Đơ̆ng năr pơjing sơnăm 1977 truh dang ei, đei tơdrong lăng ba, vei lăng năng tông đơ̆ng khul kơdră chĕp pơgơ̆r Đảng, khul kơdră chĕp pơgơ̆r tơring păng kon pơlei lơ̆m tơring, Hnam trương Jăl pêng Phạm Hùng hlôi yak hloh ưh kơbăt dôm yơ tơdrong tơnap tap, tơgoăt mĭnh jơhngơ̆m đon, hơdrin atŏk tơ iung, pơting dih băl pơtho hơgei, hŏk hơgei, iŏk đei lơ jơnei gĭt kăl. Hrei ou hăm 40 lăm hŏk, akŏp măt bơngai hŏk ‘noh 1.571 ‘nu oh.

Tang măt ăn Kơdră chĕp pơgơ̆r Đảng, teh đak, Kơdră chĕp pơgơ̆r Kuô̆k hô̆i Trần Thanh Mẫn pơma tơbăt jơhngơ̆m đon chơt hơ iă tơ̆ hơnăp dôm tơdrong jang ‘lơ̆ng đơ̆ng hnam trương lơ̆m khei năr ou ki kơnơm đơ̆ng tơdrong hơdrin kơ rim jơhnơr ƀok thây kô păng hŏk tro kơ hnam trương; Adoi hôn bơnê hơnih pơtho pơhrăm Vĩnh Long ‘noh hơnih hơdăh ang rang ‘lơ̆ng kơ tơring Tơmăn đak kroong Cửu Long pơma hơdrô̆, kơ tơring Nam Ƀộ păng lơ̆m teh đak pơma atŭm.

Kơdră chĕp pơgơ̆r Kuô̆k hô̆i Trần Thanh Mẫn pơma hơdăh, Đảng păng Teh đak ling lang sơkơ̆t hơdăh pơtho pơhrăm ‘noh tơdrong jang tơm kơ teh đak, tơmơ̆t jên jang ăn pơtho pơhrăm ‘noh tơmơ̆t jên jang atŏk tơ iung, ‘măn ăn dôm tơdrong ‘lơ̆ng liĕm hloh; akŏm pơtho pơjing khul jang, mă kăl khul jang hơgei, mĭnh lơ̆m dôm tơdrong kăl hloh ăn tơdrong ‘lơ̆ng kơ tơdrong hơrih sa kon bơngai păng tơdrong atŏk tơ iung tĕnh koăng, kơjăp ‘lơ̆ng kơ teh đak, sơkơ̆t hơdăh kĕ pơjei păng hơnih dơ̆ng kơ teh đak tơ̆ tơring păng lơ̆m apŭng plĕnh teh.

Kơdră chĕp pơgơ̆r Kuô̆k hô̆i Trần Thanh Mẫn akhan, mĭnh sơnăm hŏk ‘nao hlôi iung yak hăm lơ tơdrong chơt hơ iă ‘nă hal păng tơdrong long ‘nao; jăl trong 3 sơnăm hŏk jăl pêng tôch gĭt kăl, tơƀôh hơdăh tơdrong tih vơ̆ djơ̆ ‘lơ̆ng dôm tơdrong kơ hŏk tro. Kơ yuơ lơ loh, Kơdră chĕp pơgơ̆r Kuô̆k hô̆i hơpơi ‘meh vă rim đe oh hŏk tro gô đei lơ tơdrong chơt hơ iă; ling lang kơrŭn jơhngơ̆m, pơnam hŏk pơhrăm; ling lang hŏk pơhrăm, hơdrin kiơ̆ yok rok jơ̆ng jơhngơ̆m đon ‘lơ̆ng kơ Ƀok Hô nuih mơng gơ̆h hơgei, jơhngơ̆m đon ‘lơ̆ng kơ Bác Hai Phạm Hùng kơ pơlei pơla Vĩnh Long; tơgoăt tơgoăl pôm nơ̆r ƀơ̆r đon, ‘mêm kơ eng dih băl, tơgŭm djru dih băl vang atŏk tơ iung gơ̆h hơgei; hơmet ăn tôm tong tơdrong hlôh vao, pơchoh trong ăn tơdrong jang, hăm tơdrong hơpơi ‘meh vă tih tên vă khei năr tơ iung pơjing tơdrong jang lơ̆m hơnô̆ hơnăp kơnh; hơdrin ưh kơ lao đon hăm tơdrong vei lăng năng tông đơ̆ng mĕ ƀă, tơdrong pơtho pơhrăm đơ̆ng ƀok thây kô pơtho.

Kơdră chĕp pơgơ̆r Kuô̆k hô̆i Trần Thanh Mẫn athei rim ƀok thây kô pơtho gô “jing mĭnh ‘nu bơngai ‘lơ̆ng, hơdrin hŏk pơhrăm păng tơchăr hơgei”; ling lang tơnăp hăm tơdrong jang, đĭ jơhngơ̆m ‘mêm kơ eng, pơtho khan phăl hơlăng ăn hok tro; “Ƀok thây kô pơtho nhen mĕ ƀă pơjing”, tơpă jing bơngai pơchoh trong, choong glung vă rim đe oh hưch hanh hơmanh kơtang hŏk pơhrăm, pơhrăm jơhngơ̆m đon ‘lơ̆ng hơ iă kiơ̆ lơ̆m chăl hle.“Ĭnh lui, pơđĭ khul kang ƀô̆, ƀok thây kô pơtho, rim đe oh hok tro kơ hnam trương jang kiơ̆ ‘lơ̆ng nơ̆r pơtho khan đơ̆ng Tổng Bí thư, Kơdră chĕp pơgơ̆r Teh đak Tô Lâm lơ̆m Kơthơ pơtruh ăn hơnih jang pơtho pơhrăm ƀlep lơ̆m jơ ‘năr pơgơ̆r pơm lêh mơ̆t hŏk pơhrăm blŭng sơnăm hŏk ‘nao; hơnơ̆ng tơplih ‘nao, pơm hơtŏk loi dơ̆ng pơtho păng hŏk pơhrăm ‘lơ̆ng, tơ iung pơjing tơdrong joăt hŏk pơhrăm ‘lơ̆ng liĕm kơ groi teh gơ̆h hơgei nuih mơng Long Hồ, Vĩnh Long; tơgop kơtang lơ̆m tơdrong “pơm hơtŏk jơhngơ̆m đon kon pơlei hlôh vao, pơtho pơjing khul jang ‘lơ̆ng, pơtho ming khul gơ̆h hơgei”, tơgăl hăm hnam trương đei hơnăn Kơdră chĕp pơgơ̆r Jơnŭm Khul kơdră chĕp pơgơ̆r teh đak Phạm Hùng. Sơnăm hŏk 2024 - 2025, Tơdrong pơtho pơhrăm phô thông 2018 gô hơnơ̆ng đei tơlĕch jang kiơ̆, jĭ sơnăm mă blŭng tơlĕch jang kiơ̆ ‘Măng pơlong lĕch ‘măng khoă jăl pêng kiơ̆ trong pơgơ̆r hle. Ĭnh athei Hơnih tơm vei lăng Hnam trương pơtho pơhrăm hơnơ̆ng pơrô̆, pơgơ̆r tơlĕch jang kiơ̆ ‘lơ̆ng trong jang pơtho pơhrăm ‘nao, hrôih pơjing tơlĕch jang kiơ̆ trong pơtho tơbăt, pơgơ̆r pơtho hŏk pơhrăm ming găh ‘măng pơlong, pơjing rơvơn ‘lơ̆ng hơ iă hloh ăn rim hŏk tro năm pơlong păng ŭnh hnam  hŏk tro”.

Kơdră chĕp pơgơ̆r Kuô̆k hô̆i Trần Thanh Mẫn athei rim kơdră chĕp pơgơ̆r đảng, kơdră chĕp pơgơ̆r tơring, Măt trân Tô Kuô̆k, rim khul jang tơpôl, rim hơnih bơ̆ jang dêh char Vĩnh Long păng apŭng Long Hồ hơnơ̆ng lăng ba kơjăp, pơrô̆ iung jang kiơ̆ ‘lơ̆ng tơ iung pơjing tôm tong tơmam drăm păng kon jên hu ăn pơtho pơhrăm; vei lăng năng tông khul ƀok thây kô pơtho păng kang ƀô̆ chĕp pơgơ̆r vei lăng pơtho pơhrăm đei tôm ƀok thây kô pơtho kiơ̆ ƀlep tơdrong tơchơ̆t; tơplih ‘nao kơtang trong pơtho hŏk pơhrăm, atŏk kơtang pơtho hŏk pơhrăm gơ̆h hơgei; atŏk kơtang tơlĕch jang kiơ̆ tơ iung pơjing tơdrong joăt ‘lơ̆ng hŏk pơhrăm; atŏk kơtang tơdrong iung jang hơdoi ƀar păh ŭnh hnam, hnam trương păng tơpôl lơ̆m pơtho pơhrăm hŏk tro.