Tơ̆ jơ truh năm ngôi, yă Trương Thị Mai tơchĕng ‘lơ̆ng hơnăp jang păng đon adrin yak hlŏh pơmat tat đơ̆ng khul kăn ƀô̆, công nhân, bơngai jang tơ̆ tơring jang kơmăy Phú Hội lơ̆m tơdrong jang xa, pơm tơlĕch tơmam đơ̆ng choh jang xa. Tơgop hơnhăk tơdrong jang tŏk tơ̆ anih choh jang xa đơ̆ng tơ̆ dêh char pơma hơdrô̆, lơ̆m teh đak pơma atŭm lơ hlŏh lơ̆m 10 sơnăm âu ki. Tơmam ‘nhot, ƀum, plei ‘long tơ̆ Lâm Đồng dang ei đei tĕch tơ̆ lơ teh đak đe lơ̆m apŭng plenh teh.

Atŭm hăm ‘nŏh, yă Trương Thị Mai oei athei dôm tơring jang kơmăy, khul kơdră pơgơ̆r tơring lơ̆m dêh char Lâm Đồng hơnơ̆ng tơgŭm, vei lăng tơdrong arih xa ăn bơngai jang tơ̆ dôm tơring jang kơmăy, mă loi jĭ hơmet pơ ‘lơ̆ng dôm tơdrong jang man anih hnam oei ăn công nhân. Ƀlep ƀât ‘măng mă âu, yă Trương Thị Mai hơpăh tơmam têt ăn Tơring jang kơmăy Phú Hội; hơpăh 200 tơpu tơmam ăn công nhân, bơngai jang tơ̆ tơring jang kơmăy, 1 tơpu tơmam đei kơjă 1,3 triu hlak jên.