‘Nau ‘noh nơ̆r pơma hơdăh đơ̆ng Kơ iĕng Thủ tướng Trần Hồng Hà tơ̆ ‘măng hop akŏm trư̆k tuyên lơ̆m teh đak ăn tơgop nơ̆r găh trong vă pơjing Tơdrong tơchơ̆t sơkơ̆t hơdăh găh kơjă teh.

Kiơ̆ hla bơar chih tơbăt đơ̆ng Hơnih tơm vei lăng Choh jang sa păng Atŏk tơ iung tơring tơrang, Trong vă pơjing Tơdrong tơchơ̆t lăp đơ̆ng rŏng tơgoăt iŏk tôm tong đei 6 chăl, 41 apăng sơkơ̆t hơdăh găh trong jang sơkơ̆t hơdăh kơjă teh; pơjing, hơmet ming, tơmơ̆t dơ̆ng găh kơjă; dôm tơdrong bơ̆ jang tơbăt ăn sơkơt hơdăh kơjă teh; jang kiơ̆ trong sơkơ̆t hơdăh kơjă teh kơ rim tơdrong au to ... Tơ̆ hop akŏm, rim nơ̆r tơgop akŏm pơma dơnuh găh tơdrong đei ƀôh yan au, kăl hơmet pơ ‘lơ̆ng kơtang, mă trŏ lăp hăm yan au, veh ver pơm glăi. Kơ iĕng Thủ tướng athei Hơnih tơm vei lăng Choh jang sa păng Atŏk tơ iung tơring tơrang tơgoăt iŏk mă tôm tong dôm nơ̆r tơgop, hrôih pơm keh đang trong vă pơjing Tơdrong Tơchơ̆t, tĕnh koăng chih tơmơ̆t hloi dôm trong jang, trong tơgŭm djru ‘nao, trong jang kăl lơ̆m Khôi luơ̆t Groi teh sơnăm 2024 tơmơ̆t jang kiơ̆ hloi.