Đại tướng Tô Lâm tơƀôh đon hiôk chơ̆t ƀơ̆t xăh jang chŭn mir ngăl, đei lơ tơdrong joăt kach mang Hưng Tân jĭ xăh jang đang ‘lơ̆ng tơring tơrang ‘nao păng tơring tơrang ‘nao ‘lơ̆ng rŏ mă blŭng kơ apŭng Hưng Nguyên. Kơdră tơm pơ ư kơ dôm jơnei hơdăh mă Đảng bộ, khŭl kơdră păng kon pơlei xăh Hưng Tân pơma atŭm, tơring kon pơlei oei plei Phan pơma hơdrô̆ hlôi iŏk đei.

Kơdră tơm Tô Lâm kŭm ‘meh vă kon pơlei plei Phan hơnơ̆ng 1 jơhngơ̆m đon pơjing pơlei pơla, ling lang tơgăl ‘noh jĭ tơdrong jang pơlong lăng, jĭ tơdrong ‘lơ̆ng kơ xăh jang đei tơring tơrang ‘nao ‘lơ̆ng rŏ. Kơdră tơm athei khŭl linh Kŏng an rim tơring đơ̆ng dêh char truh tơ̆ xăh, athei băt hơdăh tơdrong; tơtom chă ƀôh, jang tơgŭm păng hơmet pơ ‘lơ̆ng đei yua dôm tơdrong đei ƀôh hloi tơ̆ tơring; ling lang vei kơjăp tơdrong sơđơ̆ng, hiôk hian ăn Kon pơlei.