Kơ iĕng Kơdră chĕp pơgơ̆r Kuô̆k hô̆i Nguyễn Đức Hải hlôi pôk ăn 12 tơnô̆ tơmam drăm ăn ŭnh hnam dơnuh, ŭnh hnam đei iŏk yua ăn teh đak vang năm ‘măng pơgơ̆r “Têt ‘mêm kơ eng”.

Kơ iĕng Kơdră chĕp pơgơ̆r Kuô̆k hô̆i Nguyễn Đức Hải sơkơ̆t hơdăh, ‘nau jĭ Tơdrong pơgơ̆r tôch gĭt kăl, tơpă pơjing đei tơdrong tơgoăt kon pơlei pơla, vang kơrŭn jơhngơ̆m lang să ‘mêm kơ eng dih băl păng jơhngơ̆m đon ‘mêm kơ eng, ba ăn kon pơlei đei jơ ‘năr Têt chơt hơ iă ‘nă hal ‘lơ̆ng liĕm joăt joe kơ hơdrĕch hơdrung. Kơ iĕng Kơdră chĕp pơgơ̆r Kuô̆k hô̆i athei khul kơdră đảng, kơdră chĕp pơgơ̆r dêh char Lạng Sơn ‘ngoăih akŏm pơrô̆ jang atŏk tơ iung mŭk drăm-tơpôl kăl hơnơ̆ng lăng ba truh bơ̆ jang vei lăng năng tông tơdrong jang sa hơrih sa tơpôl; lăng ba pơrô̆ jang, iung jang hơdoi vă Tơdrong pơgơ̆r “Têt ‘mêm kơ eng” hơnơ̆ng đei vei kơjăp, tơlĕch jang kiơ̆ jơnei păng roi năr roi hơnhăk ăn lơ bơngai sơng Têt chơt hơ iă ‘nă hal, phĭ tơtŏ dơnŏ ‘lơ̆ng dơ̆ng kơjăp.

Jei lơ̆m năr 26/1, Kơ iĕng Kơdră chĕp pơgơ̆r Kuô̆k hô̆i Nguyễn Đức Hải hlôi năm ngôi, pôk 200 tơnô̆ tơmam drăm ăn kŏng nhân, bơngai jang hơrih sa tơnap tap tơ̆ ‘măng pơgơ̆r “Têt chơt hơ iă-Puih mak mơnat dih băl” sơnăm 2024 kơ dêh char Lạng Sơn.