Kuô̆k hô̆i jăl XV đei 499 ‘nu bơngai tang măt. Lơ̆m au đei 89 ‘nu bơngai tang măt Kuô̆k hô̆i ‘nŏh bơngai kon kông, đei 5 nu bơngai chĕp pơgơ̆r lui khop; 119 ‘nu ƀok thây kô păng ƀok thây kô so. Iung pơma tơ̆ jơ tơƀơ̆p mŭh măt, Kơdră chĕp pơgơ̆r Kuô̆k hô̆i Vương Đình Huệ akhan, ‘măng tơƀơ̆p mŭh măt au jing tơdrong jang tôch kơ kăl, tơƀô̆h hơdăh tơgoăt tơgoăl kơjăp ƀar păh rim phơdrĕch hơdrung, tơƀô̆h hơdăh mĭnh jơhngơ̆m đon păng iung jang, hơnăp jang kơ Kuô̆k hô̆i.

Kơdră chĕp pơgơ̆r Kuô̆k hô̆i athei rim bơngai tang măt Kuô̆k hô̆i ‘nŏh bơngai kon kông, bơngai hŏk jrŭ, bơngai chĕp pơgơ̆r lui khop păng ƀok thây kô hơdrin vang iung jang lơ̆m tơ iung pơjing, pơm pơkeh khôi luơ̆t adoi nhen rim tơlĕch nơ̆r pơchŏh trong, dăr lăng tơdrong jang kiơ̆ trong bơ̆ jang khôi luơ̆t găh bơ̆ jang vei lăng kon kông, lui khop, atŏk tơ iung pơtho pơhrăm, khoa hŏk-kmăi kmŏk vă tơ iung pơjing tơring kon kông păng groi kông atŏk tơ iung hlŏh dơ̆ng.