Iung pơma tơ̆ jơ bơ̆ jang, Kơdră chĕp pơgơ̆r Kuô̆k hô̆i Trần Thanh Mẫn tơbăt, dĭng truh dang ei, Kuô̆k hô̆i hlôi iung jang tôch kơ lơ tơdrong jang, ‘noh iung jang 14 ‘măng hop akŏm, lơ̆m ou pơ đĭ hop akŏm joăt joe păng hop akŏm hăt hot. Tơdrong jang kiơ̆ trong pơprŏ jang kơ Đảng khul Kuô̆k hô̆i, Tơdrong tơchơ̆t Pơm lêh hop akŏm Đảng lơ̆m teh đak ‘măng mă 13, nơ̆r pơma pơtôch kơsô̆ 19 kơ Hơnih tơm Chinh trĭ găh pơchoh trong tơdrong jang tơ iung pơjing khôi luơ̆t jăl jang Kuô̆k hô̆i jăl XV iŏk đei jơnei hơ iă. Mă hơdăh, lơ̆m 156 tơdrong jang pơjing khôi luơ̆t hlôi jang keh đang 131 tơdrong jang. Rim tơdrong vă jang, trong pơprŏ jang kơ Đảng khul Kuô̆k hô̆i hlôi iung jang keh hloh 81%. Rim ‘măng hop akŏm đơ̆ng rŏng jơnei hloh kơ hơdrol, đei bơngai tăh hla păng kon pơlei hôn bơnê kơtang.

Kiơ̆ đơ̆ng Kơdră chĕp pơgơ̆r Kuô̆k hô̆i Trần Thanh Mẫn, ‘măng hop akŏm ou vă lăng hơlen dơ̆ng dôm tơdrong hlôi đei iung jang, adoi tơbrar dôm tơdrong jang tim mă keh đang, jang tim mă ‘lơ̆ng, kăl hơlen mă brĕ vă tơlĕch jang kiơ̆ ‘lơ̆ng hloh dơ̆ng.

Tơbăt, lơ̆m khei năr kơnh, Kuô̆k hô̆i gô tơlĕch jang 3 ‘măng hop akŏm hăt hot păng 1 ‘măng hop akŏm pơtôch jăl jang Kuô̆k hô̆i jăl XV, Kơdră chĕp pơgơ̆r Kuô̆k hô̆i Trần Thanh Mẫn akhan, ‘nou jĭ tơdrong jang tôch kơ lơ. Kơ yuơ lơ loh Kơdră chĕp pơgơ̆r Kuô̆k hô̆i athei, Jơnŭm vei lăng kon kông, rim hơnih bơ̆ jang kơ Kuô̆k hô̆i kăl iung jang kơtang hloh dơ̆ng vă pơjing đei trong jang ‘lơ̆ng. Mă kăl, sơnăm 2025, teh đak bơ̆n đei lơ tơdrong pơgơ̆r tih nhen: Tơbăt 80 sơnăm Kĕch mang Khei 8 păng Kuô̆k khanh năr 2/9; 50 sơnăm Rơngei tơring Pơbăh Teh đak rơngei keh kong; bơ̆ jang hơmet ăn pôk rơ̆ih Kơdră tang măt Kuô̆k hô̆i jăl XVI păng Jơnŭm vei lăng kon pơlei rim hơnih jăl jang 2026-2031. Sơnăm 2026, Kuô̆k hô̆i tơbăt 80 sơnăm năr pôk rơ̆ih tih pôk rơ̆ih Kuô̆k hô̆i Việt Nam.

Tơ̆ ‘măng bơ̆ jang, Kơdră chĕp pơgơ̆r rim Hơnih jang vei lăng Joh ayŏ Pơtho pơhrăm; Hơnih bơ̆ jang vei lăng Tơpôl; Hơnih bơ̆ jang vei lăng bơngai tang măt hlôi tơroi tơbăt pơtôch jang kiơ̆ tơdrong bơ̆ jang đơ̆ng blung jăl jang Kuô̆k hô̆i jăl XV truh dang ei păng trong tơlĕch jang kăl truh hơtuch sơnăm.

Lăp đơ̆ng rŏng mơ̆ng rim nơ̆r iung pơma, pơma pơtôch tơ̆ ‘măng bơ̆ jang, Kơdră chĕp pơgơ̆r Kuô̆k hô̆i Trần Thanh Mẫn hôn bơnê dôm tơdrong hlôi iŏk đei kơ rim hơnih bơ̆ jang. Lơ̆m ou, Hơnih bơ̆ jang vei lăng Tơpôl hlôi jang keh đang 10 tơdrong  jang; Hơnih bơ̆ jang vei lăng Joh ayŏ, Pơtho pơhrăm jang keh đang 6 tơdrong jang; Hơnih bơ̆ jang vei lăng kơdră tang măt jang keh đang 10 tơdrong jang. Găh tơdrong pơjing khôi luơ̆t, Hơnih bơ̆ jang vei lăng Tơpôl jang keh đang 25 tơdrong jang; Hơnih bơ̆ jang vei lăng Joh ayŏ, Pơtho pơhrăm jang keh đang 14 tơdrong jang; Hơnih bơ̆ jang vei lăng kơdră tang măt jang keh đang 4 tơdrong jang.

Kơdră chĕp pơgơ̆r Kuô̆k hô̆i jei akhan, mă đơ̆ng iŏk đei jơnei hơ iă, mă lei oei đei tơdrong jang tim mă ‘lơ̆ng lơ̆m iung jang hơdoi, tơ iung pơjing trong pơprŏ jang tim mă trŏ lăp hăm yan ou, tơlĕch jang tim mă tơtom, ‘lơ̆ng liĕm.

Kơdră chĕp pơgơ̆r Kuô̆k hô̆i Trần Thanh Mẫn athei, rim Hơnih bơ̆ jang, Hơnih jang vei lăng bơngai tang măt tơlĕch jang kơtang hloh dơ̆ng hơmet ming dôm tơdrong jang tim mă ‘lơ̆ng; sơđơ̆ng ăn tơdrong tơgoăt mĭnh nơ̆r ƀơ̆r đon drơ̆ng mĭnh nơ̆r lơ̆m hơnih jang; atŏk kơtang vei lăng hrĕp tơdrong kơtơ̆ng ang kăl; pơma sa mă trŏ lăp hloh dơ̆ng.“Ĭnh athei akŏm hơmet pơ ‘lơ̆ng trong bơ̆ jang kơ Jơnŭm vei lăng kon kông, rim Hơnih bơ̆ jang kơ Kuô̆k hô̆i; hơmet pơ ‘lơ̆ng trong jang mă gơ̆h hơgei, tơdrong jang yă kiơ tơm hloh, kăl hloh vă kơrŭn jơhngơ̆m iung jang; hơmet ăn dôm tơdrong ‘măn ăn ‘măng hop akŏm mă 8, iung jang hơdoi pơgơ̆r Hop akŏm Kơdră kơpal tang măt Kuô̆k hô̆i ‘măng mă 6; hơnơng chă tơchĕng, tơblang hơdăh, tơgoăt iŏk, hơmet ming rim tơdrong vă pơjing khôi luơ̆t, trong vă pơjing Tơdrong Tơchơ̆t hlôi đei Kuô̆k hô̆i ăn tơgop nơ̆r tơ̆ ‘Măng hop akŏm mă 7 vă pơtrŭh ăn pơdrơ̆ng kiơ̆ tơ̆ ‘Măng hop akŏm mă 8.

‘Ngoăih kơ ‘noh, Kơdră chĕp pơgơ̆r Kuôk hô̆i athei rim Hơnih bơ̆ jang Kuô̆k hô̆i iung jang hơdoi tơklep kơjăp hăm Khul kơdră chĕp pơgơ̆r Teh đak lơ̆m tơlĕch jang kiơ̆ rim tơdrong vă pơjing khôi luơ̆t, tơdrong Tơchơ̆t hlôi đei Kuô̆k hô̆i pơdrơ̆ng kiơ̆ tơ̆ rim ‘Măng hop akŏm; bơ̆ jang dăr lăng kăl đei trong pơprŏ jang đơ̆ng hrôih vă veh ver hơgrop tơ̆ rim tơring; hơnơ̆ng jang kiơ̆ rim tơdrong jang kiơ̆ Trong vă jang pơgơ̆r Tơbăt 80 sơnăm năr pôk rơ̆ih tih pôk rơ̆ih Kuô̆k hô̆i Việt Nam, tơmam hơpăh chih kơtơ̆ng ang Diên Hồng ‘măng mă 3; dăr lăng tơplih ‘nao rim trong jang, pơm hla bơar kiơ̆ trong roi năr roi ‘lơ̆ng hơ iă, trŏ lăp, jơnei; mă kăl tơlĕch jang kiơ̆ ‘lơ̆ng trong jang jên khei ‘nao đơ̆ng khei 7/2024; atŏk kơtang bơ̆ jang vei lăng sơđơ̆ng chinh trĭ lơ̆m hơnih jang.