lăng, kĭ ăn jên jang, vei lăng iŏk yua jên jang teh đak đei hloh 3.380 ti hlak jên.

Khŭl dăr hơ len kơ Kuôk hô̆i bơ̆ jang tơ̆ Lâm Đồng

Kơ dră Khŭl dăr hơ len, Thượng tướng Trần Quang Phương - Phŏ Kơ dră Kuôk hô̆i pơ tôch tơ̆ jơ bơ̆ jang hlôi chih iŏk, lăng ‘lơ̆ng dôm tơ drong hơ drin đơ̆ng tơ ring găh tơ drong jang ‘mơ ‘met, tang găn brăh brư jăl jang 2016 - 2021 đơ̆ng Lâm Đồng, lăng ‘lơ̆ng dôm hla ar chih roi tơ băt đơ̆ng Anih vei lăng kon pơ lei - Jơ nŭm pơ gơ̆r kon pơ lei păng Khŭl tang măt Kuôk hô̆i dêh char Lâm Đồng kŭm tôm mơn. Phŏ Kơ dră Kuôk hô̆i athei dêh char kăl kơ pơm rơ đăh dôm tơ drong oei đei, ưh kơ ‘lơ̆ng, tơ drong tơm pơm ăn păng apĭnh, tơ lĕch nơ̆r vă hơ nơ̆ng jang ‘lơ̆ng tơ drong jang  ‘mơ ‘met, tang găn brăh brư lơ̆m dêh char lơ̆m jăl jang truh. Athei set hơ len kiơ̆ gơh jang lơ̆m tơ drong pơm hơ dăh jang kiơ̆ trong jang tơ gŭm khôi luơ̆t găh tơ drong ‘mơ ‘met, tang găn brăh brư. Dăr hơ len dôm tơ drong bơ̆ jang ‘mơ ‘met tang găn brăh brư mă tơm ‘noh jĭ iŏk, tơ lĕch jên jang teh đak, vei lăng mŭk drăm teh đak, hnam, teh kơ teh đak, anih bơ̆ jang, mŭk drăm tơ klep hăm teh, kơ măy kơ mŏk, vei lăng teh, tơ mam drăm lơ̆m teh, vei lăng bơ ngai jang, tơ drong proh hơ met bơ ngai jang tŏ sĕt bơ ngai, tơ jur biên chế vă jang kiơ̆ đei iŏk yua ‘lơ̆ng....

Tơ̆ Gia Lai, khŭl bơ̆ jang kơ sô̆ 2 găh khŭl dăr hơ len kơ Kuôk hô̆i yua đơ̆ng bơ ngai jang lơ̆m Khul chĕp kơ̆l pơ gơ̆r Trung ương Đảng, Kơ dră Anih jang vei lăng jên hu kơ Kuôk hô̆i Nguyễn Phú Cường pơm kơ dră khŭl hlôi đei jơ bơ̆ jang hăm Anih vei lăng kon pơ lei dêh char Gia Lai găh tơ drong ‘mơ ‘met, tang găn brăh brư jăl jang 2016 – 2021. Kiơ̆ tơ roi tơ băt, lơ̆m jăl jang 2016-2021, dêh char Gia Lai hlôi ‘mơ ‘met đei hloh 4.368 ti hlak jên. Lơ̆m noh, jang kiơ̆ ‘mơ ‘met tơ lĕch hơ nơ̆ng 10% vă pơm jên hơ met ming jên khei hloh 1.154 ti hlak jên….

Tơ̆ jơ bơ̆ jang, dôm bơ ngai jang lơ̆m khŭl kơ Kuôk hô̆i athei kơ dră chĕp kơ̆l Anih vei lăng kon pơ lei dêh char Gia Lai păng rim anih jang pơm rơ đăh 1,2 tơ drong ƀơm truh nhen: tơ drong jang vei lăng bri, pơ tăm bri; dôm tơ drong jang tơ mơ̆t jên jang ming man hiơ̆ kơ đang; hơ len lăng tơ drong jơ nei iŏk yua jên ODA tơ̆ tơ ring; tơ drong dơ nâu đak Ia Mơr tam mă hơ tŏk đĭ kơ sư̆k tơ ruih; dôm tơ drong mơ mat tat lơ̆m hơ tŏk tơ iung ŭnh hơ yuh; tơ drong vei lăng, iŏk jang, iŏk yua tơ mam drăm đak, tơ mam drăm lơ̆m teh; tơ drong iŏk tŏ sĕt bơ ngai jang, tơ jur biên chế…   

Phŏ Kơ dră Kuôk hô̆i Trần Quang Phương pơ ma tơ̆ jơ bơ̆ jang

Pơ ma lơ̆m jơ dăr hơ len, Kơ dră chĕp kơ̆l Anih vei lăng jên hu kơ Kuôk hô̆i Nguyễn Phú Cường tơ chĕng ‘lơ̆ng đon jang tơ năp đơ̆ng dêh char Gia Lai lơ̆m tơ drong jang ‘mơ ‘met, tang găn brăh brư. Atŭm hăm ‘nŏh, athei dêh char hơ nơ̆ng hơ tŏk tơ drong jang, bơ̆ jang đei đei yoa ‘lơ̆ng hlŏh dơ̆ng tơ drong jang ‘nâu; đei trong jang mă rơ đăh tơ̆ rim anih jang, tơ ring tơ rang; hơ tŏk tơ drong dăr lăng; chĕp kơ̆l pơ gơ̆r bơ̆ jang dôm tơ drong jang oei hiơ̆; đei trong jang ‘lơ̆ng hăm dôm tơ drong jang ưh jăh tơ lĕch jang, mă loi jĭ dôm tơ drong jang, jang ưh jăh đang; đei trong vei lăng, iŏk yoa tơ mam drăm lăp ‘lơ̆ng, trŏ hăm tơ drong hơ găt…

Kơ dră chĕp kơ̆l Anih vei lăng jên hu kơ Kuôk hô̆i Nguyễn Phú Cường oei athei Kơ dră vei lăng kon pơ lei dêh char Gia Lai pơ tho ăn dôm anih jang kơ pal, dôm anih jang đei ƀơm truh chih iŏk tôm nơ̆r tơ gop đơ̆ng khul dăr lăng; hơ nơ̆ng hơ met ming pơ ‘lơ̆ng hla ar chih tơ roi vă pơ truh ăn khul dăr hơ len lơ̆m jơ năr hrôih hlŏh. Khŭl kŭm vă chih iŏk tôm nơ̆r pơ ma, apinh đơ̆ng dêh char vă tơ mât lơ̆m hla ar tơ roi ăn Anih chĕp kơ̆l pơ gơ̆r Kuôk hô̆i tơ̆ hơ năp kơnh.

Thuem: Tơ blơ̆