Tơ̆ dêh char Bạc Liêu, Kơdră chĕp pơgơ̆r Kuô̆k hô̆i Vương Đình Huệ hlôi năm ngôi, pôk tơmam drăm ăn hloh 360 ŭnh hnam đei iŏk yua ăn teh đak, ŭnh hnam dơnuh, bơngai jo jăn đơ̆ng ƀrơ̆m phao pơgang pơm ăn,kŏng nhân, bơngai jang ŭnh hnam tơap tap hlôi năm tơ̆ Hnam joh ayŏ dêh char Bạc Liêu. Kơdră chĕp pơgơ̆r Kuô̆k hô̆i Vương Đình Huệ pơma hơdăh, kiơ̆ yok rok jơ̆ng joăt joe ‘mêm kơ eng dih băl ‘lơ̆ng liĕm kơ hơdrĕch hơdrung, hơnơ̆ng vei lăng năng tông ăn kon pơlei, mă kăl hơdrol rim ‘măng khei ‘năr têt truh puih mak vih, Đảng, Teh đak, Hơnih bơ̆ jang Trung ương MTTQ Việt Nam păng rim khul ling lang lăng ba, hơdrin ‘măn tơmam drăm, pơgơ̆r lơ tơdrong jang ‘lơ̆ng hơ iă, mă kăl vei lăng năng tông ŭnh hnam đei iŏk yua ăn teh đak, unh hnam dơnuh, kŏng nhân, bơngai jang hơrih sa tơnap tap ... vă rim ŭnh hnam jei đei chơt hơ iă puih mak, sơng têt.

Lơ̆m khei năr kơnh, Kơdră chĕp pơgơ̆r Kuô̆k hô̆i athei rim kơdră đảng, kơdră chĕp pơgơ̆r, Mặt trận Tổ quốc păng rim khul bơ̆ jang kơ dêh char tơlĕch jang kiơ̆ ‘lơ̆ng Nơ̆r athei jang kiơ̆ kơsô̆ 26 đơ̆ng Ban Bí thư găh pơgơ̆r Têt Giáp Thìn năm 2024:“ ‘Hơmet ăn rim tơdrong rơvơn ‘lơ̆ng hloh tơgŭm ăn Kon pơlei chơt hơ iă puih mak, sơng Têt chơt hơ iă ‘nă hal, sơđơ̆ng pơkom. Hơnơ̆ng lăng ba, vei lăng năng tông rim ŭnh hnam đei iok yua ăn teh đak, ŭnh hnam dơnuh, bơngai jo jăn đơ̆ng ƀrơ̆m phao pơgang pơm ăn, kŏng nhân, bơngai jang ŭnh hnam tơnap tap ... Adoi hơnơ̆ng chă pơma dơnuh, mơ̆ng rim nơ̆r tơgop đơ̆ng Kon pơlei, bơngai jang, tơchĕng hơlen, tơ iung pơjing rim trong jang, trong tơgŭm djru, pơjing rơvơn vă rim kon pơlei atŏk tơ iung jang sa, hơdrin yak hloh dơnuh hin kơjăp ‘lơ̆ng. Tơdăh dôm bơngai ưh kơ kĕ yak hloh dơnuh hin lei tơplih trong jang tơgŭm djru tơpôl vă tơgŭm ăn kon pơlei. Đảng Teh đak păng kơdih ĭnh tơchĕng, rim ŭnh hnam đei iŏk yua ăn teh đak, ŭnh hnam dơnuh, kon pơlei tơnap tap hơnơ̆ng hơdrin, pơnam jang sa, hơdrin tơ iung pơjing hơrih sa phĭ tơtŏ dơnŏ ‘lơ̆ng, hơnuk hơnoa. Rim ‘nhŏng pơmai oh kŏng nhân, bơgai jang vang hơlêm dôm tơdrong tơnap tap atŭm kơ teh đak, tơring păng hơnih mơdro sa; jang kiơ̆ kơtang rim trong bơ̆ jang đơ̆ng Đảng, Khôi luơ̆t Teh đak, tơgop xek tơlang dôm tơdrong jang sơđơ̆ng ‘lơ̆ng hơ iă, gơ̆h hơgei lơ̆m hơnih mơdro sa, atŭm hăm hơnih mơdro sa hơmet pơ ‘lơ̆ng tơdrong jang pơm tơlĕch tơmam drăm”.

Ƀơ̆t ‘măng âu Anih jang Trung ương MTTQ Việt Nam, Anih tơm Asong jang Việt Nam, Trung ương Jơnŭm jang ‘Long pơglang brê Việt Nam asong 600 tơpu tơmam ăn rim unh hnam đei kŏng, unh hnam hin dơnuh, unh hnam đei bơngai ƀơm pơgang da cam, bơngai jang đei tơdrong hơrih tơnap tap lơ̆m dêh char Bạc Liêu.

Adoi lơ̆m giĕng âu ki, tơ̆ Anih jang kŏng ngĭp Suối Dầu, apŭng Cam Lâm, dêh char Khánh Hòa, Kơ-iĕng kơdră Kuôk hô̆i Nguyễn Khắc Định atŭm hăm Khul kơpal truh ngôi tơ̆ anih pơgơ̆r "Têt hơkŭm – Puih mak hơ-iă" păng pôk tơmam ăn bơngai pơm jang lơ̆m dêh char Khánh Hòa. Adoi lơ̆m ‘măng âu hlôi akŏm Kơchơ Têt Kŏng đoan 2024 tơ̆ 5 anih lơ̆m dêh char. Tơ̆ 5 anih âu, đei 10 anih tĕch tơmam 0 hlj, pơhlom 200 anih tĕch tơmam tơjur kơjă ăn đoan viên, bơngai pơm jang. ‘Nguaih kơ ‘noh, Anih tơm Asong jang dêh char Khánh Hòa oei jang hadoi hăm dôm anih jang, tơlĕch khăm hơlen jơhngơ̆m jăn, tơroi gah luơ̆t ƀao hiêm ăn bơngai pơm jang. Têt Giáp Thìn 2024, Kŏng đoan dôm jăl jang tơ̆ dêh char Khánh Hòa hlôi asong pơhlom 50 ti hlj vă năm ngôi, pôk tơmam Têt ăn bơngai jang.

         Tơ̆ anih pơgơ̆r "Têt hơkŭm – Puih mak hơ-iă" păng kơchơ kŏng đoan kơ Anih jang Kŏng ngĭp Suối Dầu, Phŏ Kơdră Kuôk hô̆i Nguyễn Khắc Định păng Kơdră Anih tơm Asong jang Việt Nam, đe Kơdră dêh char Khánh Hòa pơjao 400 tơpu tơmam ăn bơngai jang. Pơma dơnuh hăm bơngai pơm jang truh đơ̆ng dôm anih jang mŭk drăm tơ̆ Anih jang Kŏng ngĭp Suối Dầu, rim anih jang kŏng ngĭp lơ̆m dêh char Khánh Hòa, Kơ-iĕng kơdră Kuôk hô̆i Nguyễn Khắc Định pơtruh nơ̆r thơ thâu Têt, pơma dơnuh hăm bơngai jang, atŭm hăm noh hơpơi ‘meh, rim unh hnam pơtoi hơdrin pơm jang, găn hloh tơnap tap, vă đei minh tơdrong hơrih ‘lơ̆ng hloh. Kơ-iĕng kơdră Kuôk hô̆i Nguyễn Khắc Định sơkơ̆t hơdah:“Đe kơdră Đảng, Teh đak, jơnŭm pơgơ̆r dêh char Khánh Hòa hơnơ̆ng chă tơmơ̆ng, tơrĕk truh tơdrong hơrih kơ bơngai pơm jang. Păng hơpơi ‘meh ‘nhŏng pơmai oh hơnơ̆ng tơguăt tơguăl pơm jang vă pơjing Anih jang Kŏng ngĭp, pơjing dêh char Khánh Hòa gơh đei jơnei atŭm kơ jâ̆p teh đak. Pơtruh nơ̆r thơ thâu hăm rim unh hnam bơngai pơm jang tơ̆ dêh char Khánh Hòa sơng Têt Nguyên đán Giáp Thìn tơnŏ, tơguăt tơguăl, ƀenh kơ tơdrong ‘mêm kơ-eng păng jơnap sô̆ sôn".