Ƀơ̆t oei erih sơ̆, Kơdră chĕp pơgơ̆r Teh đak Hồ Chí Minh (Ƀok Hô) ling lang lăng tông nông gia kơjăp truh hăm khul Ƀô̆ đô̆i vei lăng sơlam Teh đak. Ƀok Hô pơtho: Kăl băt vei lăng tơdrong pơting dih băl pran kơtang hơnơ̆ng, hlôi đei khul Ƀô̆ đô̆i vei lăng sơlam Teh đak tơgoăt kơjăp păng lăng ‘noh jing “tơdrong tơm” iung jang. Tơdrong tơ̆ Kơđông vei lăng sơlam Teh đak Huổi Luông, oei lơ̆m tơring Huổi Luông, apŭng Phong Thổ, dêh char Lai Châu ‘noh jing tơƀôh hơdăh trong jang ‘lơ̆ng lơ̆m hok pơhrăm păng pơm kiơ̆ jơhngơ̆m đon ‘lơ̆ng, trong bơ̆ jang hơ iă kơ Ƀok Hô tŏk bŏk đei tơlĕch kơtang lơ̆m khul ƀô̆ đô̆i, tơpă păng hơdăh.

Giàng Mý Só ‘nŏh mĭnh lơ̆m 5 ‘nu hŏk tro ŭnh hnam tơnap tap hloh đei Kơđông Ƀô̆ đô̆i vei lăng sơlam Teh đak Huổi Luông, apŭng Phong Thổ, dêh char Lai Châu iŏk rong ‘me păng tơgŭm djru mĭnh khei 500.000 hlak jên. Oh Só tơbăt: Sơnăm au oh tŏk lăm 5 bơih, tơdăh ưh kơ đei đe mih ma Ƀô̆ đô̆i vei lăng sơlam teh đak iŏk rong ‘me oh lei ưh kơ đei rơvơn vă năm tơ̆ hnam trương hŏk pơhrăm ôh:“Ŭnh hnam nhôn tôch tơnap tap, ư̆h kơ đei phe tăh sa; đei đe mih ma ƀô̆ đô̆i ‘mêm mơnat ba năm tơ̆ hnam trương, tơgŭm djru mĭnh khei 500.000 hlak jên, ĭnh iŏk kon jên au vă chă răt hla bơar chih, hla bơar hŏk, tơmam drăm hŏk pơhrăm păng pơkom vă răt phe sa. Rim đe mih ma ƀô̆ đô̆i tơgŭm djru, ba gô hơdrin hŏk pơhrăm, năm hŏk hơnơ̆ng ưh kơ hrur ôh”.

Thiếu tá Nguyễn Hữu Kiểm, Chính trị viên Kơđông Ƀô̆ đô̆i vei lăng sơlam Teh đak Huổi Luông tơbăt: Xơkơ̆t hơdăh Tơdrong jang “Ba oh năm tơ̆ hnam trương” păng “kon rong kơđông ƀô̆ đô̆i vei lăng sơlam teh đak” ‘nŏh mĭnh lơ̆m dôm tơdrong jang ‘mêm mơnat dih băl kơtang. Kơ yuơ lơ loh, đơ̆ng mă tơlĕch jang, hơnih hlôi chă pơrô̆ pơrôp, hơvơn rim kang ƀô̆ ƀô̆ đô̆i vang chă tơra tơgop păng krao hơvơn rim khul jang, rim bơngai vang chă tơgŭm djru vă sơng rong ‘me păng tơgŭm djru rim đe mon.

Atŭm hăm tơdrong tơgŭm djru hăm jên, hơnih au oei hơnơ̆ng ăn kang ƀô̆ tơgŭm djru ŭnh hnam chă choh jang sa dơ̆ng. Adoi iung jang hơdoi hăm kơdră tơring dăr lăng rim ŭnh hnam tơnap tap, ŭnh hnam dơnuh lơ̆m tơring mă lei ưh kơ đei sơng iŏk ro ‘me, tơgŭm ăn vă krao hơvơn rim khul, rim bơngai đei jơhngơ̆m đon ‘lơ̆ng chă tơgŭm ăn tơmam drăm sa, kon jên hŏk pơhrăm ƀlep lơ̆m jơ ‘năr mơ̆t hŏk sơnăm ‘nao, năr Apŭng plĕnh teh đe hơ ioh 1/6 dăh mă năr trung thu ... ‘Nau jei jing mĭnh lơ̆m dôm tơdrong ‘lơ̆ng hơ iă mă kơđông Ƀô̆ đô̆i vei lăng sơlam teh đak Huổi Luông tŏk bŏk tơlĕch jang kiơ̆ Nơ̆r pơma pơtôch 01 đơ̆ng Hơnih tơm Chinh trĭ găh hơnơ̆ng jang kiơ̆ Nơ̆r athei jang kiơ̆ 05 găh atŏk kơtang hŏk pơhrăm păng pơm kiơ̆ jơhngơ̆m đon ‘lơ̆ng, bơ̆ jang hơgei kơ Ƀok Hô. Thiếu tá Nguyễn Hữu Kiểm tơbăt:“Tơjê̆ au hloi, Hơnih hlôi jang kiơ̆ trong jang pơtăm kram sơlam teh đak păng hlôi đei 82 ŭnh hnam pơm kiơ̆ tơ̆ Hồ Thầu hăm hloh 3km trong sơlam teh đak păng hăm dôm trong jang hơdăh ‘nŏh nhôn hlôi pơjao ăn rim khul păng rim đảng viên rim năr, rim giĕng năm truh hăm ŭnh hnam vă chă pơrô̆ pơrôp,krao hơvơn păng băt hơdăh jơhngơ̆m đon hơpơi ‘meh vă đơ̆ng kon pơlei, adoi pơtho ăn kon pơlei jang kiơ̆ trong jang pơtăm ‘long, rong kon tơrong atŏk tơ iung mŭk drăm ŭnh hnan”.

Hăm tơdrong vei lăng năng tông 13km trong sơlam teh đak păng 15 hơdrơ̆ng, đei 21 pơlei, vă tơdrong hŏk pơhrăm păng pơm kiơ̆ Ƀok Hô kơtang hloh dơ̆ng, jơnei hloh dơ̆ng, Đảng ủy, Khul kơdră chĕp pơgơ̆r Kơđông Ƀô̆ đô̆i vei lăng sơlam teh đak Huổi Luông hlôi tơlĕch tơdrong jang hơdăh lơ̆m hŏk pơhrăm păng pơm kiơ̆ jơhngơ̆m đon ‘lơ̆ng kơ Ƀok Hô hăm dôm tơdrong jang hơdăh păng tơlĕch jang truh pơđĭ kang ƀô̆, đảng viên, ƀô̆ đô̆i vă chih hơnăn pơm kiơ̆ đơ̆ng 1 truh 2 tơdrong jang hơdăh. Đại úy Tẩn Lở Tông, Kơđông Ƀô̆ đô̆i Huổi Luông, apŭng Phong Thổ, dêh char Lai Châu tơbăt:“Kơdih ba lăp đơ̆ng rŏng tơlĕch jang kiơ̆ hŏk pơhrăm, pơm kiơ̆ jơhngơ̆m đon ‘lơ̆ng Ƀok Hô, lơ̆m bơ̆ jang vei lăng năng tông sơlam teh đak ba hlôi pơchoh trong ăn Khul kơdră Đảng, Khul kơdră chĕp pơgơ̆r Kơđông bơ̆ jang ‘lơ̆ng năm pơtrui, dăr joang trong sơlam teh đak. Ba jei năm pơrô̆ pơrôp, pơtho tơbăt ăn kon pơlei găh bơ̆ jang vei lăng sơđơ̆ng sơlam teh đak, hơdrơ̆ng sơlam teh đak. Đơ̆ng noh kon pơlei hlôh vao păng pơm kiơ̆.

Dôm sơnăm au ki, Kơđông Ƀô̆ đô̆i vei lăng sơlam Teh đak Huổi Luông jei hơnơ̆ng iung jang hơdoi hăm kơdră tơring lơ̆m bơ̆ jang pơrô̆ tơbăt ăn kon pơlei atŏk jơhngơ̆m đon tơ iung pơjing păng vei lăng teh đak; tơgŭm djru lơ ŭnh hnam tơnap tap atŏk tơ iung mŭk drăm, tơgŭm djru hŏk tro ŭnh hnam tơnap tap năm tơ̆ hnam trương.

Đơ̆ng hŏk pơhrăm păng pơm kiơ̆ jơhngơ̆m đon ‘lơ̆ng kơ Ƀok Hô tơ̆ Kơđông Ƀô̆ đô̆i vei lăng sơlam Teh đak Huổi Luông hlôi hơnhăk đei jơhngơ̆m đon lui kiơ̆ kơjăp ăn kon pơlei tơring sơlam teh đak, pơm hơtok tơdrong ‘lơ̆ng liĕm kơ khul Ƀô̆ đô̆i kơlong jơk, tơgop tơ iung pơjing hơnih jang ‘lơ̆ng, nuih mơng pran kơtang tôm tong, jang keh đang ‘lơ̆ng vei lăng năng tông tơdrong pơm tơm kơ dih, sơđơ̆ng tơring kơlam kơ Teh đak.