Iung pơma tơ̆ jơ tơƀơ̆p, Kơdră chĕp pơgơ̆r Kuô̆k hô̆i Vương Đình Huệ hôn bơnê kơtang Khul kơdră chĕp pơgơ̆r Đảng pơlei tơm Hồ Chí Minh hlôi pơjing Hơnih bơ̆ jang tơchă akŏm Pơnă chinh trĭ păng pơnă linh ƀô̆ đô̆i so pơlei tơm Hồ Chí Minh, Hơnih au ưh khan lăp tơdrong kăl ăn rim bơngai lơ̆m khul mă lei oei jing gơng tơroh kloh klĕch hăm Đảng, Teh đak dơ̆ng.

‘Nau jing jang krao akŏm, pơtho tơbăt jơhngơ̆m đon joăt joe ‘lơ̆ng hơ iă, tơpă yan au mă rim tơring kăl kiơ̆ yok rok jơ̆ng. Hơnih bơ̆ jang tơchă akŏm đĭ đăng pơnă chĭnh trĭ păng pơnă linh ƀô̆ đô̆i so lơ̆m 2 ‘măng iung tơblăh sơ̆, pơgơ̆r lơ tơdrong hop akŏm, năm ngôi kơdrăn tơblăh so; Hơnih tơchă akŏm hlôi hơlen hơdăh chăl sơnăm nuih mơng pran kơtang ‘moi kiơ̆ dôm bơngai jang ‘lơ̆ng lơ̆m khul pơnă chinh trĭ păng pơnă linh ƀô̆ đô̆i so. Khei năr au ki, hăm trong chep pơgơ̆r đơ̆ng Trung ương jei chă krao akŏm, xek tơlang rim hô sơ pơm tim keh đang. Ƀlep lơ̆m jơ ‘năr au, Kơdră chĕp pơgơ̆r Kuô̆k hô̆i hôn bơnê kơtang dôm tơdrong hơdrin tơgum djru xek tơlang keh đang hloh 1.000 hô sơ dôm bơngai đei iŏk yua ăn kĕch mang tim mă pơm keh đang đơ̆ng Hơnih bơ̆ jang tơchă akŏm au.